ប្រែសម្រួល : កញ្ញាដាលីស (ស្ពុតនិក) ៖ កូរ៉េខាងត្បូងបានរៀបចំព្យុហយាត្រាយោធាដ៏ធំមួយនៅទីក្រុងសេអ៊ូលកាលពីថ្ងៃអង្គារទី២៦កញ្ញាដើម្បីឧទ្ទិសដល់ខួបលើកទី ៧៥ នៃការបង្កើតកងកម្លាំងប្រដាប់អាវុធរបស់ប្រទេស។ តើអាវុធប្រភេទណាខ្លះត្រូវបានបង្ហាញ? តើអាវុធប្រភេទណាដែលសម្ពន្ធមិត្តជាយុទ្ធសាស្ត្ររបស់អាម៉េរិកនេះផលិត និងនាំចេញ?
សាធារណរដ្ឋកូរ៉េ (កូរ៉េខាងត្បូង) បានប្រារព្ធពិធីព្យុហយាត្រាយោធាដ៏សំខាន់លើកដំបូងរបស់ខ្លួនក្នុងរយៈពេលមួយទស្សវត្សរ៍កាលពីថ្ងៃអង្គារ ដោយសម្ញែងសាច់ដុំយោធារបស់ខ្លួនចំពេលមានភាពតានតឹងកាន់តែខ្លាំងឡើងនៅឧបទ្វីបកូរ៉េ បន្ទាប់ពីការផ្តាច់ទំនាក់ទំនងការទូតផ្ទាល់ខ្លួនរវាងមេដឹកនាំនៅទីក្រុងព្យុងយ៉ាង សេអ៊ូល និងវ៉ាស៊ីនតោន បន្ទាប់ពីរដ្ឋបាលត្រាំនិងមូនចាកចេញពីការិយាល័យក្នុងឆ្នាំ ២០២១ និង ២០២២។
ទាហានប្រហែល ៦.០០០ នាក់ និងយោធូបករណ៍រហូតដល់ ២០០ គ្រឿងបានដង្ហែនិងបើកតាមដងផ្លូវនៃទីក្រុងសេអ៊ូល រួមទាំងរថក្រោះនិងរថយន្តចុះទឹកឡើងគោកបែបវាយប្រហារ ដ្រូន មីស៊ីល និងប្រព័ន្ធការពារដែនអាកាស ដែលភាគច្រើនផលិតដោយក្រុមហ៊ុនធំៗរបស់កូរ៉េខាងត្បូង ដែលអ្នកប្រហែលជាធ្លាប់ស្គាល់រួចហើយ។
– អាវុធនៅក្បួនដង្ហែ
ដូចរំពឹងទុកក្នុងឱកាសនៃខួបលើកទី ៧៥ នៃការបង្កើតយោធាកូរ៉េខាងត្បូង ក្បួនដង្ហែកាលពីថ្ងៃអង្គារនៅទីក្រុងសេអ៊ូលបានបង្ហាញនូវអាវុធនិងឧបករណ៍ចុងក្រោយបង្អស់របស់កូរ៉េខាងត្បូង រួមទាំងរថក្រោះស៊េរី K1A1/K1A2 និង K2 Black Panther ។ ផលិតដោយក្រុមហ៊ុន Hyundai Rotem ដាក់ឱ្យប្រើប្រាស់ក្នុងឆ្នាំ ២០១៤ និងត្រូវបានចាត់ទុកថាជារថក្រោះជំនាន់ទី ៤ ដំបូងគេក្នុងពិភពលោក រថក្រោះ K2 ត្រូវបាននាំចេញដោយជោគជ័យទៅកាន់ប្រទេសប៉ូឡូញ ដែលគ្រោងនឹងទិញរថក្រោះ K2 សរុបរហូតដល់ ១.០០០ គ្រឿង ជាមួយនឹងការប៉ាន់ស្មានថារថក្រោះនេះចំនួន ២៦០ គ្រឿងកំពុងបម្រើយោធាកូរ៉េខាងត្បូងនាពេលបច្ចុប្បន្នរួចហើយ។ រថក្រោះនេះមានកាណុងកាំភ្លើងញាត់គ្រាប់ទំហំ ១២០ មិល្លីម៉ែត្រដោយស្វ័យប្រវត្តិ ពាសដែកការពារកម្រិតខ្ពស់ និង សមត្ថភាពបាញ់ដោយស្វ័យប្រវត្តិប្រឆាំងនឹងគោលដៅលើដីនិងអាកាសនៅចម្ងាយរហូតដល់ ១០ គីឡូម៉ែត្រ ដោយប្រើកាមេរ៉ាកម្ដៅនៅលើរថក្រោះ។ រថក្រោះផ្ទុកមនុស្សបានបីនាក់និងមានទម្ងន់សរុប៥៥តោន។
រថពាសដែក Hansa Defence K21 Korea Next-generation Infantry Fighting Vehicles ឬ (KNIFVs) ក៏ឃើញបើកតាមដងផ្លូវដែលជោគជាំដោយទឹកភ្លៀងរបស់ទីក្រុងសេអ៊ូលកាលពីថ្ងៃអង្គារផងដែរ ដោយកូរ៉េខាងត្បូងមានរថពាសដែកបែបនេះប្រហែល ៥៥០ គ្រឿង ហើយអូស្ត្រាលីគ្រោងនឹងបញ្ជាទិញជិត ១៣០ គ្រឿងដើម្បីកែពួកវាទៅជារថពាសដែក IFV ក្នុងស្រុកដែលគេហៅថា Redback ។ IFV មានអ្នកបញ្ជាបីនាក់ អាចដឹកអ្នកដំណើរបាន៩នាក់ បើកបានចម្ងាយរហូតដល់ ៥០០ គីឡូម៉ែត្រ ដោយមិនចាំបាច់ចាក់ប្រេងឡើងវិញ និងបំពាក់នូវពាសដែកសេរ៉ាមិចដែលពង្រឹងដោយកញ្ចក់ហ្វៃបឺដ៏ទំនើប ដោយផ្តល់នូវការការពារប្រឆាំងនឹងអ្វីៗគ្រប់យ៉ាងចាប់ពីកាំភ្លើងយន្តធុនស្រាលរហូតដល់គ្រាប់កាំភ្លើងធំ។ រថពាសដែក K21 ក៏មានបំពាក់នូវកាំភ្លើងស្វ័យប្រវត្តិ ៤០ មិល្លីម៉ែត្រ កាំភ្លើងយន្ត M60 ៧,៦២ មិល្លីម៉ែត្រ និងកាំជ្រួចបញ្ជាទិសប្រឆាំងរថក្រោះ AT-1K Raybolt ភ្លោះផងដែរ។
កាំភ្លើងធំបាញ់ដោយខ្លួនឯង K9 Thunder ផលិតដោយក្រុមហ៊ុន Hanwha Aerospace ក៏បានបង្ហាញខ្លួនផងដែរ។ ប្រព័ន្ធកាំភ្លើងធំនេះជាង ១.៧០០ ត្រូវបានបង្កើតឡើងចាប់តាំងពីការដាក់ឱ្យប្រើប្រាស់នៅចុងទសវត្សរ៍ឆ្នាំ ១៩៩០ ជាមួយនឹងគ្រាប់ផ្លោង ១៥៥ មិល្លីម៉ែត្រដែលផលិតដោយក្រុមហ៊ុន Hyundai ដែលមានសមត្ថភាពបាញ់បានចម្ងាយពី ១៨ ទៅ ៦០ គីឡូម៉ែត្រ។ ប្រព័ន្ធនេះគឺជាជោគជ័យនៃការនាំចេញដ៏ធំបំផុតរបស់កូរ៉េខាងត្បូងរហូតមកទល់បច្ចុប្បន្ន ដោយប៉ូឡូញ ន័រវែស អេស្តូនី ហ្វាំងឡង់ តួកគី និងឥណ្ឌាបានទិញពួកវា ក៏ដូចជាអូស្ត្រាលី និងអេហ្ស៊ីបបានបញ្ជាក់ពីការបញ្ជាទិញផងដែរ។ ប្រទេសមួយចំនួនបានទិញវាដោយផ្ទាល់ពីកូរ៉េខាងត្បូង ដោយប្រទេសខ្លះទៀតទទួលបានអាជ្ញាបណ្ណផលិតបន្តពីក្រុមហ៊ុន Hanwha និងរដ្ឋាភិបាលក្រុងសេអ៊ូលទៀតផង។ រដ្ឋាភិបាលក្រុងវ៉ាសូវីត្រូវគេដឹងថាបានប្រគល់កាំភ្លើងធំចល័តផលិតដោយប៉ូឡូញ AHS Krab ប្រហែល ៥០ គ្រឿងទៅអ៊ុយក្រែន ដោយកងកម្លាំងរុស្ស៊ី តាមសេចក្តីរាយការណ៍ បានបំផ្លាញវាអស់ជាង ១០ គ្រឿង គិតត្រឹមចុងខែឧសភា ឆ្នាំ ២០២៣។
ប្រព័ន្ធរ៉ុក្កែត K239 Chunmoo ផលិតដោយក្រុមហ៊ុន Korea Defense Industry និងក្រុមហ៊ុន Hanwha Aerospace ក៏បានបង្ហាញខ្លួននៅឯក្បួនដង្ហែផងដែរ ដោយប្រព័ន្ធនេះមានសមត្ថភាពបាញ់គ្រាប់ផ្លោងទំហំ ១៣១-៦០០ មិល្លីម៉ែត្រនិងបាញ់បានចម្ងាយពី ៣៦ ទៅ ២៩០ គីឡូម៉ែត្រ ដោយមួយគ្រាប់គឺគ្រប់គ្រាន់សម្រាប់បំផ្លាញផ្ទៃដីទំហំស្មើនឹងទីលានបាល់ទាត់ចំនួនបី។ ប្រព័ន្ធនេះត្រូវបាននាំចេញទៅកាន់ប្រទេសអារ៉ាប់រួមអេមីរ៉ាត អារ៉ាប៊ីសាអូឌីត និងប៉ូឡូញ។
ប្រព័ន្ធកាំជ្រួចមីស៊ីលរយៈចម្ងាយមធ្យម KM-SAM Cheongung បានបង្ហាញខ្លួនយ៉ាងលេចធ្លោនៅក្នុងក្បួនដង្ហែផងដែរ។ ប្រព័ន្ធ SAM ដែលបង្កើតឡើងដោយទីភ្នាក់ងារកូរ៉េសម្រាប់ការអភិវឌ្ឍន៍ការពារជាតិ និងក្រុមហ៊ុន Almaz-Antey របស់រុស្ស៊ី និងផលិតដោយក្រុមហ៊ុនផលិតយន្តហោះកូរ៉េខាងត្បូង LIG Nex1 Co., Ltd. មានបំពាក់កាំជ្រួចការពារដែនអាកាសទម្ងន់ ៤០០ គីឡូក្រាម បាញ់បានរយៈចម្ងាយអតិបរមារហូតដល់ ៤០ គីឡូម៉ែត្រ ហោះបានកម្ពស់ ១៥-២០ គីឡូម៉ែត្រ និងល្បឿនប្រតិបត្តិការលឿនជាងសំឡេងកម្រិត Mach 4-5។
កាំជ្រួចមីស៊ីលយុទ្ធសាស្ត្រ Hyunmoo បាញ់ពីដីទៅដី ដែលត្រូវបានណែនាំជាលើកដំបូងនៅក្នុងទសវត្សរ៍ឆ្នាំ ១៩៨០ និងបានកែឡើងវិញជិត១០ដងចាប់តាំងពីពេលនោះមក ក៏ត្រូវបានបង្ហាញផងដែរ ដោយកាំជ្រួចទម្ងន់ ៥០០ គីឡូក្រាមនេះអាចហោះបានចម្ងាយរហូតដល់ ៣.០០០ គីឡូម៉ែត្រពីជើងទម្របាញ់ចល័តរបស់វា ដែលអាចរួមបញ្ចូលនាវាចម្បាំងផងដែរ។ ប្រព័ន្ធនេះត្រូវបានផលិតដោយក្រុមហ៊ុន LIG Nex1 និងក្រុមហ៊ុន Hanwha ។
ជាចុងក្រោយ ការបង្ហាញអំណាចយោធាកាលពីថ្ងៃអង្គារក៏បានរួមបញ្ចូលផងដែរនូវការបង្ហាញជាលើកដំបូងមិនធ្លាប់មាននៃមីស៊ីលចម្ងាយឆ្ងាយ L-SAM ដែលជាប្រព័ន្ធការពារដែនអាកាសនិងមីស៊ីលក្នុងស្រុកដែលកំពុងត្រូវបានបង្កើតឡើងដោយទីភ្នាក់ងារអភិវឌ្ឍន៍ការពារជាតិ ក្រុមហ៊ុន Hanwha និងក្រុមហ៊ុន LIG Nex1 ហើយរំពឹងអាចបាញ់បានចម្ងាយដល់ទៅ ១៥០ គីឡូម៉ែត្រ។ ប្រព័ន្ធនេះគ្រោងនឹងដាក់ឱ្យប្រើប្រាស់ជាមួយយោធាកូរ៉េខាងត្បូងក្នុងឆ្នាំ ២០២៦ ហើយត្រូវបានគេប្រៀបធៀបសមត្ថភាពរបស់វាជាមួយនឹងប្រព័ន្ធការពារអាកាស THAAD របស់អាម៉េរិក និង ប្រព័ន្ធ S-400 របស់រុស្ស៊ី៕
