ដោយ៖ សុវណ្ណកុម្ភៈ / ភ្នំពេញ៖ ពេលនេះ កីឡាករ កីឡាការិនីជម្រើសជាតិប៉េតង់ កម្ពុជា បានទទួលបានមេដាយ ចំនួន ៣ គ្រឿង ក្នុងព្រឹត្តិការណ៍ជើងឯកប៉េតង់ពិភព លោក លើកទី៥០ ឆ្នាំ២០២៣ (World Petanque Championships 2023) នៅប្រទេសប៉េនីន ។
ការប្រកួតជើងឯកប៉េតង់ពិភពលោក ឆ្នាំ២០២៣ នៅប្រទេសបេនីន លើ ៥ វិញ្ញាសា ក្នុងនោះ មានវិញ្ញាសាបុរស ១នាក់ទល់១នាក់, វិញ្ញាសានារី ១នាក់ ទល់ ១នាក់, វិញ្ញាសាបុរស ២នាក់ ទល់ ២នាក់, វិញ្ញាសានារី ២នាក់ ទល់ ២នាក់ និង វិញ្ញាសាចម្រុះ បុរស ១នាក់ នារី ១នាក់។ ព្រឹត្តិការណ៍នេះ ចាប់ផ្ដើមពីថ្ងៃទី៨ ដល់ ១៧ ខែកញ្ញា។
កីឡាការិនី អ៊ុក ស្រីមុំ ទទួលបានមេដាយសំរឹទ្ធលើវិញ្ញាសានារី ១នាក់ទល់១នាក់ បន្ទាប់ពីបញ្ចប់ត្រឹមវគ្គពាក់កណ្ដាលផ្ដាច់ព្រ័ត្រ ទល់នឹងកីឡាការិនីអាល់ហ្សេរី។
ចំណែកលើវិញ្ញាសាបុរស ១នាក់ទល់១នាក់វិញ កីឡាករ ស៊ីន វង់ ទទួលបានមេដាយ សំរឹទ្ធ ១គ្រឿង ដោយឈានដល់ត្រឹមវគ្គពាក់កណ្ដាលផ្ដាច់ព្រ័ត្រ ពេលជួបកីឡាករទុយណេស៊ី។
លើវិញ្ញាសាវាយគូបុរស កីឡាករ ស៊ីន វង់ ដដែល និងកីឡាករ ថោង ឈឿន ទទួលបានមេដាយសំរឹទ្ធ ១គ្រឿង ដោយឈានដល់វគ្គពាក់កណ្ដាលផ្ដាច់ព្រ័ត្រ ដែលបានប្រកួតចាញ់ ក្រុមបារាំង៕ V / N
