ប្រែសម្រួល : កញ្ញាដាលីស (ស្ត្រេតថែមស៍) ៖ បុរសម៉ាឡេស៊ីម្នាក់បានសន្សំកាក់៥០សេនរយៈពេល ៧ ឆ្នាំ ហើយឥឡូវអាចទិញ iPhone 14 ជាមួយប្រាក់សន្សំរបស់គាត់។
វីដេអូ TikTok ដែលបង្ហោះកាលពីថ្ងៃទី ១ ខែកញ្ញា បានបង្ហាញលោក មូហាម៉ាត់ ហាហ្វីស អាប់ឌុល ហាមីដ (Muhammad Hafiz Abdul Hamid) អាយុ ៣០ ឆ្នាំនៅក្នុងបន្ទប់របស់គាត់ជាមួយនឹងប៊ីដុងទឹក ១៩ លីត្រដែលពោរពេញទៅដោយកាក់។
គាត់បានសរសេរនៅក្នុងចំណងជើងវីដេអូថា “លទ្ធផលនៃការសន្សំប្រាំពីរឆ្នាំ។ Alhamdulillah (អរគុណព្រះជាម្ចាស់)”។
វីដេអូបានបង្ហាញឱ្យឃើញលោកហាហ្វីសនិងសមាជិកគ្រួសាររបស់គាត់ពីរបីនាក់កំពុងព្យាយាមចាក់កាក់ចេញពីប៊ីដុងទឹក ប៉ុន្តែមានតែពីរបីកាក់ប៉ុណ្ណោះដែលខ្ទាតចេញដោយសារតែរន្ធតូចចង្អៀតពេក។
ម្នាក់ក្នុងចំណោមពួកគេបន្ទាប់មកប្រើរណាដើម្បីកាត់ប៊ីដុងឱ្យចំហ។ វីដេអូនេះបានបញ្ចប់ជាមួយការតម្រៀងកាក់ ៥០ សេនជាជង់ៗយ៉ាងស្អាត។
លោកហាហ្វីសបាននិយាយថា គាត់ ប្រពន្ធគាត់ បងស្រី និងប្អូនថ្លៃរបស់គាត់ចំណាយពេលបីម៉ោងដើម្បីរាប់កាក់ ដែលមានតម្លៃដល់ទៅ ៥.៣៦០ រីងហ្គីត (១.១៤៤ ដុល្លារ) ដែលគាត់ប្រើដើម្បីទិញ iPhone 14៕
កាក់៥០សេនសរុបតម្លៃ ១.១៤៤ ដុល្លាររបស់លោកហាមីដ ត្រូវបានប្រើដើម្បីទិញ iPhone 14