ដោយបាយ័ន/សៀមរាប៖ ក្រោមកិច្ចសហការរវាងអាជ្ញាធរជាតិអប្សរា រដ្ឋបាលព្រៃឈើភ្នំពេញ និងអង្គការសម្ព័ន្ធមិត្តសត្វព្រៃ (Wildlife Alliance) បានដឹកជញ្ជូនសត្វឆ្មាដាវ(Leopard Cat) ញីមួយក្បាល ពីមជ្ឈមណ្ឌលសង្រ្គោះសត្វព្រៃភ្នំតាម៉ៅយកមកផ្សាំងក្នុងទ្រុង ដែលក្រុមការងារគម្រោង នឹងធ្វើដោះលែងចូលទៅក្នុងព្រៃធម្មជាតិនៃឧទ្យានអង្គនៅពេលខាងមុខ។
អាជ្ញាធរជាតិអប្សរាបានប្រកាសឱ្យដឹងលើបណ្តាញសង្គមហ្វេសប៊ុកផ្លូវការនៅថ្ងៃទី១៨ ខែកញ្ញាថា តាមរយៈគម្រោងដោះលែងសត្វព្រៃកន្លងមកគម្រោងនេះទទួលបានជោគជ័យ ក្នុងការដោះលែងសត្វព្រៃ ជាច្រើនប្រភេទចូលក្នុងព្រៃធម្មជាតិនៃឧទ្យានអង្គរ មានដូចជា សត្វទោចមកុដ(Pileated gibbon) ចំនួន១៥ក្បាល(កើតកូនបានចំនួន៧ក្បាល), សត្វឈ្លូស(Red muntjac) ចំនួនប្រាំមួយក្បាល ,សត្វស្វាព្រាម(Silvered langurs) ចំនួន១២ក្បាល, សត្វសំពោចក្រអូប(Common palm civets) ចំនួនប្រាំពីរក្បាល ,សត្វភេខ្លួនរលោង(Smooth-coated otter) ចំនួនប្រាំបីក្បាល(កើតកូនបានចំនួន៥ក្បាល) ,សត្វឆ្មាដាវ(Leopard Cat) ចំនួនពីរក្បាល ,កេងកងតូច(Oriental Pied Hornbill) ចំនួនប្រាំពីរក្បាល ,កេងកងធំ(Great Hornbill) ចំនួនប្រាំមួយក្បាល ,ព្វាំង(Wreathed Hornbill) ចំនួន៧ក្បាល សត្វក្ងោក(Peafowl) ចំនួន៩ក្បាល សត្វអន្សង(Common Water Monitor) ចំនួន១ក្បាល និងសត្វផ្សេងៗ មួយចំនួនទៀត ដែលមកដល់ឥឡូវសត្វទាំងអស់ នេះនៅតែមានវត្តមាន នៅទីនោះនៅឡើយ ក្រោមការយកចិត្តទុកដាក់តាមដាន និងថែទាំជាប្រចាំពីក្រុមការងារ។
ប្រភពដដែលបន្តថា ដើម្បីឱ្យសត្វព្រៃទាំងអស់បន្តវត្តមាននៅក្នុងព្រៃធម្មជាតិនៃឧទ្យានអង្គរយើង និងបង្កើនចំនួន បន្ថែមទៀត អាជ្ញាធរជាតិអប្សរា និងគម្រោងដោះលែងសត្វព្រៃក្នុងឧទ្យានអង្គរ សូមអំពាវនាវ ជូនសាធារណជន ភ្ញៀវជាតិ អន្តរជាតិ ជាពិសេសប្រជាពលរដ្ឋដែលរស់នៅតំបន់នោះ ចូលរួមថែរក្សាសត្វព្រៃទាំងនោះទាំងអស់គ្នា ជៀសវាងពេលប្រទះឃើញមានបំណងមិនល្អ បញ្ឈប់ការដាក់អន្ទាក់សត្វគ្រប់ប្រភេទ និងមេត្តាកុំផ្តល់ចំណីឱ្យសត្វទាំងនោះ៕សរន / N
