ប្រែសម្រួល : កញ្ញាដាលីស (បាល់ទាត់) ៖ ខាងក្រោមនេះជាការប្រកួត ២ គូសម្រាំងក្នុងក្របខណ្ឌ UEFA Champions League វគ្គជម្រុះតាមពូល ជុំទី១ សម្រាប់ថ្ងៃអង្គារ។
– AC Milan vs Newcastle
* ក្រុម AC Milan របូតគ្រាប់បាល់ក្នុងការប្រកួតចំនួន ៨ ក្នុងចំណោម ១២ ប្រកួតនៅអឺរ៉ុបកាលពីរដូវកាលមុន។
* Newcastle រកបាន ៤ គ្រាប់ក្នុងចំណោម ៥ ប្រកួតដំបូងរបស់ពួកគេនៅរដូវកាលនេះ។
* Giroud រកបាន ៤ គ្រាប់ក្នុង ៤ ប្រកួតសម្រាប់ AC។
វាពិបាកក្នុងការគិតពីដំណាក់កាលប្រសើរជាងនេះទៀតណាស់សម្រាប់ Newcastle ដែលបានមកលេងការប្រកួត Champions League លើកដំបូងរបស់ពួកគេក្នុងរយៈពេល ២០ ឆ្នាំនៅទឹកដី San Siro ។ ខណៈដែលទឹកដី St James’ Park នឹងមានភាពកក្រើកក្នុងពីរបីសប្តាហ៍ខាងមុខសម្រាប់ការប្រកួតជាម្ចាស់ផ្ទះអឺរ៉ុបលើកដំបូងរបស់ពួកគេក្នុងរយៈពេលជាច្រើនឆ្នាំ ការធ្វើដំណើរទៅកាន់ទីក្រុង Milan នៅថ្ងៃអង្គារនេះប្រាកដជាឱកាសដ៏ពិសេសសម្រាប់ក្រុមរបស់លោក Eddie Howe ។
ជាការពិតណាស់ ក្រុមភ្ញៀវកំពុងធ្វើដំណើរទៅកាន់ទីក្រុង Milan ក្នុងគោលបំណងប្រកួតប្រជែង សូម្បីតែស្ថិតនៅក្នុងពូលដ៏លំបាកក៏ដោយ។ ក្រុមសារិកាព្រៃត្រូវបានគេទាយថាជាក្រុមលេខ២ដែលនឹងអាចរួចផុតពីពូលដែលមាន PSG និង Borussia Dortmund ផងដែរ។ ទោះជាយ៉ាងណាក៏ដោយ ការដាក់ក្រុមរបស់លោក Howe ក្នុងចំណោមក្រុមរំពឹងឆ្លងផុតពូលប្រហែលជាធ្វើរាងឆាប់បន្តិចហើយ ដោយសារក្រុម Milan ក៏មានប្រវត្តិឈ្នះពានអឺរ៉ុបដ៏អស្ចារ្យផងដែរ។
ក្រុមម្ចាស់ផ្ទះបានត្រឡប់ទៅដល់វគ្គពាក់កណ្តាលផ្តាច់ព្រ័ត្រនៃក្របខ័ណ្ឌ Champions League កាលពីរដូវកាលមុន ហើយកំណត់ត្រារបស់ពួកគេឆ្លងកាត់ដំណាក់កាលដំបូងៗនៃការប្រកួតប្រជែងគឺអស្ចារ្យណាស់។ ពួកគេត្រូវបានជម្រុះចេញពីវគ្គចែកពូលម្តងគត់ក្នុងចំណោមយុទ្ធនាការ Champions League ១៤ លើកចុងក្រោយរបស់ពួកគេ ដូច្នេះពួកគេមិនអាចមិនរាប់ចូលជាក្រុមរំពឹងឆ្លងផុតពូលនោះឡើយ។
AC មានកីឡាករបទពិសោធន៍ច្រើន ដែលដឹកនាំដោយកីឡាករ Olivier Giroud ។ ខ្សែប្រយុទ្ធសញ្ជាតិបារាំងរូបនេះបានស៊ុតបញ្ចូលទី៤គ្រាប់ក្នុងចំណោមការប្រកួត៤លើកចុងក្រោយរបស់គេសម្រាប់ក្រុម Milan។
ខ្សែប្រយុទ្ធរូបនេះបានស៊ុតបាល់បញ្ចូលទី ៥ គ្រាប់ក្នុង ៧ ប្រកួតសម្រាប់ Milan ក្នុងពេលឡើងដល់វគ្គ ៤ ក្រុមចុងក្រោយនៃក្របខ័ណ្ឌ Champions League ។ ជឿថារូបគេនឹងបន្តទម្រង់លេងដ៏ល្អទល់នឹងក្រុម Newcastle ដែលត្រូវបានរហែកជាចំរៀកដោយកីឡាករ Evan Ferguson និង Darwin Nunez រួចទៅហើយនៅរដូវកាលនេះ។
លទ្ធផលព្យាករណ៍ AC ឈ្នះ ២-១។
– Manchester City vs Crvena Zvezda
* ក្រុម Manchester City បានឈ្នះការប្រកួតក្នុងផ្ទះខ្លួនឯងទាំង ៦ ដងក្នុងក្របខ័ណ្ឌ Champions League កាលពីរដូវកាលមុន។
* ក្រុមមេឃខៀវបានរបូតគ្រាប់បាល់ក្នុងការប្រកួត៣លើកចុងក្រោយរបស់ពួកគេ។
* គ្រាប់បាល់ទាំង៣របស់ Julian Alvarez ក្នុងក្របខ័ណ្ឌ Champions League សម្រាប់ Man City គឺកើតឡើងក្នុងទឹកដីខ្លួនឯង។
Manchester City បានឈ្នះជើងឯក Champions League ជាលើកដំបូងរបស់ពួកគេកាលពីរដូវកាលមុន ដែលជាផ្នែកមួយនៃយុទ្ធនាការឈ្នះពានបីសម្រាប់ក្រុមរបស់លោក Pep Guardiola ហើយពួកគេបានចាប់ផ្តើមរដូវកាល ២០២៣/២៤ តាមរបៀបខ្លាំងក្លាដូចដើម ដោយឈ្នះការប្រកួត Premier League ទាំង៥របស់ពួកគេរហូតមកដល់បច្ចុប្បន្ន។
Man City បានទទួលជ័យជម្នះក្នុងការប្រកួតក្នុងផ្ទះទាំង៦លើករបស់ពួកគេនៅក្នុងក្របខ័ណ្ឌ Champions League កាលពីរដូវកាលមុន ហើយពួកគេមិនបានភ្លក្សរសជាតិចាញ់នៅឯទឹកដី Etihad ទេចាប់តាំងពីចាញ់ Lyon ២-១ នៅខែកញ្ញាឆ្នាំ ២០១៨។
ខណៈ Man City ឈ្នះញឹកញាប់ថ្មីៗនេះ ពួកគេមានទំនោររបូតគ្រាប់បាល់គ្រប់ពេលផងដែរ ខណៈដែលពួកគេមិនបានរក្សា Clean Sheet ក្នុងការប្រកួត៣លើកចុងក្រោយរបស់ពួកគេ។ ពួកគេក៏បានរបូតគ្រាប់បាល់ក្នុងការប្រកួតក្នុងផ្ទះចំនួន ២ លើកក្នុងចំណោម៣ប្រកួតរបស់ពួកគេក្នុងក្របខ័ណ្ឌ Champions League កាលពីរដូវកាលមុនផងដែរក្នុងដំណាក់កាលវគ្គចែកពូល។
ម្ចាស់ជើងឯកសែប៊ី Crvena Zvezda បានស៊ុតបញ្ចូលទីក្នុងការប្រកួតទាំង៧នៃការប្រកួតរបស់ពួកគេរហូតមកដល់ពេលនេះ ហើយពួកគេអាចមានឱកាសខ្ពស់ក្នុងការទម្លុះសំណាញ់ទីរបស់ Manchester City។
ខ្សែប្រយុទ្ធអាហ្សង់ទីន Julian Alvarez បានចាប់ផ្តើមការប្រកួត Premier League ទាំង ៥ របស់ Man City រហូតមកទល់ពេលនេះ ដោយស៊ុតបញ្ចូលទីបាន ២ គ្រាប់ ហើយរូបគេនឹងអាចរកផ្លូវស៊ុតចូល Crvena Zvezda ផងដែរ។
គ្រាប់បាល់ទាំង៣នៃការប្រកួត Champions League របស់ Alvarez កាលពីរដូវកាលមុនបានកើតឡើងនៅទឹកដី Etihad រួមទាំងការទទួលជ័យជម្នះក្នុងវគ្គចែកពូលលើក្រុម Sevilla និង Copenhagen ហើយរូបគេមានសមត្ថភាពក្នុងការបន្ថែមចំនួនគ្រាប់បាល់សរុបនៅពាក់កណ្តាលសប្តាហ៍នេះ។
លទ្ធផលព្យាករណ៍ Man City ឈ្នះ ៤-១៕
Man City រំពឹងឈ្នះម្ចាស់ជើងឯកសែប៊ី Crvena Zvezda