ប្រែសម្រួលៈបំណង(CNA)៖ប្រធានាធិបតីចិនលោក ស៊ី ជីនពីង បានបើកការប្រកួតកីឡាអាស៊ី(Asian Games)លើកទី១៩កាលពីយប់ថ្ងៃសៅរ៍ទី២៣កញ្ញានៅទីក្រុងហាងចូវ ដោយពួកអ្នករៀបចំរំពឹងថាវានឹងជួយអោយអារម្មណ៍ភ្លឺថ្លាឡើងនៅក្នុងប្រជាជាតិមួយដែលកំពុងតស៊ូនឹងកំណើនសេដ្ឋកិច្ចស្ពឹក។
អ្នកចូលរួមនិងអ្នកទស្សនានៅក្នុងកីឡាដ្ឋានដែលអាចដាក់មនុស្សបាន៨០.០០០នាក់បានបញ្ចេញសម្លេងស្វាគមន៍កងរំពងនៅពេលលោកស៊ីត្រូវបានណែនាំនិងដើរចូលអង្គុយជាមួយឥស្សនរជន រួមមានប្រធានគណៈកម្មាធិការអូឡាំពិចអន្តរជាតិ លោក ថូម៉ាស បាច(Thomas Bach ) និងប្រធានាធិបតីស៊ីរី លោក បាសសា អាល់-អាសាដ។
ប្រធានាធិបតីស៊ី ជីនពីង និងជំទាវ ផឹង លីយូអាន ( Peng Liyuan )ចូលរួមពិធីបើកកីឡាអាស៊ីនៅក្រុងហាងចូវ កាលពីថ្ងៃ២៣កញ្ញា
តាមពិតការប្រកួតកីឡានេះត្រូវបានពន្យារពេលមួយឆ្នាំដោយសារតែ ចិនអនុវត្តវិធានការបិទខ្ទប់ប្រឆាំងនឹងជំងឺកូវីដ១៩ ។ឥឡូវវាជាព្រឹត្តិការណ៍កីឡាធំបំផុតរបស់ប្រទេសនៅរយៈពេលជាងមួយទសវត្សរ៍មកនេះ ជាមួយនឹងអត្តពលិកប្រមាណ១២.០០០នាក់ចូលរួមមកពី៤៥ប្រទេសសំរាប់វិញ្ញាសារកីឡា៤០ប្រភេទ។
ក្រោយការបង្ហូតទង់ជាតិចិន ក្រុមកីឡាដំបូងដែលចេញមកគឺអាហ្វហ្គានីស្ថាន ដោយអត្តពលលិកជាស្ត្រីស្ថិតនៅបរទេសដោយសារតែក្រុមតាលីបង់ហាមមិនអោយស្ត្រីលេងកីឡា។ពួកគេដើរជាមួយសហសេវិកជាបុរសរបស់គេ។
ក្រុមដទៃទៀត រួមមានចិនតៃប៉ិ ក៏ត្រូវបានស្វាគមន៍ជាមួយនឹងសម្លេងហ៊ោពីអ្នកទស្សនា តែគ្មានក្រុមជម្រើសជាតិណាទទួលបានការស្វាគមន៍ខ្លាំងដូចក្រុមម្ចាស់ផ្ទះ ដែលគេរំពឹងថានឹងទទួលបានមេដាយច្រើនជាងគេជាថ្មីក្នុងព្រឹត្តិការណ៍នេះ។
កីឡាការិនីចិនទទួលបានមេដាយមាសមុនគេនៅព្រឹកថ្ងៃអាទិត្យនេះក្នុងកីឡាអាស៊ីនៅងាហាងចូវ
ពិធីកាលពីយប់ថ្ងៃសៅរ៍ខុសគ្នាស្រឡះពីការបើកអូឡាំពិចរដូវរងារក្រុងប៉េកាំងកាលពីឆ្នាំ២០២២ដែលពេលនោះមិនបានអ្នកចូលរួមអបអរនិអតស្សនាទេ ដោយវាត្រូវធ្វើឡើងក្រោមលក្ខខណ្ឌកូវីដ១៩ដ៏តឹងរឹង។
អ្នកចូលរួមទស្សនាម្នាក់ឈ្មោះចាវ បាននិយាយថា« ខ្ញុំមានអារម្មណ៍រំភើបណាស់ ជាពិសេសក្នុងនាមជាអ្នកក្រុងហាងចូវម្នាក់។វាជាឳកាសធំណាស់ដើម្បីបង្ហាញពិភពលោកថាទីក្រុងនេះល្អស្អាតកំរិតណា…។វាត្រូវបានពន្យារពេលមួយឆ្នាំ តែបានទុកពេលអោយយើងរៀបចំបានកាន់តែល្អ»។
ពួកអ្នករៀបចំមិនបានបញ្ចេញអោយដឹងថាបានចំណាយលុយប៉ុន្មានសំរាប់កីឡានេះទេ តែរដ្ឋាភិបាលក្រុងហាងចូវ បាននិយាយថាខ្លួនបានចំណាយជាង២០០ពាន់លានយ័ន(៣០ពាន់លានដុល្លារ)នៅប្រាំឆ្នាំមកនេះទៅលើហេដ្ឋារចនាសម្ពន្ធ កីឡាដ្ឋាន និងទីតាំងផ្សេងៗ។ពួកអ្នករៀបចំសង្ឃឹមថាការបើកីឡាជាមួយនឹងការសម្ដែងរួមទាំងទស្សនីយភាពផ្សេងៗ តាមរយៈគ្រឿងបច្ចេកវិទ្យាជាន់ខ្ពស់នឹងជួយបង្កើនអារម្មណ៍រីករាយនៅក្នុងស្រុកចំពេលចិនជួបបញ្ហាប្រឈមសេដ្ឋកិច្ចខ្លះ៕
ទិដ្ឋភាពបើកកីឡាអាស៊ីកាលពីថ្ងៃ២៣កញ្ញានៅក្រុងហាងចូវ