ប្រែសម្រួល : កញ្ញាដាលីស (ស្ត្រេតថែមស៍) ៖ សត្វឆ្កែអនាថារាប់រយក្បាល ដែលដើរតាមដងផ្លូវនៃរដ្ឋធានីដែលីរបស់ឥណ្ឌា កំពុងត្រូវបានអាជ្ញាធរបង្ក្រាបនិងផ្លាស់ទៅជម្រកថ្មីនៅមុនការបើកកិច្ចប្រជុំកំពូល G-20 នៅចុងសប្តាហ៍នេះ នេះបើយោងតាមសកម្មជនសត្វនិងសាក្សីរបស់ទីភ្នាក់ងារសារព័ត៌មានរ៉យទ័រ។
អាជ្ញាធរបានបោសសម្អាតតំបន់អនាធិបតេយ្យជាច្រើនក្នុងទីក្រុងរួចហើយ ហើយបានដាក់រូបសត្វសំពោចក្រដាសទំហំប៉ុនមនុស្សដើម្បីបន្លាចសត្វស្វាឱ្យចេញឆ្ងាយពីទីសាធារណៈនៅមុនកិច្ចប្រជុំនេះ។
កិច្ចប្រជុំកំពូល G20 ដែលជាការប្រមូលផ្តុំមេដឹកនាំពិភពលោកដ៏ធំបំផុតមិនធ្លាប់មាននៅក្នុងរដ្ឋធានីឥណ្ឌា នឹងមានការចូលរួមពីប្រធានាធិបតីអាម៉េរិក ចូ បៃដិន នាយករដ្ឋមន្ត្រីអង់គ្លេស រីស៊ី ស៊ូណាក់ ព្រះអង្គម្ចាស់អារ៉ាប៊ីសាអូឌីត ម៉ូហាម៉េត ប៊ីន សាល់ម៉ាន់ នាយករដ្ឋមន្ត្រីកាណាដា ចាស្ទីន ទ្រូដូ និងនាយករដ្ឋមន្ត្រីជប៉ុន ហ្វ៊ូមីអូ គីស៊ីដា ក្នុងចំណោមមេដឹកនាំដទៃទៀត។
សាជីវកម្មក្រុងដែលី (MCD) មិនបានផ្សារភ្ជាប់ដោយផ្ទាល់នូវការប្រមូលឆ្កែអនាថាទៅនឹងកិច្ចប្រជុំកំពូលនេះទេ ដោយបញ្ជាក់ថា សត្វអនាថាទាំងនេះកំពុងត្រូវបានប្រមូលចេញជាបន្ទាន់តែប៉ុណ្ណោះ។ទោះយ៉ាងណា រថយន្តសង្គ្រោះ ដែលទីភ្នាក់ងារសារព័ត៌មានរ៉យទ័របានឃើញប្រើសម្រាប់ប្រមូលឆ្កែអនាថានោះ បានបង្ហាញផ្ទាំងបដាសរសេរថា “បំពេញកាតព្វកិច្ច G-20″។
យោងតាមទិន្នន័យរបស់រដ្ឋាភិបាល ទឹកដីរដ្ឋធានីជាតិដែលីមានសត្វឆ្កែអនាថាជាង ៦០.០០០ ក្បាល។ ប្រជាជន២០លាននាក់របស់ក្រុងដេល្លីបានឃើញឆ្កែអនាថាឡើងស៊ាំភ្នែកទៅហើយ ប៉ុន្តែករណីឆ្កែខាំមនុស្សមិនមែនជារឿងចម្លែកនោះទេ។
ក្នុងខែសីហា MCD បានចេញបញ្ជាឱ្យប្រមូលឆ្កែអនាថាចេញ “ពីតំបន់ជុំវិញទីតាំងក្បែរកិច្ចប្រជុំកំពូល G-20” ប៉ុន្តែបានដកបញ្ជានេះចេញវិញនៅពីរថ្ងៃក្រោយ បន្ទាប់ពីមានការរិះគន់។
សកម្មជនសត្វនិយាយថា ក្រោយមកស្ថាប័នរដ្ឋនេះបានចាប់ផ្តើមចាប់សត្វឆ្កែអនាថា “តាមរបៀបអមនុស្សធម៌” កាលពីសប្តាហ៍មុន ដោយមិនប្រើវិធីសាស្ត្រដូចជា “ការបោះសំណាញ់ឬចាប់ដោយដៃ” ដែលត្រូវបានកំណត់ដោយអនុសាសន៍នោះទេ។
ក្រុមសកម្មជនបាននិយាយថា សត្វឆ្កែជិត ១.០០០ ក្បាលត្រូវបានប្រមូលមកទល់ពេលនេះពីតំបន់ដូចជាអាកាសយានដ្ឋាននិងកន្លែងប្រជុំ G-20៕
ឆ្កែរាប់រយក្បាលត្រូវអាជ្ញាធរក្រុងដេល្លីប្រមូលចេញពីម្តុំទីតាំងប្រជុំ G20