ប្រែសម្រួល : កញ្ញាដាលីស (ស្ត្រេតថែមស៍) ៖ ប្រធានាធិបតីអាម៉េរិក លោក ចូ បៃដិន បាននិយាយថា ការគំរាមកំហែងតែមួយគត់ចំពោះអត្ថិភាពរបស់មនុស្សជាតិគឺការប្រែប្រួលអាកាសធាតុ ហើយថាសូម្បីតែជម្លោះនុយក្លេអ៊ែរក៏បង្កគ្រោះថ្នាក់មិនដូចវាដែរ។
លោកបៃដិនបាននិយាយកាលពីថ្ងៃអាទិត្យក្នុងអំឡុងសន្និសីទសារព័ត៌មាននៅទីក្រុងហាណូយប្រទេសវៀតណាមថា “ការគំរាមកំហែងតែមួយគត់ដែលមនុស្សជាតិប្រឈមមុខ ដែលវាជារឿងគួរភ័យខ្លាចជាងសង្គ្រាមនុយក្លេអ៊ែរទៀតនោះ គឺ ការឡើងកម្តៅផែនដី”។
លោកប្រធានាធិបតីបានបន្ថែមថា “យើងនឹងមានបញ្ហាពិតប្រាកដ” ប្រសិនបើនៅក្នុងមួយទសវត្សរ៍ក្រោយឬពីរទសវត្សរ៍ក្រោយ ការឡើងកម្តៅផែនដីមានលើសពី ១,៥ អង្សាសេ ដែលអ្នកវិទ្យាសាស្ត្រចាត់ទុកថាជាចំណុចកំពូលសម្រាប់ការបង្កើនឱកាសនៃព្រឹត្តិការណ៍អាកាសធាតុធ្ងន់ធ្ងរ។
លោកបៃដិនបានបន្តថា “គ្មានផ្លូវត្រឡប់ថយក្រោយនោះទេ។ ហើយដូច្នេះមានរឿងច្រើនណាស់ ដែលយើងអាចធ្វើបានក្នុងពេលឥឡូវនេះ”។
លោកបៃដិនបាននិយាយបែបនេះបន្ទាប់ពីកិច្ចប្រជុំកំពូល G20 នៅក្នុងប្រទេសឥណ្ឌា កន្លែងដែលក្រុមមេដឹកនាំបានយល់ព្រមចំពោះសកម្មភាពអាកាសធាតុជាបន្តបន្ទាប់ រួមទាំងការសន្យាបង្កើនសមត្ថភាពថាមពលកកើតឡើងវិញបីដងនៅចុងទសវត្សរ៍នេះ។
ការយកចិត្តទុកដាក់របស់ប្រធានាធិបតីក្នុងឆ្នាំ ២០២៣ ពេលខ្លះត្រូវបានចំណាយលើបញ្ហាអាកាសធាតុនិងគ្រោះមហន្តរាយអាកាសធាតុ រួមទាំងភ្លើងឆេះព្រៃដ៏សាហាវនៅកោះម៉ោអ៊ី (Maui)។
យោងតាមមជ្ឈមណ្ឌលជាតិសម្រាប់ព័ត៌មានបរិស្ថានរបស់សហរដ្ឋអាម៉េរិកបានឱ្យដឹងថា សហរដ្ឋអាម៉េរិកបានទទួលរងនូវព្រឹត្តិការណ៍អាកាសធាតុធ្ងន់ធ្ងរ ដែលបណ្តាលឱ្យខាត់បង់រាប់សិបពាន់លានដុល្លារក្នុងឆ្នាំ ២០២៣៕
លោកបៃដិននិយាយរឿងអាកាសធាតុក្នុងទស្សនកិច្ចនៅវៀតណាមកាលពីថ្ងៃអាទិត្យ