ប្រែសម្រួល : កញ្ញាដាលីស (ដេល្លីម៉េល) ៖ ក្រុមអ្នកវិទ្យាសាស្ត្រចិនបានទទួលជោគជ័យក្នុងការបណ្តុះក្រលៀនដែលមានកោសិកាមនុស្សនៅក្នុងអំប្រ៊ីយ៉ុងជ្រូក ដែលវាជាករណីពិសោធន៍ដូច្នេះលើកដំបូងបង្អស់នៅលើពិភពលោក ដែលថ្ងៃណាមួយអាចជួយដោះស្រាយកង្វះខាតការបរិច្ចាគសរីរាង្គ។
ប៉ុន្តែអ្នកជំនាញបាននិយាយថា ការបណ្តុះ ដែលត្រូវបានពណ៌នានៅក្នុងការសិក្សាមួយនៅក្នុងទស្សនាវដ្ដី Cell Stem Cell កាលពីថ្ងៃព្រហស្បតិ៍ទី៧កញ្ញា បានលើកឡើងពីបញ្ហាក្រមសីលធម៌ ជាពិសេសដោយហេតុថាកោសិកាមនុស្សមួយចំនួនត្រូវបានរកឃើញផងដែរនៅក្នុងខួរជ្រូក។
អ្នកស្រាវជ្រាវមកពីវិទ្យាស្ថានជីវវេជ្ជសាស្ត្រនិងសុខភាពក្វាងចូវ បានផ្តោតសំខាន់លើក្រលៀន ពីព្រោះវាជាសរីរាង្គមួយក្នុងចំណោមសរីរាង្គដំបូងគេដែលត្រូវបណ្តុះ ហើយជាទូទៅគេប្តូរសរីរាង្គនេះលើមនុស្សច្រើនជាងគេ។
អ្នកនិពន្ធជាន់ខ្ពស់ លោក លៀងស៊ូ ឡាយ (Liangxue Lai) បាននិយាយនៅក្នុងសេចក្តីថ្លែងការណ៍មួយថា “សរីរាង្គកណ្តុរមួយត្រូវបានផលិតនៅក្នុងសត្វកណ្តុរជាច្រើន ហើយសរីរាង្គកណ្តុរជាច្រើនត្រូវបានផលិតចំពោះកណ្តុរជាច្រើនហូរហែ ប៉ុន្តែការប៉ុនប៉ងពីមុនៗដើម្បីបណ្តុះសរីរាង្គមនុស្សលើសត្វជ្រូក មិនបានទទួលជោគជ័យទេ”។
“វិធីសាស្ត្ររបស់យើងបានធ្វើឱ្យប្រសើរឡើងនូវការរួមបញ្ចូលកោសិកាមនុស្សទៅក្នុងជាលិកាអ្នកទទួលនិងអនុញ្ញាតឱ្យយើងបណ្តុះសរីរាង្គមនុស្សនៅក្នុងខ្លួនជ្រូក”។
នេះគឺជាវិធីសាស្ត្រផ្សេងគ្នាចំពោះរបកគំហើញដ៏ល្បីនាពេលថ្មីៗនេះនៅក្នុងសហរដ្ឋអាម៉េរិក ជាកន្លែងដែលក្រលៀនជ្រូក ដែលបានកែហ្សែនរួច និងសូម្បីតែបេះដូងជ្រូកដែលកែហ្សែនរួច ត្រូវបានដាក់នៅក្នុងខ្លួនមនុស្ស។
លោក ឌូស្កូ អ៊ីលីក (Dusko Ilic) សាស្ត្រាចារ្យផ្នែកវិទ្យាសាស្ត្រកោសិកាដើមនៅសាកលវិទ្យាល័យ King’s College London បាននិយាយថា ឯកសារថ្មីនេះ “ពណ៌នាអំពីជំហានត្រួសត្រាយក្នុងវិធីសាស្ត្រថ្មីនៃជីវវិស្វកម្មសរីរាង្គ ដោយប្រើប្រាស់សត្វជ្រូកជាកន្លែងភ្ញាស់សម្រាប់ការលូតលាស់និងការបណ្តុះសរីរាង្គមនុស្ស”។
លោកអ៊ីលីកបានក្រើនរំលឹកថា វានឹងមានឧបសគ្គជាច្រើនក្នុងការប្រែក្លាយការពិសោធន៍ទៅជាដំណោះស្រាយដែលអាចសម្រេចបាន ប៉ុន្តែ “ទោះជាយ៉ាងណាក៏ដោយ យុទ្ធសាស្ត្រដ៏គួរឱ្យទាក់ទាញនេះបានធានាដល់ការរុករកបន្ថែមទៀតនាពេលអនាគត”៕
អ្នកស្រាវជ្រាវមកពីវិទ្យាស្ថានជីវវេជ្ជសាស្ត្រនិងសុខភាពក្វាងចូវបណ្តុះក្រលៀនដែលមានកោសិកាមនុស្សនៅក្នុងអំប្រ៊ីយ៉ុងជ្រូក