ប្រែសម្រួលៈបំណង(ដេល្លីម៉េល)៖ ក្រសួងការបរទេសចិនបាននិយាយនៅថ្ងៃចន្ទថា កងឆ្នាំសមុទ្រចិនបានចាត់វិធានការចាំបាច់ស្របតាមច្បាប់ដើម្បីរារាំងនិងបណ្តេញនាវាហ្វីលីពីនមួយអោយចេញឆ្ងាយពីតំបន់ជម្លោះមួយនៅក្នុងសមុទ្រចិនខាងត្បូង។
អ្នកនាំពាក្យក្រសួងលោក វ៉ាង វិនពីន បាននិយាយដូច្នេះក្រោយពីហ្វីលីពីនកាលពីថ្ងៃអាទិត្យចោទប្រកាន់ចិនថា «ដាក់ខ្សែពោងបណ្តែត»នៅតំបន់ថ្មប៉ប្រះទឹកស្កាបូរូហ្វ សូល(Scarborough Shoal)ដើម្បីធ្វើជាបន្ទាត់ឃាំងមិនអោយហ្វីលីពីនចូលក្នុងតំបន់នោះ។
ពួកមន្ត្រីហ្វីលីពីននៅថ្ងៃចន្ទនេះបានប្តេជ្ញារើចេញពោងបណ្តែតរបស់កងឆ្មាំសមុទ្រចិននេះ។ពួកគេបាននិយាយថា ការដាក់ខ្សែឃាំងប្រវែង៣០០ម៉ែត្រនៅមាត់បឹងទឹកប្រៃនៅតំបន់Scarborough Shoal កាលពីថ្ងៃសុក្រជា«អំពើខុសច្បាប់» នាំអោយទូកនេសាទហ្វីលីពីនជាង៥០បានស្ថិតនៅក្រៅបឹងនេះពេលចិនព្យាយាមរារាំងមិនអោយចូល។
ទីប្រឹក្សាសន្តិសុខជាតិហ្វីលីពីន បាននិយាយថា« យើងថ្កោលទោសការដាក់របាំងនេះ។វារំលោភសិទ្ធិនេសាទរបស់អ្នកនេសាទរបស់យើង។យើងនឹងចាត់វិធានការសមស្របដើម្បីដកចេញរបាំងនិងការពារសិទ្ធិរបស់ប្រជានេសាទរបស់យើង»។
នៅទីក្រុងប៉េកាំងអ្នកនាំពាក្យក្រសួងការបរទេសចិនលោក វ៉ាង វិនពីន បាននិយាយថា តំបន់ថ្មប៉ប្រះទឹកនេះ«ស្ថិតក្នុងដែនអធិបតេយ្យភាពរបស់ចិន»។
អ្នកនាំពាក្យក្រសួងការបរទេសចិនលោក វ៉ាង វិនពីន
លោកបាននិយាយថា នាវានេសាទរបស់រដ្ឋាភិបាលហ្វីលីពីនបានបើកចូលដែនទឹកនេះដោយគ្មានសុំការអនុញ្ញាតពីចិនកាលពីថ្ងៃ២២កញ្ញា តែ«កងឆ្មាំសមុទ្រចិនបានចាត់វិធានការចាំបាច់ដើម្បីរារាំងនិងព្រមានអោយវាបើកចេញទៅឆ្ងាយស្របតាមច្បាប់ បែបវិជ្ជាជីវៈនិងជាមួយនឹងការអត់ធ្មត់»។
នាវានៃកងឆ្មាំសមុទ្រចិន ព្យាយាមពាំងផ្លូវរបស់ទូកផ្គត់ផ្គង់ហ្វីលីពីនមួយ ដែលបើកសំដៅទៅកាន់តំបន់ថ្មប៉ប្រះទឹក Second Thomas Shoalដែលក៏ជាតំបន់ប្រទាញប្រទង់គ្នាក្នុងសមុទ្រចិនខាងត្បូងកាលពីថ្ងៃ២២ សីហា២០២៣
ខ្សែពោងបណ្តែតដាក់ដោយកងឆ្មាំសមុទ្រចិនរារាំងមិនអោយទូកនេសាទហ្វីលីពីនចូលក្នុងបឹងទឹកប្រៃដ៏សំបូរត្រីនៅសមុទ្រចិនខាងត្បូង
សូមបញ្ជាក់ថាចិនអះអាងដែនទឹកស្ទើរទាំងស្រុងនៅសមុទ្រចិនខាងត្បូង ដោយជាន់លើតំបន់សេដ្ឋកិច្ចផ្តាច់មុខរបស់ហ្វីលីពីន វៀតណាម ម៉ាឡេស៊ីន ព្រុយណេនិងឥណ្ឌូនេស៊ី៕