ប្រែសម្រួល : កញ្ញាដាលីស (ដេល្លីម៉េល) ៖ ចៅក្រមញូវយ៉កបានសម្រេចកាលពីថ្ងៃអង្គារទី២៦កញ្ញាថា លោក ដូណាល់ ត្រាំ និងកូនប្រុសរបស់គាត់ អេរិក (Eric) និង ដុន ជូនៀ (Don Jr) បានប្រព្រឹត្តិអំពើឆបោក ដោយបំប៉ោងតម្លៃអចលនទ្រព្យនិងទ្រព្យសកម្មហិរញ្ញវត្ថុរបស់ក្រុមហ៊ុន Trump Organization អស់រយៈពេលជាច្រើនឆ្នាំ។
សេចក្តីសម្រេចរបស់ចៅក្រម អាធឺ អិនហ្គោរ៉ុន (Arthur Engoron) គឺជាបរាជ័យមួយសម្រាប់អតីតប្រធានាធិបតីរូបនេះ មុនពេលការកាត់ក្តីក្នុងសំណុំរឿងរដ្ឋប្បវេណីនេះ ដែលនឹងត្រូវចាប់ផ្តើមនៅថ្ងៃចន្ទក្រោយ និងជាជ័យជម្នះមួយផ្នែកសម្រាប់អគ្គរដ្ឋអាជ្ញានៃរដ្ឋញូវយ៉ក លោកស្រី ឡេទីធ្យា ជែមស៍ (Letitia James)។
លោកស្រីជែមស៍បានចោទប្រកាន់លោកត្រាំ កូនប្រុសច្បងពីរនាក់របស់គាត់ និងនាយកប្រតិបត្តិក្រុមហ៊ុន Trump Organization ផ្សេងទៀតថាបានកុហកអ្នកប្រមូលពន្ធ អ្នកផ្តល់ប្រាក់កម្ចី និងអ្នកធានារ៉ាប់រងជាច្រើនឆ្នាំនៅក្នុងគ្រោងការណ៍មួយ ដែលតែងតែបំប៉ោងតម្លៃអចលនទ្រព្យរបស់ពួកគេ។
មេធាវីរបស់លោកត្រាំបានស្នើឱ្យចៅក្រមទម្លាក់ចោលសំណុំរឿងនេះមុនការកាត់ក្តី ដោយផ្តល់អ្វីដែលគេស្គាល់ថាសាលក្រមសង្ខេបដោយអនុគ្រោះ។
ទោះជាយ៉ាងនេះក្តី លោកស្រីជែមស៍ក៏បានស្នើសុំឱ្យមានការកាត់ក្តីសង្ខេបផងដែរ ដោយស្វែងរកឱ្យឃើញថា លោកត្រាំមានកំហុស នៅមុនការកាត់ក្តី ហើយចៅក្រមឈរខាងអគ្គរដ្ឋអាជ្ញា។
ក្រៅពីការរកឃើញថា ត្រាំនិងកូនប្រុសរបស់គាត់បានប្រព្រឹត្តអំពើឆបោក ចៅក្រមក៏បានដកហូតអាជ្ញាបណ្ណអាជីវកម្ម ដែលអនុញ្ញាតឱ្យក្រុមហ៊ុន Trump Organization ដំណើរការអចលនទ្រព្យមួយចំនួននៅរដ្ឋញូវយ៉ករបស់ខ្លួនផងដែរ។
លោកស្រីជែមស៍កំពុងព្យាយាមទាមទារផាកពិន័យចំនួន ២៥០ លានដុល្លារ និង ដកត្រាំនិងកូនប្រុសរបស់គាត់ចេញពីការគ្រប់គ្រងចក្រភពបែបគ្រួសារ គឺ ក្រុមហ៊ុន Trump Organization។
លោកស្រីជែមស៍អះអាងថា ត្រាំនិងសហការីរបស់គាត់បានដាក់តួលេខ “បំប៉ោង” ទៅកាន់ធនាគារនិងក្រុមហ៊ុនធានារ៉ាប់រងជារៀងរាល់ឆ្នាំរវាងឆ្នាំ ២០១១ និង ២០២១ “ដើម្បីធានានិងរក្សាបានប្រាក់កម្ចីនិងការធានារ៉ាប់រងក្រោមលក្ខខណ្ឌអំណោយផលខ្ពស់”។
ពួកគេត្រូវបានចោទប្រកាន់ថាបានក្លែងបន្លំតម្លៃសុទ្ធនៃទ្រព្យសម្បត្តិរបស់ក្រុមហ៊ុន Trump Organization រាប់ពាន់លានដុល្លារ ជាហេតុនាំឱ្យមាន “ប្រាក់សន្សំនិងប្រាក់ចំណេញទុច្ចរិតរាប់រយលានដុល្លារ”។
លោកស្រីជែមស៍បានចោទប្រកាន់ថា ការវាយតម្លៃបំប៉ោងទ្រព្យសម្បត្តិរបស់លោកត្រាំគឺមានពីចន្លោះ ១,៩ ពាន់លានដុល្លារទៅ ៣,៦ ពាន់លានដុល្លារក្នុងមួយឆ្នាំ៕
ត្រាំសារភាពកំហុសអំពីការបំប៉ោងតម្លៃអចលនទ្រព្យ