ប្រែសម្រួល : កញ្ញាដាលីស (ស៊ីនហួ) ៖ ខ្សែរថភ្លើងព្យួរលើអាកាសបែបពាណិជ្ជកម្មដំបូងគេរបស់ចិនបានបើកជាសាធារណៈកាលពីថ្ងៃអង្គារនៅទីក្រុងអ៊ូហាននៃខេត្តហ៊ូប៉ី ភាគកណ្តាលប្រទេសចិន។
យោងតាមក្រុមហ៊ុន Optics Valley Traffic ដែលជាប្រតិបត្តិករនៃខ្សែរថភ្លើងនេះបានឱ្យដឹងថា ដំណាក់កាលប្រតិបត្តិការដំបូងនៃគម្រោងនេះមានចម្ងាយសរុប ១០,៥ គីឡូម៉ែត្រ និង មានស្ថានីយចំនួន ៦។
ខ្សែរថភ្លើងទោល (Monorail) ដែលព្យួរសំយ៉ុងលើអាកាសនេះ ដំណើរការរយៈពេល ១២ ម៉ោងជារៀងរាល់ថ្ងៃ ដោយរថភ្លើងចេញដំណើររៀងរាល់ ១០ នាទីម្តង។
ល្បឿនប្រតិបត្តិការអតិបរមានៃរថភ្លើងនេះគឺ ៦០ គីឡូម៉ែត្រក្នុងមួយម៉ោង។ ដំណើរការប្រតិបត្តិការទាំងមូល រួមទាំងការចាប់ផ្តើម ការចូលស្ថានីយ ការបើក និងការបិទទ្វារ គឺធ្វើឡើងដោយស្វ័យប្រវត្តិទាំងស្រុង ហើយមិនត្រូវការអន្តរាគមន៍ពីមនុស្សឡើយ។
លោក ស៊ី ហុងចិន (Xie Hongzhen) បុគ្គលិករបស់ក្រុមហ៊ុនបាននិយាយថា ការរចនាខ្សែរថភ្លើងតែមួយគត់ ជាមួយនឹងរថភ្លើងព្យួរពីធ្នឹមតែមួយ គឺជាដំណោះស្រាយប្រតិបត្តិការដ៏ឆ្លាតវៃ។ បើប្រៀបធៀបទៅនឹងផ្លូវដែកប្រពៃណីឬផ្លូវដែកក្រោមដីដែលមានពីរធ្នឹម រថភ្លើងធ្នឹមមួយផ្តល់នូវការជិះរលូនជាង និងមានប្រសិទ្ធភាពលុបបំបាត់ការរំខានពីចរាចរណ៍និងអ្នកថ្មើរជើងផ្សេងទៀត។
រថភ្លើង Monorail ដែលគេស្គាល់ផងដែរថាជា “The Optics Valley Photon” ហាក់សំយ៉ុងក្បាលចុះក្រោមដោយសារតែខ្សែរថភ្លើងស្ថិតនៅខាងលើអាកាស។ អ្នកដំណើរអាចរីករាយនឹងទីក្រុងពីទិដ្ឋភាពខុសគ្នាទាំងស្រុងតាមរយៈកម្រាលកញ្ចក់ក្រោមជើងរបស់ពួកគេ។
ចាប់តាំងពីប្រតិបត្តិការសាកល្បងរបស់ខ្លួនក្នុងខែឧសភាមក រថភ្លើង Monorail បានទាក់ទាញភ្ញៀវទេសចរមកពីទូទាំងប្រទេស៕
ខ្សែរថភ្លើងទោល (Monorail) ដែលព្យួរសំយ៉ុងលើអាកាសនេះ ដំណើរការរយៈពេល ១២ ម៉ោងជារៀងរាល់ថ្ងៃ ដោយរថភ្លើងចេញដំណើររៀងរាល់ ១០ នាទីម្តង