ប្រែសម្រួល : កញ្ញាដាលីស (ដេល្លីម៉េល) ៖ នាយករដ្ឋមន្ត្រីវៀតណាមលោក ផាំ មិញ ជិញ បានទៅទស្សនាទីស្នាក់ការកណ្តាលរបស់ក្រុមហ៊ុន Nvidia និង Synopsys ដោយលើកទឹកចិត្តពួកគេនិងក្រុមហ៊ុនបច្ចេកវិជ្ជាផ្សេងទៀតរបស់សហរដ្ឋអាម៉េរិកវិនិយោគបន្ថែមទៀតនៅក្នុងឧស្សាហកម្មបន្ទះឈីបរបស់ប្រទេសអាស៊ីអាគ្នេយ៍មួយនេះ។
សេចក្តីថ្លែងការណ៍របស់រដ្ឋាភិបាលបានដកស្រង់សម្តីលោកជិញ ដែលបានប្រាប់វេទិកាធុរកិច្ចបច្ចេកវិជ្ជានៅទីក្រុងសាន់ហ្វ្រាន់ស៊ីស្កូក្នុងអំឡុងដំណើរទស្សនកិច្ចរបស់គាត់ទៅកាន់សហរដ្ឋអាម៉េរិកថា “វៀតណាមមានឆន្ទៈក្នុងការបើកទ្វាររបស់ខ្លួនសម្រាប់អ្នកវិនិយោគទាំងអស់ដើម្បីវិនិយោគនិងធ្វើអាជីវកម្មនៅទីនោះ”។
ដំណើរទស្សនកិច្ចរបស់លោកជិញធ្វើឡើងបន្ទាប់ពីដំណើរទស្សនកិច្ចរបស់ប្រធានាធិបតីអាម៉េរិកចូ បៃដិនទៅកាន់ទីក្រុងហាណូយក្នុងខែនេះ ដែលក្នុងអំឡុងពេលនោះមេដឹកនាំទាំងពីរបានប្រកាសពីការធ្វើឱ្យប្រសើរឡើងនូវទំនាក់ទំនងទ្វេភាគីនិងផែនការធ្វើឱ្យស៊ីជម្រៅកិច្ចសហប្រតិបត្តិការលើវិស័យមួយចំនួនរួមមានបន្ទះឈីប AI និងរ៉ែសំខាន់ៗ។
សេចក្តីថ្លែងការណ៍បាននិយាយថា លោកជិញបានសន្យាជួយសម្រួលដល់ការវិនិយោគនាពេលអនាគតដោយក្រុមហ៊ុន Nvidia និង Synopsys ក្នុងប្រទេសវៀតណាម។
សេចក្តីថ្លែងការណ៍បានដកស្រង់សម្តីនាយកប្រតិបត្តិ Nvidia លោក ជេនសិន ហួង (Jensen Huang) ដោយបានប្រាប់លោកជិញថា “Nvidia ចង់សហការជាមួយវៀតណាមក្នុងវិស័យបន្ទះឈីប បច្ចេកវិជ្ជាព័ត៌មាន និងបញ្ញាសិប្បនិម្មិត”។
ក្រុមហ៊ុន Synopsys ដែលមានគម្រោងសាងសង់មជ្ឈមណ្ឌលរចនាបន្ទះឈីបនៅក្នុងប្រទេសវៀតណាមកាលពីថ្ងៃចន្ទ បានចុះហត្ថលេខាលើអនុស្សរណៈនៃការយោគយល់ជាមួយក្រសួងព័ត៌មាននិងជាមួយក្រសួងវិនិយោគរបស់វៀតណាម។
ក្រុមហ៊ុនផលិតបន្ទះឈីបរបស់អាម៉េរិក Intel មានរោងចក្រដ៏ធំបំផុតរបស់ខ្លួនសម្រាប់ការផ្គុំ វេចខ្ចប់ និងសាកល្បងបន្ទះឈីបនៅភាគខាងត្បូងប្រទេសវៀតណាម ខណៈដែលគូប្រជែង Amkor កំពុងសាងសង់រោងចក្រដ៏ធំមួយសម្រាប់ការផ្គុំនិងសាកល្បងឧបករណ៍បន្ទះឈីបនៅជិតទីក្រុងហាណូយ។
លោកចិញញកំពុងស្ថិតនៅសហរដ្ឋអាម៉េរិកសម្រាប់មហាសន្និបាតអង្គការសហប្រជាជាតិក្នុងសប្តាហ៍នេះ ដែលបន្ទាប់ពីនោះ លោកមានគម្រោងទៅបំពេញទស្សនកិច្ចនៅប្រទេសប្រេស៊ីល៕
លោកជិញជួបជាមួយនាយកប្រតិបត្តិ Nvidia លោក ជេនសិន ហួង (ឆ្វេង) កាលពីថ្ងៃចន្ទ