ប្រែសម្រួលៈបំណង(ដេល្លីម៉េល,ដឹណេសិន)៖ ភិតា លីមចារឺនរ៉ាត បានលាឈប់ពីប្រធានគណបក្សកាវក្លៃ ឬឈានទៅមុខ(MFP)កាលពីថ្ងៃសុក្រទី១៥កញ្ញានៅពេលជាងបួនខែក្រោយគណបក្សរបស់លោកបានឈ្នះការបោះឆ្នោតសកលដ៏ភ្ញាក់ផ្អើល តែមិនអាចរកសម្លេងគាំទ្របានគ្រប់គ្រាន់ពីសមាជិកសភានិងព្រឹទ្ធសភាដើម្បីបង្កើតរដ្ឋាភិបាលថៃថ្មីមួយ។
ក្រោយដៃគូធំបំផុតលំដាប់ទីពីរក្នុងសម្ពន្ធភាពក្រោយការបោះឆ្នោត គឺបក្សភឿថៃបោះបង់ចោលខ្លួនហើយងាកមកចាប់ដៃជាមួយបណ្តាគណបក្សដែលមានទំនាក់ទំនងយោធាដើម្បីបង្កើតរដ្ឋាភិបាលចំរុះមួយ MFPឥឡូវក្លាយជាបក្សប្រឆាំងធំជាងគេ ហើយនៅតែជាក្រុមនយោបាយមានឥទ្ធិពល ដោយសារមានសម្លេងភាគច្រើនក្នុងសភានិងអ្នកគាំទ្រច្រើននៅក្រុងបាងកកនិងបណ្តាទីក្រុង។
ភិតា អាយុ៤៣ឆ្នាំ ដែលទទួលការសិក្សានៅសកលវិទ្យាល័យហាវឺដ ត្រូវសភាបដិសេធការប៉ុនប៉ងរបស់លោកពីរដង សំរាប់មុខតំណែងនាយករដ្ឋមន្ត្រី ដោយសារតែពួកព្រឹទ្ធសភាដែលតែងតាំងឡើងដោយយោធា រួមគ្នារារាំងមិនអោយបក្សMFPចូលកាន់អំណាចដោយសារតែគណបក្សក្មេងខ្ចីនេះប្រកាន់ជំហរកែទំរង់និងការប្រឆាំងច្បាប់ដ៏តឹងរ៉ឹងពេលស្តីពីការប្រមាថស្តេច។
លោកបាននិយាយបង្ហោះក្នុងហ្វេសប៊ុកថា « ខ្ញុំចង់អនុញ្ញាតអោយសមាជិកសភាដទៃទៀតទទួលតំណែងជាប្រធានបក្សប្រឆាំង តែទោះជានៅក្នុងទីតាំងណាក៏ដោយ ខ្ញុំនឹងនៅតែធ្វើការជាមួយបក្សកាវក្លៃនិងប្រជាជនអោយអស់ពីលទ្ធភាពរបស់ខ្ញុំ»។
ភិតា ដ៏មានប្រជាប្រិយភាពបានទទួលសម្លេងនាំមុខគេសំរាប់តំណែងនាយករដ្ឋមន្ត្រី ក្នុងការស្ទង់មតិនៅមុនការបោះឆ្នោត តែលោកប្រឈមបញ្ហាផ្លូវច្បាប់ជាច្រើនដែលបានធ្លាក់មកបន្តបន្ទាប់នៅពេលគណបក្សរបស់លោកឈ្នះឆ្នោតហើយលោកប៉ុនប៉ងចូលកាន់អំណាច។បច្ចុប្បន្នលោកត្រូវបានព្យួរអាសនៈសភាដោយសារជាប់បណ្តឹងមួយនៅតុលាការពាក់ព័ន្ធនឹងភាពស្របច្បាប់របស់លោកក្នុងការកាន់កាប់តំណែងសភា។ វាកើតចេញពីការចោទប្រកាន់មួយដែលថាលោកកាន់កាប់ភាគហ៊ុនក្នុងក្រុមហ៊ុនផ្សព្វផ្សាយមួយក្នុងពេលដាក់ពាក្យសុំឈរឈ្មោះជាសមាជិកសភា។
លោកភិតា បានបដិសេធថាមិនបានធ្វើខុស តែច្បាប់បោះឆ្នោតថៃហាមមិនអោយបេក្ខជនសភាណាម្នាក់មានភាគហ៊ុនឬបើកដំណើរការក្រុមហ៊ុនផ្សព្វផ្សាយទេ។
ភិតាបានសរសេរបង្ហោះថា «ខ្ញុំនឹងបន្តធ្វើការជាមួយMFPនិងពលរដ្ឋថៃជាមួយនឹងកម្លាំងពលំទាំងអស់របស់ខ្ញុំ ដើម្បីជំរុញការផ្លាស់ប្តូរដែលយើងសង្ឃឹមចង់បាន។MFPត្រូវតែដឹកនាំក្រុមប្រឆាំងនៅក្នុងសភាដើម្បីជំរុញការផ្លាស់ប្តូរនៅថៃ ដែលមិនមាននៅក្នុងគោលនយោបាយរដ្ឋាភិបាលថៃបច្ចុប្បន្ន»៕
ភិតា បាននិយាយថាលោកបង្ខំចិត្តលាឈប់ពីប្រធានបក្ស ក្រោយត្រូវតុលាការព្យូរអាសនៈសភារបស់លោក