ប្រែសម្រួល : កញ្ញាដាលីស (ដេល្លីម៉េល) ៖ ក្រុមហ៊ុន Sotheby’s បានប្រកាសកាលពីថ្ងៃព្រហស្បតិ៍ថា អាវរងាពណ៌ក្រហមដ៏ល្បី ដែលគ្រងដោយម្ចាស់ក្សត្រិយ៍ដាយអាណាភ្លាមៗបន្ទាប់ពីការភ្ជាប់ពាក្យជាមួយព្រះអង្គម្ចាស់ឆាល ដែលមានហ្វូងចៀមតូចៗជាជួរៗ ត្រូវបានដាក់លក់ដេញថ្លៃក្នុងតម្លៃ ១,១ លានដុល្លារបន្ទាប់ពីការដេញថ្លៃចុងក្រោយដ៏គួរឱ្យភ្ញាក់ផ្អើល។
ម្ចាស់ក្សត្រិយ៍ព្រះជន្ម ១៩ ឆ្នាំអង្គនេះបានគ្រងសម្លៀកបំពាក់ប៉ាក់ ដែលរួមរូបចៀមខ្មៅមួយក្បាលក្នុងចំណោមហ្វូងចៀមពណ៌សរាប់សិបក្បាល នៅក្នុងការប្រកួតកីឡាប្រណាំងសេះកាលពីខែមិថុនា ឆ្នាំ ១៩៨១ ក្នុងអំឡុងថ្ងៃដំបូងៗដ៏វិលវល់របស់ទ្រង់ក្នុងនាមជាញាតិវង្សអៀនប្រៀនមួយអង្គ។
អាវយឺត Black Sheep ដែលមានទ្រង់ទ្រាយបែបសប្បាយៗនេះ បានក្លាយជាសម្លៀកបំពាក់ដ៏ពេញនិយមបំផុតមួយ ដែលគ្រងដោយដាយអាណា ដែលមើលទៅហាក់ដូចជាប្រាប់ពីប្រផ្នូលដ៏លំបាករបស់ទ្រង់ក្នុងនាមជាសមាជិកនៃគ្រួសាររាជវង្សអង់គ្លេស។
សម្លៀកបំពាក់នេះលក់បាន ១,១ លានដុល្លារ ដែលរួមបញ្ចូលថ្លៃសេវានិងកម្រៃជើងសារ បន្ទាប់ពីមានការប្រជែងគ្នាយ៉ាងខ្លាំងក្លាពីសំណាក់អ្នកដេញថ្លៃតាមអ៊ីនធឺណិត។
ថ្លៃលក់បាននេះគឺច្រើនជាងការប៉ាន់ស្មានដំបូងរបស់ក្រុមហ៊ុន Sotheby ដែលមានចន្លោះពី ៥០.០០០ ទៅ ៨០.០០០ ដុល្លារ។
ដោយសារតែការដេញថ្លៃបន្តក្តៅគគុក ក្រុមហ៊ុនដេញថ្លៃបានពង្រីកការលក់ប៉ុន្មាននាទីបន្ថែម ដោយតម្លៃបានហក់ឡើងពី ១៩០.០០០ ដុល្លារដល់ ១,១ លានដុល្លារក្នុងរយៈពេល ១៥ នាទីចុងក្រោយ។
យោងតាមក្រុមហ៊ុន Sotheby’s វាគឺជាតម្លៃខ្ពស់បំផុតមិនធ្លាប់មាននៅក្នុងការដាក់ដេញថ្លៃសម្រាប់សម្លៀកបំពាក់ដែលជាកម្មសិទ្ធិរបស់ម្ចាស់ក្សត្រិយ៍ដាយអាណា ដោយវ៉ាដាច់រ៉ូប Infanta របស់ទ្រង់ ដែលបានលក់កាលពីខែមករាក្នុងតម្លៃ ៦០៤.៨០០ ដុល្លារ ក៏ដូចជាក្នុងនាមជាអាវរងាដ៏មានតម្លៃបំផុតដែលមិនធ្លាប់លក់នៅឯការដេញថ្លៃ៕
អាវរងា Black Sheepលក់បាន ១,១ លានដុល្លារ