ប្រែសម្រួល : កញ្ញាដាលីស (ដេល្លីម៉េល) ៖ ក្រុមហ៊ុន Apple កាលពីថ្ងៃអង្គារ បានដាក់បង្ហាញ iPhone ជំនាន់ក្រោយរបស់ខ្លួន ដែលមានកាមេរ៉ាល្អជាងមុន ប្រព័ន្ធដំណើរការលឿនជាងមុន ប្រព័ន្ធសាកភ្លើងថ្មី (USB-C) និងការដំឡើងថ្លៃសម្រាប់ម៉ូដែលដែលពេញនិយមបំផុត។
ការដាក់បង្ហាញនៅទីស្នាក់ការកណ្តាលរបស់ក្រុមហ៊ុន Apple នៅទីក្រុងឃូភើទីណូ (Cupertino) រដ្ឋកាលីហ្វ័រញ៉ា បានកើតឡើង ខណៈដែលក្រុមហ៊ុនព្យាយាមស្តារការធ្លាក់ចុះបន្តិចបន្តួច ដែលបានឃើញការលក់ធ្លាក់ចុះពីឆ្នាំមុនក្នុងរយៈពេលបីត្រីមាសជាប់ៗគ្នា។ ការលក់ទន់ខ្សោយនេះគឺជាហេតុផលសំខាន់ដែលតម្លៃភាគហ៊ុនរបស់ក្រុមហ៊ុនApple បានធ្លាក់ចុះប្រហែល ១០% ចាប់តាំងពីពាក់កណ្តាលខែកក្កដា ដោយទម្លាក់តម្លៃទីផ្សាររបស់ក្រុមហ៊ុនក្រោមកម្រិត៣ ទ្រីលានដុល្លារ ដែលខ្លួនបានឈានដល់ជាលើកដំបូងនៅដើមរដូវក្តៅនេះ។
វិនិយោគិនទំនងជាមិនចាប់អារម្មណ៍នឹងអ្វីដែល Apple បានដាក់បង្ហាញកាលពីថ្ងៃអង្គារទេ។ ភាគហ៊ុនរបស់ក្រុមហ៊ុនបានធ្លាក់ចុះជិត ២% កាលពីថ្ងៃអង្គារ ដែលជាការធ្លាក់ចុះខ្លាំងធៀបនឹងសន្ទស្សន៍ទីផ្សារសំខាន់ៗ។
ដូចករណីរបស់ Apple និងក្រុមហ៊ុនផលិតស្មាតហ្វូនដទៃទៀតដែរ ម៉ូដែល iPhone 15 ទាំងបួនប្រភេទមិនបានធ្វើឱ្យមានការលោតផ្លោះខ្លាំងណាស់ណាក្នុងផ្នែកបច្ចេកវិជ្ជានោះទេ។ ប៉ុន្តែ Apple បានបន្ថែមរបស់ថ្មីៗគ្រប់គ្រាន់ដល់ម៉ូដែលកំពូលគឺត្រកូល iPhone 15 Pro Max ដើម្បីបង្កើនតម្លៃចាប់ផ្តើមរបស់ខ្លួន ១០០ ដុល្លារ ឬ ៩% ពីកំណែឆ្នាំមុន រហូតដល់ ១.២០០ ដុល្លារ។ ជាផ្នែកនៃតម្លៃគោលដែលខ្ពស់ជាងមុន iPhone 15 Pro Max ដែលថោកបំផុត នឹងផ្តល់ទំហំផ្ទុក ២៥៦ មេហ្គាបៃ ដោយកើនឡើងពី ១២៨ ជីហ្គាបៃសម្រាប់ iPhone 14 Pro Max ដែលមានតម្លៃទាបបំផុត។
ក្រុមហ៊ុន Apple បានរក្សាតម្លៃថេរសម្រាប់ទូរស័ព្ទដទៃ ដោយ iPhone 15 ធម្មតាលក់ក្នុងតម្លៃ ៨០០ ដុល្លារ iPhone 15 Plus តម្លៃ ៩០០ ដុល្លារ និង iPhone 15 Pro តម្លៃ ១.០០០ ដុល្លារ។
ទូរស័ព្ទទាំងបួនម៉ូដែលនឹងអាចទិញបានតាមហាងនៅថ្ងៃទី២២ កញ្ញា ដោយការបញ្ជាទិញជាមុនចាប់ផ្តើមនៅថ្ងៃសុក្រនេះ៕
iPhone ថ្មីមានរន្ធសាក USB-C
