ប្រែសម្រួល : កញ្ញាដាលីស (ដេល្លីម៉េល) ៖ ការិយាល័យរបស់ប្រធានាធិបតីតួកគីលោក រីស៊ីប ថាយយីប អឺដូហ្គាន បានឱ្យដឹងកាលពីថ្ងៃចន្ទថា ប្រធានាធិបតីតួកគីបានអំពាវនាវឱ្យលោក អេឡុន ម៉ាស់ ប្រធានក្រុមហ៊ុនផលិតរថយន្តអគ្គិសនី Tesla បង្កើតរោងចក្រនៅក្នុងប្រទេសតួកគីក្នុងអំឡុងកិច្ចប្រជុំនៅទីក្រុងញូវយ៉ក។
ការិយាល័យប្រធានាធិបតីតួកគីបានឱ្យដឹងថា លោកអឺដូហ្គាន ដែលកំពុងនៅសហរដ្ឋអាម៉េរិកដើម្បីចូលរួមមហាសន្និបាតអង្គការសហប្រជាជាតិ ក៏បានពិភាក្សាអំពីកិច្ចសហប្រតិបត្តិការដ៏មានសក្តានុពលរវាងក្រុមហ៊ុនរុករកអវកាសរបស់លោកម៉ាស់និងកម្មវិធីអវកាសរបស់តួកគីផងដែរ។
សេចក្តីថ្លែងការណ៍បាននិយាយថា លោកអឺដូហ្គានបានប្រាប់លោកម៉ាស់ថា តួកគីនឹងស្វាគមន៍កិច្ចសហប្រតិបត្តិការលើបញ្ញាសិប្បនិម្មិតនិងសេវាអ៊ីនធឺណិតតាមផ្កាយរណប Starlink របស់ក្រុមហ៊ុន SpaceX ។ លោកម៉ាស់បាននិយាយថា SpaceX ចង់ទទួលបានអាជ្ញាបណ្ណចាំបាច់ដើម្បីផ្តល់ជូន Starlink នៅក្នុងប្រទេសតួកគី។
រូបភាពនៃកិច្ចប្រជុំបានបង្ហាញថាលោកម៉ាស់បីកូនប្រុសម្នាក់របស់គាត់ នៅពេលគាត់និយាយជាមួយលោកអឺដូហ្គាន។
រដ្ឋមន្ត្រីក្រសួងឧស្សាហកម្មនិងបច្ចេកវិជ្ជាតួកគី លោក មេមេត ហ្វាទី កាសឺ (Mehmet Fatih Kacir) ដែលបានចូលរួមក្នុងកិច្ចប្រជុំនោះ បាននិយាយថា លោកម៉ាស់បានពណ៌នាប្រទេសតួកគីជា “បេក្ខជនដ៏សំខាន់បំផុតសម្រាប់ការវិនិយោគរបស់ក្រុមហ៊ុន Tesla”។
លោកបានបន្ថែមថា លោកម៉ាស់និងលោកអឺដូហ្គានក៏បានពិភាក្សាអំពីកម្មវិធីដ្រូនប្រដាប់អាវុធរបស់តួកគីផងដែរ៕
លោកម៉ាស់បីកូនជួបលោកអឺដូហ្គាននៅបុរីញូវយ៉កកាលពីថ្ងៃអាទិត្យ