ប្រែសម្រួល : កញ្ញាដាលីស (ដេល្លីម៉េល) ៖ អ្នកការទូតកំពូលរបស់ចិនកាលពីថ្ងៃចន្ទបានចាប់ផ្តើមការពិគ្រោះយោបល់ផ្នែកសន្តិសុខជាមួយមន្ត្រីរុស្ស៊ី បន្ទាប់ពីកិច្ចពិភាក្សាកាលពីចុងសប្តាហ៍របស់គាត់ជាមួយទីប្រឹក្សាសន្តិសុខជាតិរបស់ប្រធានាធិបតីអាម៉េរិកចូ បៃដិននៅក្នុងប្រទេសម៉ាល់តា។
ក្រសួងការបរទេសចិនបាននិយាយនៅក្នុងសេចក្តីថ្លែងការណ៍ខ្លីមួយថា រដ្ឋមន្ត្រីការបរទេសលោក វ៉ាង យី ដែលក្នុងពេលដំណាលគ្នានេះកាន់តំណែងកំពូលគោលនយោបាយការបរទេសរបស់បក្សកុំម្មុយនីស្តដែរនោះនឹងស្ថិតនៅក្នុងប្រទេសរុស្ស៊ីរហូតដល់ថ្ងៃព្រហស្បតិ៍សម្រាប់ការពិគ្រោះយោបល់សន្តិសុខជាយុទ្ធសាស្ត្រ។
លោកវ៉ាងបានបើកកិច្ចពិភាក្សារបស់គាត់ជាមួយរដ្ឋមន្ត្រីការបរទេសរុស្ស៊ីលោក សឺហ្គេ ឡាវរ៉ូវ ដោយសាទរចំពោះ “កិច្ចសហប្រតិបត្តិការជាយុទ្ធសាស្ត្រ” រវាងប្រទេសទាំងពីរ និងការប្តេជ្ញាចិត្តរួមគ្នារបស់ពួកគេចំពោះ “ពិភពលោកពហុប៉ូល” និង “សណ្តាប់ធ្នាប់ពិភពលោកដែលកាន់តែយុត្តិធម៌” ជាពាក្យដែលរដ្ឋាភិបាលក្រុងមូស្គូនិងក្រុងប៉េកាំង ប្រើប្រាស់ដើម្បីពណ៌នាអំពីកិច្ចខិតខំប្រឹងប្រែងរបស់ខ្លួនដើម្បីទប់ទល់អំណាចត្រួតត្រារបស់អាម៉េរិកលើកិច្ចការពិភពលោក។
លោកវ៉ាងបាននិយាយថា “ចិននិងរុស្ស៊ីក្នុងនាមជាមហាអំណាចឈានមុខគេលើពិភពលោកនិងជាសមាជិកអចិន្ត្រៃយ៍នៃក្រុមប្រឹក្សាសន្តិសុខអង្គការសហប្រជាជាតិ ទទួលខុសត្រូវជាពិសេសក្នុងការរក្សាស្ថិរភាពជាយុទ្ធសាស្ត្រសកលនិងការអភិវឌ្ឍសកល។ ការដែលសកម្មភាពឯកតោភាគីរបស់ក្រុមអនុត្តរភាពនិងការប្រឈមមុខដាក់គ្នាក្នុងប្លុកកាន់តែហិង្សា វាកាន់តែមានសារៈសំខាន់សម្រាប់យើងក្នុងការតាមឱ្យទាន់កាលៈទេសៈ បង្ហាញពីស្មារតីនៃកាតព្វកិច្ចជាមហាអំណាច និង បំពេញកាតព្វកិច្ចអន្តរជាតិរបស់យើងបន្ថែមទៀត”។
លោកបានសង្កត់ធ្ងន់ថា កិច្ចសហប្រតិបត្តិការរុស្ស៊ី-ចិន “មិនត្រូវបានបែរទិសប្រឆាំងនរណាម្នាក់ឡើយ ហើយក៏មិនទទួលឥទ្ធិពលពីប្រទេសផ្សេងនោះដែរ”។
លោកឡាវរ៉ូវបានសង្កត់ធ្ងន់អំពី “សារៈសំខាន់នៃកិច្ចសហប្រតិបត្តិការរុស្ស៊ី-ចិនសម្រាប់ការធានាយុត្តិធម៌ក្នុងកិច្ចការពិភពលោក សម្រាប់ការធានាឱ្យមានតុល្យភាពនៃផលប្រយោជន៍នៅក្នុងដំណើរការដែលកំពុងអភិវឌ្ឍក្នុងទិសដៅផ្សេងៗគ្នា”។ លោកបានកត់សម្គាល់ថា រុស្ស៊ីនិងចិននឹងសម្របសម្រួលកិច្ចខិតខំប្រឹងប្រែងរបស់ពួកគេក្នុងអំឡុងមហាសន្និបាតអ.ស.បនៅសប្តាហ៍នេះនិងវេទិកាអន្តរជាតិផ្សេងទៀត។
អាម៉េរិកនិងចិនមិនស្របគ្នាលើសកម្មភាពយោធារបស់រុស្ស៊ីនៅអ៊ុយក្រែនទេ។ ចិនបានបដិសេធមិនកាន់ជើងភាគីនៅក្នុងជម្លោះ ដោយនិយាយថា ខណៈទឹកដីរបស់ប្រទេសមួយត្រូវតែគោរព លោកខាងលិចចាំបាច់ត្រូវពិចារណាពីកង្វល់សន្តិសុខរបស់រុស្ស៊ីអំពីការពង្រីកអង្គការណាតូ។ ចិនបានចោទអាម៉េរិកថាបានអូសបន្លាយការប្រយុទ្ធដោយការផ្តល់អាវុធដល់អ៊ុយក្រែន ជាគ្រឿងសព្វាវុធដែលអាម៉េរិកនិយាយថា រដ្ឋាភិបាលក្រុងគៀវត្រូវការដើម្បីប្រយុទ្ធប្រឆាំងនឹងរុស្ស៊ី៕
រដ្ឋមន្ត្រីការបរទេសចិនលោក វ៉ាង យី ជួបពិភាក្សាជាមួយសមភាគីរុស្ស៊ីនៅមូស្គូកាលពីថ្ងៃ១៨កញ្ញា