កងពលតូចថ្មើរជើងលេខ៥១ យោធភូមិភាគទី៥ អបអរសាទរការចុះបញ្ជីចំពោះ រមណីយដ្ឋានប្រាសាទកោះកេរ ជាសម្បត្តិបេតិកភណ្ឌវប្បធម៌ពិភពលោក

ដោយៈ ភ្នំស្វាយ / បន្ទាយមានជ័យៈ ” ជយោ! ជយោ! ជយោ! អបអរសាទររមណីយ ដ្ឋានប្រាសាទកោះកេរ ត្រូវបានចុះក្នុងបញ្ជីបេតិកភ័ណ្ឌពិភពលោក របស់អង្គការយូ ណេស្កូ” ។ នេះជាសម្លេងជ័យឃោស ដែលបំពងឡើង ដោយនាយ នាយរង និងពលទាហាន នៅបញ្ជាការដ្ឋានកងពលតូចថ្មើរជើងលេខ៥១ នាស្រុកព្រះនេត្រព្រះ ខេត្តបន្ទាយមានជ័យ កាលពីព្រឹកថ្ងៃទី ២០ ខែកញ្ញា ឆ្នាំ២០២៣ នេះ។

សូមបញ្ជាក់ថា ថ្នាក់ដឹកនាំ នាយទាហាន នាយទាហានរង និងពលទាហាន កងពលតូចថ្មើរជើងលេខ៥១ យោធភូមិភាគទី៥ អបអរសាទរការចុះបញ្ជីចំពោះ រមណីយដ្ឋានប្រាសាទកោះកេរ ជាសម្បត្តិបេតិកភណ្ឌវប្បធម៌ពិភពលោក ដោយអង្គការ UNESCO គឺចុះបញ្ជីកាលពីថ្ងៃទី ១៧ ខែកញ្ញា ឆ្នាំ២០២៣ តាមរយៈសេចក្តី សម្រេច 45 COM 8B.8 នៅក្នុងសម័យប្រជុំលើកទី៤៥ របស់ខ្លួន នៅឯរដ្ឋធានីរីយ៉ាដ (Riyadh) ប្រទេសអារ៉ាប៊ីសាអ៊ូឌីត តាមសំណើរបស់ រាជរដ្ឋាភិបាលកម្ពុជា ។

ប្រាសាទបុរាណកោះកេរ មានទីតាំងស្ថិតនៅក្នុងភូមិស្រយ៉ង់ខាងជើង ឃុំស្រយ៉ង់ ស្រុកគូលែន ខេត្តព្រះវិហារ។

ដោយឡែក ទូទាំងខេត្តបន្ទាយមានជ័យ មានសាលាខេត្ត សាលាស្រុក ក្រុង ឃុំ សង្កាត់ គ្រឹះស្ថានសិក្សា វត្តអារាម វិហារឬស្នាក់ការនៃសាសនា ស្នងការដ្ឋាន បញ្ជាការដ្ឋាន អធិការដ្ឋាន ប៉ុស្តិ៍រដ្ឋបាលនគរបាល កាលពីម៉ោង ៧ៈ០០ នាទី ព្រឹកថ្ងៃទី ២០ ខែកញ្ញា ឆ្នាំ២០២៣ បានធ្វើពិធីទូងស្គរ គោះរគាំង វាយជួង រោទិ៍កណ្តឹង គោះប៉ោតធុង ដើម្បីអបអរសាទរ ចំពោះរមណីយដ្ឋានប្រាសាទកោះកេរ ដែលត្រូវបានចុះបញ្ជី ដាក់បញ្ចូលជាសម្បត្តិបេតិកភណ្ឌវប្បធម៌ពិភពលោក នៃអង្គការយូណេស្កូ៕/V/r