ប្រែសម្រួល : កញ្ញាដាលីស (ដេល្លីម៉េល) ៖ ហ្វូងអ្នកគាំទ្របាល់ទាត់អ៊ីរ៉ង់បានផ្តល់ការស្វាគមន៍យ៉ាងកក់ក្តៅចំពោះគ្រីស្ទាណូ រ៉ូណាល់ដូកាលពីថ្ងៃចន្ទ ខណៈដែលក្លិបអារ៉ាប៊ីសាអូឌីតរបស់គាត់បានមកដល់ទីក្រុងតេអេរ៉ង់សម្រាប់ការប្រកួតក្លិបទាំងក្នុងផ្ទះនិងក្រៅដីជាលើកដំបូងចាប់តាំងពីប្រទេសទាំងពីរបានបន្តទំនាក់ទំនងការទូតឡើងវិញ។
អ្នកគាំទ្របានស្រែកហៅឈ្មោះកីឡាករឆ្នើមប្រចាំឆ្នាំរបស់ព័រទុយហ្គាល់៥សម័យកាលដែលបានមកដល់ជាមួយមិត្តរួមក្រុម Al Nassr ដើម្បីប៉ះក្លិបអ៊ីរ៉ង់ Persepolis ក្នុងការប្រកួត Asian Champions League នៅថ្ងៃអង្គារ។
ការប្រកួតនេះនឹងក្លាយជាការប្រកួតលើកដំបូងចាប់តាំងពីរដ្ឋាភិបាលក្រុងតេអេរ៉ង់និងរីយ៉ាដឈានដល់កិច្ចព្រមព្រៀងដែលសម្របសម្រួលដោយចិនកាលពីខែមីនា។
ក្លិបមកពីប្រទេសទាំងពីរបានលេងតែការប្រកួតនៅលើទឹកដីអព្យាក្រឹតប៉ុណ្ណោះចាប់តាំងពីឆ្នាំ ២០១៦ នៅពេលដែលអារ៉ាប៊ីសាអូឌីតដែលកាន់និកាយស៊ុននីភាគច្រើននិងអ៊ីរ៉ង់ដែលកាន់និកាយស៊ីអ៊ីតភាគច្រើន បានផ្តាច់ទំនាក់ទំនងនឹងគ្នា។
នៅទីក្រុងតេអេរ៉ង់ ក្តីរំភើបបានហោះហើរពេញអាកាស ខណៈដែលអ្នកគាំទ្ររង់ចាំយ៉ាងអន្ទះសារដើម្បីមើលរ៉ូណាល់ដូ នៅពេលគាត់ចាកចេញពីអាកាសយានដ្ឋាន Imam Khomeini របស់អ៊ីរ៉ង់។
ហ្វូងអ្នកគាំទ្រដ៏ច្រើនកុះករបានតម្រង់ជួរតាមដងផ្លូវ ខណៈដែលរ៉ូណាល់ដូនិងក្រុមរបស់គាត់បានមកដល់សណ្ឋាគារក្នុងទីក្រុងដោយជិះតាមឡានក្រុង។
សម្រែកថា “រ៉ូណាល់ដូ រ៉ូណាល់ដូ!” ថែមទាំងបានជន់លិចចូលទៅក្នុងបន្ទប់ទទួលភ្ញៀវរបស់សណ្ឋាគារទៀតផង។
ផ្ទាំងប៉ាណូរូបភាពរ៉ូណាល់ដូបានផុសឡើងពាសពេញដងផ្លូវសំខាន់ៗក្នុងរដ្ឋធានីអ៊ីរ៉ង់ ដែលអមជាមួយពាក្យ “ស្វាគមន៍” ដែលសរសេរជាភាសាអារ៉ាប់ អង់គ្លេស និង ហ្វាស៊ី (Farsi)។
ណាវីដ បូហានីហ្វា (Navid Borhanifar) អាយុ ២៨ ឆ្នាំ ដែលជាអ្នកគាំទ្ររ៉ូណាល់ដូ បាននិយាយថា “ខ្ញុំគិតថាវានឹងក្លាយជាការប្រកួតដ៏ស្រស់ស្អាត ហើយនឹងមានក្តីរំភើបច្រើន។ វាពិតជារំភើបណាស់សម្រាប់ខ្ញុំ”។
គួរឱ្យស្តាយសម្រាប់អ្នកគាំទ្រ គ្មាននរណាម្នាក់នឹងត្រូវអនុញ្ញាតឱ្យចូលរួមការប្រកួតដែលនឹងធ្វើឡើងនៅកីឡដ្ឋាន Azadi ដ៏ធំសម្បើម ដែលអាចផ្ទុកមនុស្សបានរហូតដល់ ៩០.០០០ នាក់នោះទេ។
សហព័ន្ធកីឡាបាល់ទាត់អាស៊ីបានកំណត់ថា ការប្រកួតនេះត្រូវលេងដោយបិទទ្វារ ដែលជាការដាក់ទណ្ឌកម្មចំពោះការបង្ហោះតាមអ៊ីនធឺណិតដ៏ចម្រូងចម្រាសឆ្នាំ ២០២១ ដោយក្លិប Persepolis មុនពេលប្រកួតជាមួយក្លិបរបស់ឥណ្ឌា៕
រ៉ូណាល់ដូទទួលការស្វាគមន៍យ៉ាងកក់ក្តៅពេលមកដល់ទឹកដីអ៊ីរ៉ង់កាលពីថ្ងៃចន្ទ