ប្រែសម្រួលៈបំណង(ស្ត្រេតថែមស៍)៖ មជ្ឈមណ្ឌលហិរញ្ញវត្ថុអាស៊ីគឺក្រុងហុងកុងបានជន់លិចដោយការធ្លាក់ភ្លៀងខ្លាំងបំផុតដែលគេមិនដែលធ្លាប់ឃើញនៅ១៤០ឆ្នាំមកនេះ ដោយបណ្តាលអោយរបួសមនុស្ស៨៣នាក់ នៅពេលអាកាសធាតុមិនធម្មតាបង្កឡើងដោយព្យុះជាច្រើនក៏វាយប្រហារចិនខាងត្បូងផងដែរ។
វីដេអូបង្ហាញទឹកធ្លាក់ចុះពីជំរាលកូនភ្នំនៅអតីតដែនដីអាណានិគមអង់គ្លេសនេះ នាំអោយផ្លូវនានាត្រូវទឹកលិចត្រឹមចង្កេះ ជន់លិចផ្សារ ស្ថានីយផ្លូវរថភ្លើងនិងផ្លូវរថយន្តក្រោមដី។
អាកាសធាតុអាក្រក់នេះក៏បង្កភាពវឹកវរនៅទីក្រុងសិនចិនរបស់ចិនដែលជាមជ្ឈមណ្ឌលបច្ចេកវិទ្យាដែលមានមនុស្ស១៧,៧លាននាក់រស់នៅ ដោយស្ថាប័នជំនួញនិងផ្លូវគមនាគមន៍នៅទូទាំងទីក្រុងរងគ្រោះធ្ងន់ធ្ងរ។
ការធ្លាក់ភ្លៀងដូចហែកមេឃនាំមកដោយព្យុះហាយគូអ៊ី(Haikui)ដែលបានបក់ចូលដីគោកចិនក្នុងខេត្តហ្វ៊ូជាន(Fujian)កាលពីថ្ងៃអង្គារ។ទោះជាយ៉ាងណាវាបានចុះខ្សោយទៅជាវិសម្ពាធត្រូពិចដោយនាំដុំពពកនិងភ្លៀងទៅលើតំបន់ដែលនៅជោគជាំដោយព្យុះមួយទៀតកាលពីមួយសប្តាហ៍មុននៅឡើយ។
ការិយាល័យអាកាសធាតុហុងកុងបានចេញការព្រមានអំពីព្យុះភ្លៀងកំរិតខ្ពស់បំផុត និងថាភ្លៀងកំពស់ជាង២០០មីលីម៉ែត្រូវបានកត់ត្រាឃើញនៅកោះធំរបស់ហុងកុង សង្កាត់កូវលូន(Kowloon)និងប៉ែកឦសាននៃដែនដីថ្មីចាប់ពីយប់ថ្ងៃព្រហស្បតិ៍មក។
មេដឹកនាំហុងកុង លោក ចន លី(John Lee)បាននិយាយថាលោកមានការព្រួយបារម្ភជាខ្លាំងអំពីការជន់លិចធ្ងន់ធ្ងរនៅផ្នែកជាច្រើននៃទឹកដីហុងកុង និងបានណែនាំទៅកាន់នាយកដ្ឋានទាំងអស់អោយឆ្លើយតបអស់ពីសមត្ថភាព។
អាជ្ញាធរហុងកុងនៅថ្ងៃសុក្រនេះបានបិទសាលារៀននិងប្រាប់បុគ្គលិកនិយោជិតអោយនៅផ្ទះនៅពេលផ្សារហ៊ុនមិនបានបើកទេ។រថភ្លើងខ្លះបានផ្អាកដំណើរការនិងខ្លះទៀតពន្យារពេលចេញដំណើរ នៅពេលវីដេអូមួយបង្ហាញអ្នកដំណើរដើរលុយទឹកត្រឹមចង្កេះនៅស្ថានីយមួយ។
ផ្លូវក្រោយដីមួយត្រូវទឹកហូរចូលពេញ ហើយផ្សារមួយលិចទឹកជាន់ក្រោម។
ការធ្លាក់ភ្លៀងនៅទីក្រុងសិនចិនក្នុងរយៈពេល១២ម៉ោងមានកំពស់៥៦៥,៥មីលីម៉ែត្រ ជាការធ្លាក់ភ្លៀងខ្លាំងបំផុតគិតចាប់តាំងពីឆ្នាំ១៩៥២។
ក្នុងពេលជាមួយគ្នា វីដេអូបង្ហាញតំបន់ចេញចូលស្ថានីយរថភ្លើងក្រុងសិនចិនត្រូវជន់លិច ដោយរថភ្លើងពីទីក្រុងនេះទៅកាន់ក្រុងក្វាងចូវត្រូវផ្អាក។មនុស្សប្រមាណ១០០នាក់ជាប់នៅស្ថានីយ។
ខេត្តក្វាងទុងនិងតំបន់ហ្កាងស៊ីក្បែរនោះក៏រំពឹងថានឹងជួនការធ្លាក់ភ្លៀងខ្លាំងបំផុតនៅពីរបីថ្ងៃទៅមុខ៕
ទឹកភ្លៀងនាំអោយលិចផ្លូវនិងផ្ទះជាន់ក្រោមនៅហុងកុង
