ប្រែសម្រួលៈបំណង(ដេល្លីម៉េល)៖ការអំពាវនារសុំជំនួយគ្រាអាសន្នមួយត្រូវបានធ្វើឡើងដោយកាកបាទក្រហមអង់គ្លេសដើម្បីឆ្លើយតបទៅនឹងទឹកជំនន់មហាប្រល័យនៅលីប៊ី ដែលបានសម្លាប់មនុស្សរាប់ពាន់នាក់។
បុគ្គលិកគ្រាអាសន្នបានរកឃើញសាកសពជាង១.៥០០នាក់នៅក្នុងគំនរបាក់បែកនៃទីក្រុងឌែរណា( Derna)នៅលីប៊ីខាងកើត និងចំនួនមនុស្សស្លាប់នឹងកើនឡើងខ្លាំងខណៈមនុស្សប្រមាណ១០.០០០នាក់កំពុងបាត់ខ្លួនក្រោយទឹកជំនន់បណ្តាលមកពីការបាក់ទំនប់ទឹកបានវាយប្រហារភូមិនិងសហគមន៍ទាំងមូលៗដោយបញ្ចូនមនុស្សរាប់ពាន់នាក់ចូលក្នុងសមុទ្រ។
អ្នកនាំពាក្យក្រសួងមហាផ្ទៃភាគខាងកើតលីប៊ីបាននិយាយកាលពីថ្ងៃអង្គារថា ចំនួនមនុស្សស្លាប់នៅក្រុងឌែរណាតែមួយបានឡើងហួស៥.៣០០នាក់ ទោះជាយ៉ាងណាផ្នែករថយន្តពេទ្យក្រុងឌែរណាដាក់ចំនួនមនុស្សស្លាប់ក្នុងគ្រោះធម្មជាតិនេះចំនួន២.៣០០នាក់។
រីឆាត ប្លេវីត(Richard Blewitt)នាយកកាកបាទក្រហមអង់គ្លេស បាននិយាយថា«យើងដឹងថាអ្នករាល់គ្នាលំបាកនៅពេលឥឡូវ តែបើអាចសូមបរិច្ចាគមកមូលនិធិជំនួយគ្រាអាសន្នរបស់យើងដើម្បីប្រមូលលុយបន្ទាន់សំរាបន់ជនរងគ្រោះ»។
«អាទិភាពនៅពេលឥឡូវគឺស្វែងរកនិងជួយសង្គ្រោះដើម្បីជួយអាយុជីវិតមនុស្សអោយបានច្រើនតាមលទ្ធភាពដែលអាចធ្វើបាន។ជំនន់នៅលីប៊ីបង្កមហន្តរាយដល់កំរិតគួរអោយតក់ស្លុតបំផុតដោយរាប់ពាន់នាក់បានស្លាប់និងរាប់ពាន់ទៀតកំពុងបាត់ខ្លួន»។
លោកបានបន្តថា«កាកបាទក្រហមកំពុងឆ្លើយតប ដោយផ្តល់ជំនួយដំបូងដល់អ្នកត្រូវការ ស្វែងរកអ្នកបាត់ខ្លួននិងជួយអោយមានការជួបជុំគ្រួសារឡើងវិញ។ទោះជាយ៉ាងណា ស្ថានការណ៍គ្រោះថ្នាក់និងសោកសៅខ្លាំង ដោយអ្នកស្ម័ក្រចិត្តក្នុងក្រុមអឌ្ឍចន្ទក្រហមលីប៊ីបីនាក់បានបាត់បង់ជីវិតក្នុងពេលព្យាយាមជួយសង្គ្រោះអាយុជីវិតអ្នកដទៃ…»។
វាកើតឡើងតែប៉ុន្មានថ្ងៃបន្ទាប់ពីអង្គការនេះធ្វើការអំពាវនាវរកជំនួយសំរាប់ជនរងគ្រោះដោយរញ្ជួយដីនៅម៉ារ៉ុកដែលបានសម្លាប់មនុស្សជិត៣.០០០នាក់៕
ទិដ្ឋភាពក្រោយទឹកជំនន់នៅលីប៊ីខាងកើត ដែលបានសម្លាប់មនុស្សរាប់ពាន់នាក់