ប្រែសម្រួល : កញ្ញាដាលីស (ដេល្លីម៉េល) ៖ ឧត្តមសេនីយ៍រុស្ស៊ីម្នាក់ ដែលសរសេរ “គម្ពីរក្បួនសឹកសង្គ្រាម” របស់ប្រទេសបានព្រមានថា សង្គ្រាមនុយក្លេអ៊ែរគឺជាការសន្និដ្ឋាន “ដែលចៀសមិនរួច” នៃប្រតិបត្តិការយោធារបស់រុស្ស៊ីលើអ៊ុយក្រែន។ ការព្យាករណ៍ដ៏គួរឱ្យភ័យព្រួយនេះគឺកើតចេញពីឧត្តមសេនីយ៍ចូលនិវត្តន៍ លោក អាឡិចសាន់ឌ័រ វ្ល៉ាឌីមៀរ៉ូវ (Alexander Vladimirov) ដែលបានសរសេរសៀវភៅបីវគ្គ ដែលមានចំណងជើងថា “ទ្រឹស្តីទូទៅនៃសង្គ្រាម” (General Theory of War)។
មេបញ្ជាការជើងចាស់រូបនេះបានព្រមាននៅក្នុងបទសម្ភាសន៍ជាមួយអ្នកកាសែត ឈ្មោះ វ្ល៉ាឌីស្លាវ ស៊ូរីហ្គីន (Vladislav Shurygin) ថា “សម្រាប់ការងាកទៅរកការប្រើប្រាស់អាវុធប្រល័យលោក គឺមានតែរឿងមួយប៉ុណ្ណោះដែលត្រូវការ នោះគឺ ការសម្រេចចិត្តនយោបាយដោយអគ្គមេបញ្ជាការកំពូល វ្ល៉ាឌីមៀ ពូទីន”។
លោកបានព្រមានថា “គោលដៅរបស់រុស្ស៊ីនិងគោលដៅរបស់លោកខាងលិចគឺជាការរស់រានជាអមតៈជាប្រវត្តិសាស្ត្រ។ ហើយនេះមានន័យថា តាងនាមឱ្យរឿងនេះ គ្រប់មធ្យោបាយនៃការតស៊ូប្រដាប់អាវុធដែលមានសម្រាប់ពួកគេនឹងត្រូវប្រើប្រាស់ទាំងអស់ រួមទាំងឧបករណ៍ដូចជាអាវុធនុយក្លេអ៊ែររបស់ពួកគេជាដើម។ ខ្ញុំប្រាកដណាស់ថាអាវុធនុយក្លេអ៊ែរនឹងត្រូវប្រើក្នុងសង្គ្រាមនេះដោយចៀសមិនរួចឡើយ ហើយរាប់ចាប់ពីនេះទាំងយើងនិងសត្រូវពុំមានកន្លែងណាត្រូវទៅទេ។ កាលណាអ្នកនយោបាយ និងថ្នាក់ដឹកនាំរបស់យើងដឹងថារឿងនេះនឹងកើតឡើងឆាប់ៗ យើងនឹងចាប់ផ្តើមហ្វឹកហ្វឺនកងទ័ពនិងប្រជាជនឱ្យបានឆាប់ ព្រោះឱកាសខ្ពស់ដែលយើងនឹងមានសម្រាប់ការរស់រានមាន គឺមានន័យថាជាជ័យជម្នះ”។
នៅក្នុងសៀវភៅឆ្នាំ ២០១៣ របស់លោកវ្ល៉ាឌីមៀរ៉ូវ ឧត្តមសេនីយ៍ចូលនិវត្តន៍រូបនេះបានលើកឡើងថាមានការផ្លាស់ប្តូរពីទ្រឹស្តីប្រពៃណីនៃសង្គ្រាម ត្រង់កន្លែងដែលមានភាពខុសគ្នារវាងសន្តិភាពនិងសង្គ្រាម ទៅជាស្ថានភាពអចិន្ត្រៃយ៍នៃសង្គ្រាម ដែលត្រូវបានកំណត់ដោយការភ័យខ្លាចឥតឈប់ឈរនិងអសន្តិសុខ។
ក្នុងអំឡុងបទសម្ភាសន៍ លោកវ្ល៉ាឌីមៀរ៉ូវ អាយុ ៧៨ ឆ្នាំ បាននិយាយថា ការហ្វឹកហ្វឺនកងទ័ពមានសារៈសំខាន់ណាស់ ដូច្នេះពួកគេមាន “សមត្ថភាពក្នុងការធ្វើសង្គ្រាមក្រោមលក្ខខណ្ឌនៃការប្រើប្រាស់អាវុធប្រល័យលោក”។ លោកបាននិយាយថា សៀវភៅរបស់លោកមានមេរៀនសំខាន់ៗសម្រាប់រុស្ស៊ី។
លោកបាននិយាយថា “ប្រសិនបើអ្នកចង់បានសន្តិភាព ត្រូវតស៊ូរហូតដល់អ្នកឈ្នះ។ បើអ្នកចង់បានសន្តិភាពយូរអង្វែងនិងរឹងមាំ ត្រូវបញ្ចប់ជម្លោះលើទឹកដីរបស់ខ្មាំងសត្រូវ។ ដូច្នេះហើយ យើងត្រូវត្រៀមខ្លួន ត្រៀមកងទ័ព រដ្ឋ សេដ្ឋកិច្ច និងប្រជាជននៃប្រទេសយើង”។
លោកបាននិយាយដូច្នេះ ខណៈរដ្ឋមន្ត្រីការពារជាតិរុស្ស៊ីលោក សឺហ្គេ សយហ្គូ (Sergei Shoigu) បានអះអាងថា រុស្ស៊ីកំពុងបង្កការស្លាប់យ៉ាងច្រើនដល់ភាគីអ៊ុយក្រែនក្នុងសង្គ្រាម ត្បិតមានជំនួយលោកខាងលិចសម្រាប់រដ្ឋាភិបាលក្រុងគៀវក៏ដោយ។ លោកបាននិយាយថា “ក្នុងអំឡុងខែចុងក្រោយនេះតែឯង ប៉ុស្តិ៍បញ្ជាការចំនួន៣៤ របស់កងទ័ពអ៊ុយក្រែនត្រូវបានបំផ្លាញ។ ចាប់តាំងពីការចាប់ផ្តើមនៃការវាយបកមក ការបាត់បង់របស់សត្រូវគឺលើសពី ៦៦.០០០ នាក់ និង បាត់បង់ឃ្លាំងគ្រាប់ចំនួន ៧.៦០០ កន្លែង។ ក្នុងអំឡុងខែចុងក្រោយនេះ រុស្ស៊ីបានបាញ់ទម្លាក់មីស៊ីល HIMARS ចំនួន ១៥៩ គ្រាប់ មីស៊ីលបញ្ជាទិស ១៣ គ្រាប់ និងដ្រូនជាង ១.០០០ គ្រឿងរបស់អ៊ុយក្រែន”៕ 
ឧត្តមសេនីយ៍ចូលនិវត្តន៍ លោក អាឡិចសាន់ឌ័រ វ្ល៉ាឌីមៀរ៉ូវ អះអាងថា សង្គ្រាមនុយគ្លេអ៊ែរមួយនឹងជៀសមិនផុតដើម្បីសន្តិភាពនិងជោគជ័យឋិតថេរមួយ