ដោយៈសុផល/ភ្នំពេញ៖កម្ពុជានឹងធ្វើជាម្ចាស់ផ្ទះប្រឡងចម្រៀងរ៉េបចំណាត់ថ្នាក់លេខ១ក្នុងតំបន់អាស៊ីអាគ្នេយ៍ ដែលតារាចម្រៀបរ៉េប លោក វណ្ណដា និង លោក ជូវីលីន ធ្វើជាគណៈកម្មការវិនិច្ឆ័យសមត្ថភាពបេក្ខជន។
កម្មវិធីប្រឡងចម្រៀងរ៉េបនេះនឹងធ្វើការចាក់ផ្សាយវគ្គដំបូងនៅ ថ្ងៃ អាទិត្យ ទី១៧ ខែ កញ្ញា ឆ្នាំ ២០២៣ លើកញ្ចក់ទូរទស្សន៍បាយ័នវេលារាត្រី ចាប់ពីម៉ោង ៩ ដល់ ១០:៣០នាទី ។ការប្រឡងនេះមានចំនួនសរុប ១៣វគ្គ និងចាក់ផ្សាយជារៀងរាល់ ថ្ងៃអាទិត្យ។
នៅក្នុងសន្និសីទសារពត៌មានកាលពីរសៀលថ្ងៃទី៧ខែកញ្ញានៅផ្សារទំនើបអ៊ីអនម៉ល៣ កម្មវិធីបានប្រកាសពីមនុស្សសំខាន់ៗនិងគណៈកម្មការវិនិច្ឆ័យ។គណៈកម្មការ២រូប ដែលត្រូវបានស្គាល់ថាជាផលិតករ នៃកម្មវិធីប្រឡងចម្រៀងរ៉េបគឺ កំពូលសិល្បករ លោក វណ្ណដា (ផលិតកម្មបារមី) និង លោក ជូវីលីន (ផលិតកម្មបារមី) រួមជាមួយក្រុមគ្រូបង្វឹក (Coach)ដែលសុទ្ធតែជាតារាចម្រៀងរ៉េមានទេពកោសល្យនិងកេរ្តិ៍ឈ្មោះបោះសំឡេងក្នុងវិស័យតន្ត្រីដូចជា៖ លោក Khmer1Jivit, លោក Norith (ផលិតកម្មបារមី), លោក Kingchi (CG Movement), លោក Ruthko (Klap Ya Handz) រីឯ តារាចម្រៀងរ៉េប លោក វិន វិទូ (ផលិតកម្មក្លាបយ៉ាហ៊ែន) និង កញ្ញាវ៉ាន់នីឡានឹងដើរតួនាទីជាពិធីករពិធីការនីក្នុងកម្មវិធី។
The Rapper’’ កម្មវិធីប្រឡងចម្រៀងរ៉េបដ៏កំពុងមានប្រជាប្រិយភាពដែលមានដើមកំណើតចេញពីប្រទេសថៃ (The Rapper)ហើយត្រូវបានទិញសិទ្ធយកទៅផលិតក្នុងប្រទេសវៀតណាម។ទាំង The Rapper ថៃ និងវៀតណាមគឺជាកម្មវិធីប្រឡងចម្រៀងរ៉េបដែលទទួលការពេញ និយមទស្សនាជាប់ចំណាត់ថ្នាក់លេខ១ក្នុងប្រទេសហើយបានបង្កើតធនធានតារាចម្រៀងរ៉េដែលមានសមត្ថភាពនិងទេពកោសល្យជាច្រើនដូចជា៖Milli, Tlinh, Autta, MaiyaRap, Saran, Diamond MQT, NameMT រួមទាំងតារាចម្រៀងរ៉េបផ្សេងៗជាច្រើនរូបទៀត។
តាមរយៈសន្និសីទសារពត៌មានបានឱ្យដឹងថា The Rapper Cambodia ផ្តោតសំខាន់ទៅលើការស្វែងរកបេក្ខជនដែលមានទេពកោសល្យជំនាន់ថ្មី
ក្នុងព្រះរាជាណាចក្រកម្ពុជាដើម្បីផ្តល់ឱកាសក៏ដូចជាឆាកវេទិកាបញ្ចេញសមត្ថភាពច្រៀងរ៉េប សមត្ថភាពក្នុងការលេងពាក្យសម្តីរួចសរសេរដាក់ចូលក្នុងអត្ថបទចម្រៀងរបស់ខ្លួនយកទៅច្រៀងរ៉េបឱ្យទស្សនិកជនជ្រួតជ្រាប។ ដើម្បីចូលរួមការប្រឡង បេក្ខជនទាំងអស់ ឬហៅថា Rappers ត្រូវតែមានអាយុចាប់ពី ១៨ឆ្នាំឡើង ហើយមានសមត្ថភាព និងទេពកោសល្យខ្ពស់ក្នុងការនិពន្ធ និងច្រៀងរ៉េបដើម្បីទាក់ទាញចិត្ត ចំណាប់អារម្មណ៍ ការស្ងើចសរសើរពី គណៈកម្មការទាំង២រូប និងទស្សនិកជនដែលកំពុងទស្សនា តាមរយៈការជួយជ្រុមជ្រែង បង្ហាត់ណែនាំពី គ្រូបង្វឹកម្នាក់ក្នុងចំណោម៤រូប។ បេក្ខជនដែលជាម្ចាស់ជ័យលាភីនៃកម្មវិធីនឹងទទួលបានប្រាក់រង្វាន់៤០លានរៀល ($10,000 US Dollars) ក៏ដូចជាឱកាសចាប់ផ្តើមអាជីពជាតារាចម្រៀងរ៉េប ការចូលរួមសម្តែងផ្សេងៗនាពេលអនាគត។
កម្មវិធីប្រឡងចម្រៀងរ៉េបនេះនឹងធ្វើការចាក់ផ្សាយវគ្គដំបូងលើកញ្ចក់ទូរទស្សន៍បាយ័ន ថ្ងៃ អាទិត្យ ទី ១៧ ខែ កញ្ញា ឆ្នាំ ២០២៣ វេលារាត្រី ចាប់ពីម៉ោង៩ ដល់ ម៉ោង១០:៣០នាទី រីឯវគ្គបន្តបន្ទាប់នឹងចាក់ផ្សាយជារៀងរាល់ ថ្ងៃ អាទិត្យ រហូតដល់ ថ្ងៃទី ១៧ ខែ ធ្នូ ឆ្នាំ ២០២៣។ សម្រាប់វគ្គចុងបញ្ចប់រដូវកាលទី១នឹងមានធ្វើការចាក់ផ្សាយបន្តផ្ទាល់ពីឆាកវេទិកាប្រឡងក្នុងរាជធានីភ្នំពេញដែលមានមហាជនច្រើនកុះកររង់ចាំទស្សនា។ រាល់ព័ត៌មាននានាទាក់ទងនឹងវគ្គចុងបញ្ចប់នឹងត្រូវផ្សព្វផ្សាយតាមពេលក្រោយ។
ភាគីចូលរួមចំណែកក្នុងការផលិតកម្មវិធី The Rapper Cambodia
The Rapper Cambodia ត្រូវបានផលិតដោយផលិតកម្មបារមីរួមសហការជាមួយភ្លើងគប់។The Rapper Cambodia ត្រូវបានឧបត្ថម្ភ ផ្តាច់មុខដោយក្រុមហ៊ុនស្រាបៀរហនុមានដែលជាក្រុមហ៊ុនស្រាបៀរទទួលបាននូវការពេញនិយមឈានមុខគេក្នុងព្រះរាជាណាចក្រកម្ពុជាហើយក៏ជាក្រុមហ៊ុនដែលស្រលាញ់ចូលរួមលើកស្ទួយវិស័យសិល្បៈចម្រៀងរ៉េបនៃកម្មវិធីThe Rapper Cambodia យ៉ាងមានមោទកភាព ក្រៃលែង។
លោក ផនមុត ច័ន្ទឧត្តម តំណាងក្រុមហ៊ុនស្រាបៀរហនុមាន ប៊ែវើរីជីស និយាយនៅក្នុងសន្និសីទសារពត៌មានថា៖“ពួកយើងមានមោទកភាពក្រៃលែងដែលបានចូលរួមឧបត្ថម្ភកម្មវិធីដ៏ល្បីល្បាញ មានប្រជាប្រិយភាពក្នុងការចូលរួមជួយលើកស្ទួយភាពអស្ចារ្យនៃសិល្បករសិល្បការនីទាំងក្មេង ចាស់។ក្រុមហ៊ុនស្រាបៀរហនុមាន មានភាពជឿជាក់ក្នុងការវិនិយោគទៅលើសិល្បករជំនាន់ក្រោយដែលមានសមត្ថភាព និងទេពកោសល្យក្នុងការជួយឱ្យសិល្បៈវប្បធម៌ខ្មែររីកចម្រើនរុងរឿងល្បីសុះសាយគ្រប់ទិសទីគ្រប់សម័យកាលនាពេលអនាគត។”
កញ្ញា ឡរ៉ា ម៉ម នាយិកាប្រតិបត្តិCEO នៃផលិតកម្មបារមី ហើយក៏ជា ផលិតករប្រតិបត្តិ Executive Producer នៃកម្មវិធី The Rapper Cambodiaបានបង្ហើបឱ្យដឹងថា៖“ផលិតកម្មបារមីមានគោលជំហរក្នុងការធ្វើវិនិយោគទុនទៅលើការងារសិល្បៈខ្មែរក៏ដូចជាសិល្បករសិល្បការិនីខ្មែរហើយដែលសំខាន់បំផុតនោះគឺប្រជាជនខ្មែរដែលជាទស្សនិកជនដ៏ធំចម្បង។ពួកយើងតែងតែស្វះស្វែងរកការច្នៃប្រតិដ្ឋថ្មីៗដើម្បីលើកកម្ពស់កម្រិតនិងគុណភាពនៃសិល្បៈខ្មែរឱ្យកាន់តែខ្ពង់ខ្ពស់និងទាន់សម័យជានិច្ច។ពួកយើងបានឃើញភាពជោគជ័យក្នុងការបង្កើតពន្លកតារា ចម្រៀងរ៉េបថ្មីៗឱ្យរះឡើងយ៉ាងត្រចះត្រចង់របស់កម្មវិធី The Rapper ប្រទេសថៃ និង ប្រទេសវៀតណាមហើយពួកយើក៏មានគំនិតសុទិដ្ឋិនិយមខ្ពស់ថាវាក៏អាចកើតឡើងបានដូចគ្នាដែរក្នុងប្រទេសកម្ពុជា។ពួកយើងសូមសម្តែងការអរគុណយ៉ាងជ្រាលជ្រៅទៅកាន់ក្រុមហ៊ុនស្រាបៀរ ហនុមាន ដែលតែងតែចូលរួមសកម្មភាពគាំទ្រលើកស្ទួយកម្មវិធីសិល្បៈ និងវប្បធម៌ខ្មែរ។ ពួកយើងទាំងអស់គ្នាជឿជាក់ថាពួកយើងអាចមានសមត្ថភាពធ្វើការផ្លាស់ប្តូរវប្បធម៌ឱ្យកាន់តែល្អប្រសើរឡើង ហើយនឹងបន្តពង្រីកសក្តានុពលនៃប្រទេសកម្ពុជាឱ្យរុងរឿងថ្កើងថ្កានគ្រប់ទិសទី។”
លោក អែនឌ្រូ ម៉ម នាយកប្រតិបត្តិទីផ្សារ CMO នៃផលិតកម្មបារមី ក៏បានចូលរួមចំណែកក្នុងកម្មវិធី The Rapper Cambodia ផងដែរ ដោយមានតួនាទីជា នាយកប្រតិបត្តិ និងដឹកនាំសម្តែង Executive Producer។ លោកបានប្រាប់ថា៖“ពួកយើងមានអារម្មណ៍ថាកំពុងតែស្ថិតនៅក្នុងអន្តរកាលមួយដែលផលិតកម្មតន្ត្រីនានាក្នុងប្រទេសកម្ពុជាងាកមកចូលរួមសាមគ្គីគ្នាជាក្រុមតែមួយដើម្បីអភិវឌ្ឍវិស័យសិល្បៈតន្ត្រីខ្មែរឱ្យកាន់តែរីកធំធាត់ឡើង ជាពិសេសស្មារតី មនសិកា និងឧត្តមគតិក្នុងការជម្រុញលើកកម្ពស់ ឱ្យកាន់តែរុងរឿងខ្ពស់ត្រដែតឡើងដែលព្រឹត្តិការណ៍បែបនេះមិនដែលកើតមានឡើងពីមុនមកសោះ។ចាប់ផ្តើមពីផលិតកម្មបារមី បន្ទាប់មកផលិតកម្មCG Movementក្រោយមក KlapYaHandz ហើយរហូតដល់សូម្បីតែ កំពូលតារាចម្រៀងរ៉េបជើងចាស់ Legendary ខ្មែរមួយជីវិត ក៏ជិះយន្តហោះមកស្រុកខ្មែរដើម្បីចូលរួមព្រឹត្តិការណ៍ដ៏សែនអស្ចារ្យមួយនេះផងដែរ។ The Rapper Cambodia ឆ្លុះបញ្ចាំងឱ្យឃើញពីសមិទ្ធផលនៃការចូលរួមសហការផលិត និងការបោះជំហានទៅមុខនៃវិស័យតន្ត្រីកម្ពុជា។ពួកយើងបានស្រម៉ៃឃើញវិស័យតន្ត្រីមួយដែលសិល្បករមកពីគ្រប់ទិសទីអាចចូលមកចូលរួមបង្កើតបទចម្រៀងដ៏ពីរោះអស្ចារ្យទាំងទីផ្សារក្នុងប្រទេស និងទីផ្សារអន្តរជាតិ។”
កញ្ញា រិទ្ធី លម្អពេជ្រ ហៅ យ៉ូគិ ដែលជាអ្នកដឹកនាំ Director នៃកម្មវិធី The Rapper Cambodia និងជានាយិកាប្រតិបត្តិនៃផលិតកម្ម ភ្លើងគប់ បាននិយាយថា៖ “នៅពេលខ្ញុំថត ជួប ស្តាប់ បេក្ខជននានាមានប្រធានបទមួយបានលេចចេញឡើងនៅពីខាងមុនៃគោលបំណងផលិតកម្មវិធីនោះគឺក្តីសង្ឃឹម។ វាពុំមែនគ្រាន់តែជាក្តីសង្ឃឹមរៀងខ្លួនឡើយប៉ុន្តែវាគឺជាក្តីសង្ឃឹមនៃរបៀបដែលយើងបង្កើតសិល្បៈដែលជំរុញឱ្យមានការផ្លាស់ប្តូរជីវិត ផ្លាស់ប្តូរពិភពលោក។ ខ្ញុំមិនគិតថា ខ្ញុំធ្លាប់បានឃើញបេក្ខជនធ្វើការដាក់បន្ទាបខ្លួនចង់ដឹង ចង់រៀនចង់ចែករំលែករឿងផ្ទាល់ខ្លួនផ្សេងៗយ៉ាងមានមោទកភាពសម្បើមអស្ចារ្យជាពិសេសមោទកភាពជាតិខ្មែរហើយក៏មានរឿងរ៉ាវបេក្ខជនខ្លះនឹងធ្វើឱ្យទស្សនិកជនមានអារម្មណ៍ថាចាក់ដោត ញ័រទ្រូង ហូរទឹកភ្នែក អួលដើមករដោយមិនដឹងខ្លួន ដែលរឿងទាំងនេះអាចត្រលប់ជាថ្នាំព្យាបាលរបួសផ្លូវចិត្តរបស់ពួកគេទៅវិញ។ ខ្ញុំជឿថាកម្មវិធី The Rapper Cambodia នឹងធ្វើឱ្យរញ្ជួយញាប់ញ័រវិស័យសិល្បៈតន្ត្រីក្នុងព្រះរាជាណាចក្រកម្ពុជា ហើយវាក៏ចូលរួមចំណែកជួយលុបបំបាត់ផ្នត់គំនិតអវិជ្ជមានដែលប្រជាជនកម្ពុជាធ្លាប់មានចំពោះសិល្បៈចម្រៀង Hip Hop ផងដែរ។កម្មវិធីនេះនឹងបើកចំហរទ្វារថ្មីដើម្បីទទួលយកបណ្តាសំនៀងថ្មីៗពីគ្រប់តំបន់ក្នុងប្រទេស ហើយធ្វើការផ្លាស់ប្តូរផ្ទាំងទស្សនីយភាពក្នុងវិស័យតន្ត្រីកម្ពុជា។”
កំពូលតារាចម្រៀងរ៉េប និងជាផលិតករ លោក វណ្ណដា ដែលជាណៈកម្មការក្នុងកម្មវិធី នឹងមានតួនាទី វិនិច្ឆ័យសមត្ថភាព ប្រឹក្សាឱ្យយោបល់ ហើយក៏ជាតារានាំបណ្តាលចិត្តបេក្ខជនមកចូលរួមប្រឡងផងដែរ។
លោក វណ្ណដា នៅតែជាប់ជាកំពូលតារាចម្រៀងរ៉េបចំណាត់ថ្នាក់លេខមួយក្នុងប្រទេសកម្ពុជារាប់ចាប់តាំងពី ខែ មករា ឆ្នាំ ២០១៩ ជាមួយនឹងការចេញបទចម្រៀងក្រោមចំណងជើងថា “ជោរ J+O” ដែលបទនេះបានធ្វើឱ្យមានការផ្លាស់ប្តូរ និងទំនើបកម្មសិល្បៈតន្ត្រីខ្មែរយ៉ាងខ្លាំងក្លា។ ចាប់តាំងពីពេលនោះមក លោក វណ្ណដា ក្លាយជាសិល្បករដែលគ្រប់ប្រព័ន្ធផ្សព្វផ្សាយចាប់អារម្មណ៍និយាយពីគាត់ច្រើនខ្លាំងបំផុតនៅក្នុងប្រវត្តិសាស្ត្រតន្ត្រីកម្ពុជា ហើយរាល់បទចម្រៀងរបស់គាត់បានទទួលការពេញនិយមពីអ្នកគាំទ្រនិងអ្នកស្តាប់ពាសពេញពិភពលោក។
វណ្ណដា បាននិយាយថា៖ “ជំរាបសួរទាំងអស់គ្នា! ខ្ញុំពិតជាមានអារម្មណ៍ថារីករាយ និងសប្បាយចិត្តជាខ្លាំងដែលបានចូលរួមនៅក្នុងកម្មវិធី សន្និសីទសារព័ត៌មាននៅក្នុងថ្ងៃនេះ ក៏ដូចជាធ្វើជា Prodcuer នៅក្នុងកម្មវិធី The Rapper Cambodia ។ កាលពីខ្ញុំនៅតូចខ្ញុំនៅជាមួយគ្រួសារមួយដែលមានឱពុកម្ដាយគឺជាអ្នកលក់ដូង ហើយខ្ញុំត្រឹមជាក្មេងកោសដូងម្នាក់ប៉ុណ្ណោះ។ជីវិតវាហាក់ឆ្លងកាត់រឿងជាច្រើនទម្រាំអាចមកដល់ថ្ងៃនេះ។ ជាច្រើនឆ្នាំកន្លងមក ខ្ញុំនៅជាមួយបារមីឃើញថាពួកយើងបានធ្វើរឿងដែលអស្ចារ្យជាច្រើនសម្រាប់វិស័យចម្រៀង Rap និង HipHop នៅក្នុងប្រទេសកម្ពុជា របស់យើ់ង។ ខ្ញុំតែងតែប្រាប់ទៅដល់អ្នកសិល្បករជំនាន់ក្រោយថាយើងអាចចាប់ផ្ដើមក្ដីស្រមៃរបស់យើងបានគ្រប់ពេលវេលា ទោះបីជានៅក្នុងបន្ទប់គេងក៏យើងអាចចាប់យកឱកាសនៅក្នុងការរៀនសរសេរបទចម្រៀងកុំចាំរហូតទាល់តែអ្នទាំងអស់គ្នាមានពេល ប៉ុន្តែសូមចាប់ផ្ដើមពីឥលូវនេះ។ តាមចាប់ក្ដីស្រមៃរបស់អ្នក ដោយមានភាពជឿជាក់ទៅលើខ្លួនឯង មានភាពអត់ធ្មត់និងការតស៊ូព្យាយាម ហើយខ្ញុំជឿថាអ្នកអាចធ្វើវាបាន “You can be great without being greater than anybody else” បច្ចុប្បន្ននេះខ្ញុំឃើញថាក្មេងជំនាន់ក្រោយដែលពួកគាត់ពោរពេញទៅដោយសមត្ថភាព។ កាលពីខ្ញុំនៅក្មេងខ្ញុំធ្លាប់ប្រាប់ខ្លួនឯងថា ខ្ញុំមិនមានអ្វីនោះទេប៉ុន្តែខ្ញុំមានសម្លេង សម្លេងដែលខុសពីអ្នកដ៏ទៃ ហេតុនេះខ្ញុំត្រូវប្រើប្រាស់សម្លេងមួយនេះប្រកបដោយភាពត្រឹមត្រូវ សុចរិត និងមានទំនួលខុសត្រូវ។ ហើយនេះគឺជាគន្លឺះមួយក្នុងចាប់ផ្ដើមស្វែងរកក្ដីស្រមៃរបស់ខ្លួនឯង។”
រីឯលោក ជូវី លីន ដែលជាផលិតករនៃកម្មវិធីហើយក៏ជាតារាចម្រៀងប៉ុបដ៏ល្បីល្បាញមួយរូបមកពីក្រុមPolarix។លោកគឺជាសិល្បករពហុជំនាញដ៏ឆ្នើមក្នុង ការច្រៀង ដឹកនាំសម្តែងថតវីដេអូបញ្ចេញគំនិតច្នៃប្រតិដ្ឋផ្សេងៗ។លោកជូវីលីនមានស្នាដៃជួយផលិតកម្មបារមីឱ្យឈានរះខ្ពស់ឡើងលើឆាកអន្តរជាតិនានា គាត់មានបទពិសោធធ្វើការជា នាយកផ្នែកការដឹកនាំសម្តែងនិងបង្កើតគំនិតច្នៃប្រតិដ្ឋរយៈពេល៤ឆ្នាំជាង។
លោក ជូវីលីន មិនត្រឹមតែធ្លាប់ចេញបទចម្រៀងរ៉េបល្បីផ្ទុះខ្លាំងដូចជា៖“Japey” និង “ Follow Ma Dance” តែប៉ុណ្ណោះទេ ប៉ុន្តែគាត់ក៏ធ្លាប់កាន់ការងារខាងផ្នែក ច្នៃប្រឌិតមើលឃើញ Visual Innovation រាល់គ្រប់ស្នាដៃសិល្បៈស្អាតៗប្រណិតៗរបស់ផលិតកម្មបារមីទាំងអស់ហើយថែមទាំងធ្លាប់ដឹកនាំការថតសម្តែងវីដេអូបទចម្រៀងសិល្បករលំដាប់ខ្ពស់ដូចជា៖ “Bok Kalo” និង “Daddy Da & King។” លោក ជូវីលីន មិនត្រឹមតែមានជំនាញជាតារាចម្រៀងរ៉េប និងតារាចម្រៀងអាជីពនៅខាងមុខកាំមេរ៉ាតែប៉ុណ្ណោះទេនៅខាងក្រោយកាំមេរ៉ាលោកគឺជានាយកផ្នែកការដឹកនាំសម្តែងនិងបង្កើតគំនិតច្នៃប្រឌិតផងដែរ។
លោក ជូវីលីន បាននិយាយថា៖“សួស្ដី ជាដំបូងខ្ញុំបាទ ជូវី លីន សូមគោរពទៅដល់ថ្នាក់ដឹកនាំគ្រប់ជាន់ថ្នាក់នៃក្រុមហ៊ុន ហនុមាន ប៊ែវើរីជីស និងគ្រប់ផលិតកម្មដែលបានចូលរួមក្នុងការផលិតកម្មវិធី The Rapper Cambodia ឆ្លៀតឱកាសនេះខ្ញុំសូមណែនាំខ្លួនជាថ្មីម្ដងទៀតទៅកាន់ទស្សនិកជនដែលទស្សនាផ្ទាល់ និងតាមរយៈ Live ខ្ញុំបានចូលរួមផលិតនៅការងារសិល្បៈជាច្រើន ជាពិសេសនៅក្នុងការដឹកនាំ ចក្ខុវិស័យរបស់សិល្បករ សិល្បការិនីឱ្យចេញទៅក្លាយជារូបរាង ដោយការងារទាំងអស់នេះបានបង្រៀននិងបង្ហាញខ្ញុំឱ្យឃើញគ្រប់ជ្រុងជ្រោយនៃវិស័យសិល្បៈនៅប្រទេសខ្មែរយើង ហើយក៏សូមអរគុណទៅកាន់ The Rapper Cambodia ដែលបានជ្រើសរើសខ្ញុំធ្វើជា Producer មួយរូប ហើយនេះគឺជាឱកាសដែលអាចជួយឱ្យខ្ញុំសម្រេចបំណងមួយ ដែលតែងតែចង់ជម្រុញ បណ្ដុះបណ្ដាលនិងចែករំលែកទៅដល់សិល្បករ សិល្បការិនីជំនាន់ក្រោយនេះ។
ជាចុងក្រោយជូវីលីន សូមអញ្ជើញពូមីង បងប្អូនខ្មែរយើងទាំងអស់គ្នាចូលរួមទស្សនា ក៏ដូចជាជួយលើកដម្កើនវិស័យសិល្បៈ Hip Hop ឱ្យកុះករជានេះ ខ្ញុំហ៊ានធានាថាអ្នកទាំងអស់គ្នានឹងបានឃើញកម្មវិធីប្រលងរ៉េបដ៏អស្ចារ្យដំបូងបំផុតនៅប្រទេសខ្មែរព្រមទាំងបានឃើញសិល្បករ សិល្បការិនីដែលត្រៀមរះ ។ សូមអរគុណ!”
លោក Norith តារា RAP LYRICS បែបមនោសញ្ចេតនាមុខស្មើ និង New School មកពីក្រុម POLARIX នៃផលិតកម្មបារមីនិងជាគ្រូបង្វឹកក្នុងកម្មវិធីThe Rapper Cambodia ។លោក Norith បាននិយាយថា៖“ខ្ញុំមានអារម្មណ៏សប្បាយចិត្តខ្លាំងមែនទែនដែលមានឱកាសបាន ចូលរួមធ្វើជា Coach នៅក្នុងកម្មវិធី The Rapper Cambodia ជាលើកដំបូងហើយក៏ជាកិត្តិយសដែលបានធ្វើការជាមួយរៀមច្បងនិងសិល្បករដែលមកពីផលិតកម្មផ្សេងគ្នា យើងសហការគ្នាដើម្បីបើកទំព័រប្រវត្តិសាស្ត្រថ្មីមួយសម្រាប់វិស័យ Hip Hop ស្រុកខ្មែរខ្ញុំហ៊ានធានាថាកម្មវិធីនេះគឺនឹងមានគ្រប់រសជាតិ ទាំងផ្អែមជូរចត់ ល្វីង សប្បាយ កើតទុក្ខ រភើប ក៏ដូចជាមានរឿងជាច្រើនដែលទាំងអស់គ្នានឹងsurprise ហើយដូចទាំងអស់គ្នាដឹងហើយថា Coach នីមួយៗមានstyle ផ្សេងៗគ្នា បេក្ខជនយើងក៏ដូចគ្នាគាត់មានstyle ផ្សេងៗគ្នាចឹងរសជាតិនៃshow របស់យើងគឺនឹងមានខុសៗគ្នាដូច្នេះយើងរងចាំមើលទាំងអស់គ្នាថាតើបេក្ខជនមកពីកូនក្រុម coach មួយណាដែលនឹងក្លាយជាម្ចាស់ពាន។”
លោក KingChi តារា RAP ស្តេចចុងជួនរណ្តំចិត្តមកពី CG MOVEMENT និងជាគ្រូបង្វឹកក្នុងកម្មវិធីThe Rapper Cambodia។លោក KingChi បាននិយាយថា៖ “ក្នុងមានខ្ញុំជា Caoch មួយរូបនៅក្នុងកម្មវិធី The Rapper Cambodia នេះ សម្រាប់បេក្ខជនដែលត្រូវមកប្រឡង គឺខ្ញុំចង់ឃើញគាត់មានលក្ខណៈពិសេសៗដូចជាទីមួយ ពួកគាត់មានសមត្ថភាពក្នុងការចូលរួមប្រកួត ហើយក៏ដូចជាឆន្ទះ និងភាពអត់ធ្មត់ ហើយអ្វីដែលពិសេសមួយទៀត ខ្ញុំចង់ឃើញអ្វីដែលគាត់មាននៅក្នុងខ្លួន និង ភាពជឿជាក់លើខ្លួនឯងពីព្រោះកាលណាដែលពួកគាត់មានភាពជឿជាក់លើខ្លួនឯង នោះបេក្ខជនទាំងអស់នឹងអាចពុះពារគ្រប់ឧបសគ្គ និគ្រប់វិញ្ញាសារទាំងអស់។ កម្មវិធីប្រឡង The Rapper Cambodia នេះមិនមែនត្រឹមតែជាកម្មវិធីប្រលងស្វែងរកកំពូលតារាចម្រៀងរ៉េបប៉ុណ្ណោះទេ កម្មវិធីមួយនេះប្រៀបដូចជាថ្នាក់បណ្ដុះបណ្ដាល ថ្នាក់បង្រៀនក្នុងការរ៉េបទៅដល់បេក្ខជនគ្រប់រូប។ ហេតុនេះខ្ញុំចង់ឱ្យពួកគាត់ជឿជាក់លើខ្លួនឯង ហើយស្បាយយកសមត្ថភាពខ្លួនឯង ដើម្បីមកប្រឡងក្នុងកម្មវិធីមួយនេះ ឱ្យខ្ញុំជា Coach និង Producer ទាំងអស់ដុះខាតសមត្ថភាពបេក្ខជនទាំងអស់ឱ្យកាន់តែខ្លាំង។”
លោក RuthKo គឺជាតារាRap វ័យក្មេងអាចលែងគ្រប់រសជាតិមកពី KLAPYAHANDz និងជាគ្រូបង្វឹក ក្នុងកម្មវិធី The Rapper Cambodia ។ លោក Ruthko បាននិយាយថា៖ “ជាក់ស្តែងតាមរយៈកម្មវិធី The rapper Cambodia ខ្ញុំបានសង្កេតឃើញថាយុវជនយុវនារីខ្មែរយើងជាច្រើនពិតជាមានសមត្ថភាពក្នុងការនិពន្ធតាក់តែងចំរៀងមែន ដែលធ្វើឲ្យខ្ញុំក៍ដូចជា Coach និង Producerដទៃភ្ញាក់ផ្អើលនឹកស្មានមិនដល់ហើយមានមោទនភាព ដែលកូនខ្មែរមានទេពកោសល្យច្រើនបែបនេះ ជាពិសេសពួកគាត់មានគំនិតច្នៃប្រឌិតខ្ពស់ក្នុងការសរសេរប៉ារូល លេងពាក្យចុងជួន ហើយក៏ឃើញមានការបញ្ជូលនូវវប្បធម៌ខ្មែរបូកផ្សំជាមួយនិង Rap hip hop ដែលធ្វើឲ្យកាន់តែទាក់ទាញចិត្តទាក់ទាញអារម្មណ៍របស់អ្នកទស្សនាដោយមិនសរសើរមិនបានផងដែរ គឺខ្ញុំពិតជា Proud នឹងពួកគាត់មែនទែន។”
លោក Khmer1jivit គឺជាតារា RAP LEGENDARY និងជាគ្រូបង្វឹក ក្នុងកម្មវិធី The Rapper Cambodia ។ លោក Khmer1jivit បាននិយាយថា៖ “សំរាប់កាត្រៀមខ្លួនរបស់ខ្ញុំ គឺខ្ញុំមិនត្រឹមតែ ត្រៀមបង្វឹកបក្ខេជនកូនក្រុមខ្ញុំប៉ុនណោះទេគឺខ្ញុំត្រូវបង្វឹកខ្លួនខ្ញុំផងដែរដើម្បីធ្វើជាគ្រូបង្វឹក ដោយប្រើប្រាស់សមត្ថភាពនឹងជំនាញខ្ញុំទាំងប៉ុន្មានក្នុងកាផលិត rap music ក៍ដូចជាoriginal song ដល់បេក្ខជនយើង។ បើប្រៀបធៀបទៅhiphop ប្រទេសក្រៅ ខ្ញុំសុំត្រឹមនិយាយក្នុងប្រទេសអាស៊ីអាគ្នេយ៍ ព្រោះខាងលោកខាងលិចជាពិសេសសហរដ្ធអាមេរិក គឺជាទីកន្លែងនៃដើមកំណើតហីបហប់ស្រាប់ទៅហើយ ។ នៅអាសុីអាគ្នេយ៍ ហីបហប់ក្នុងប្រទេសកម្ពុជា គឺមានកាដើរក្រោយគេ តែមានល្បឿនជិតស្មើគេ គ្រាន់តែយើងនៅក្មេងខ្ចីបន្តិច ក្នុងកាផលិត នឹងកំរឹតយល់ដឹងអំសេរីភាពក្នុងការនិពន្ធ។”
សហផលិតករនៃកម្មវិធី The Rapper Cambodia
ផលិតកម្មបារមីគឺជាផលិតកម្មរៀបចំនិងដឹកនាំការប្រគំតន្ត្រីខ្នាតធំនិងផលិតកម្មឌីជីថលដែលមានគុណភាពខ្ពស់ចំណាត់ថ្នាក់លេខ១ក្នុងប្រទេសកម្ពុជាហើយក៏ជាទ្រនំរបស់តារាចម្រៀងលំដាប់ថ្នាក់អន្តរជាតិដូចជា៖Vannda, Sophia Kao, Vanthan, Polarix,ក្រុមតន្ត្រីទើបលេចចេញពន្លកLa Cima Cartelហើយនិងសិល្បករផ្សេងៗទៀត។ក្នុងរយៈពេល៥ឆ្នាំចុងក្រោយនេះផលិតកម្មបារមីបានធ្វើវឌ្ឍនភាពនិងទំនើបកម្មវប្បធម៌ខ្មែរជាមួយនឹងតន្ត្រី Hip Hop ហើយទទួលបាននូវភាពជោគជ័យធំៗដូចជា៖ បទចម្រៀង Time To Rise របស់លោក វណ្ណដាបានផ្ទុះយ៉ាងកក្រើកខ្លាំងលើឆាកអន្តរជាតិ ហើយនិងការប្រគំតន្ត្រីទេសចរណ៍សិល្បករទោល Solo Artist “ Skull Tour” ឆ្លងកាត់៥ខេត្តរាជធានី។ ផលិតកម្មបារមីបានជំនះឧបសគ្គក៏ដូចជាត្រួសត្រាយផ្លូវឱ្យសិល្បករខ្មែរធ្វើដំណើរទៅចូលរួមកម្មវិធីតន្ត្រីអន្តរជាតិល្បីៗមានប្រជាប្រិយភាពខ្លាំងនៅក្នុងតំបន់អាស៊ីអាគ្នេយ៍ដូចជា Big Mountain Music Festival, Wonderfruit, និង Maho Rasop Music Festival ក្នុងប្រទេសថៃ ថែមទាំង ASEAN Music Showcase នៅប្រទេសសិង្ហបុរីផងដែរ។
ភ្លើងគប់ គឺជាអង្គការមិនស្វែងរកប្រាក់កម្រៃ ដែលត្រូវបានបង្កើតនិងធ្វើប្រតិបត្តិការឡើងដោយ សិស្ស និសិត្សដែលស្រលាញ់សិល្បៈនិងមានគោលបំណងចង់ឱ្យសិល្បៈខ្មែរពីអតីតកាលរួសរានមានជីវិតឡើងវិញដោយធ្វើការរៀបចំបង្កើតព្រឹត្តិការណ៍សិល្បវប្បធម៌ដែលអាចរួបរួមប្រជាជនខ្មែរដែលកំពុងរស់នៅទាំងក្នុងមាតុប្រទេសនិងតាមបណ្តាប្រទេសនានាឱ្យជួយផ្សព្វផ្សាយបំផុសបំផុលសិល្បៈខ្មែរទៅកាន់ឆាកអន្តរជាតិផ្សេងៗពាសពេញពិភពលោក៕Ph
