ប្រែសម្រួលៈបំណង(ស្ត្រេតថែមស៍)៖មនុស្សជាង១.០០០នាក់នៅបង់ក្លាដែសបានស្លាប់ដោយជំងឺគ្រុនឈាមចាប់តាំងពីដើមឆ្នាំ នេះបើតាមតួលេខផ្លូវការបានបង្ហាញ ។វាជាការផ្ទុះជំងឺបង្កឡើងដោយសារមូសខ្លាដ៏អាក្រក់បំផុតនៅក្នុងប្រទេសនៅអាស៊ីខាងត្បូងមួយនេះ។
គ្រុនឈាមជាជំងឺឆ្លងនៅតំបន់ត្រូពិច។វាបង្កអោយអ្នកជំងឺក្តៅខ្លួនខ្លាំង រកកលចង់ក្អួត ឈឺក្បាល ក្អួត និងឈឺសាច់ដុំ ហើយក្នុងករណីធ្ងន់ធ្ងរអ្នកជំងឺចេញឈាមនិងស្លាប់។
អង្គការសុខភាពពិភពលោកបានព្រមានថា ជំងឺគ្រុនឈាមនិងជំងឺដទៃទៀតបង្កឡើងដោយវីរុសតាមរយៈសត្វមូសដូចជាគ្រុនឈីក(chikungunya) ជំងឺខាន់លឿន(yellow fever) និងហ្ស៊ីកា កំពុងឆ្លងរាលដាលកាន់តែលឿននិងកាន់តែឆ្ងាយឡើងដោយសារតែការប្រែប្រួលអាកាសធាតុ។
តួលេខមកពីអគ្គនាយកដ្ឋានសេវាសុខាភិបាលបង់ក្លាដែសចេញផ្សាយកាលពីថ្ងៃអាទិត្យ បាននិយាយថាមនុស្ស១.០០៦នាក់បានស្លាប់ និងជាង២០០.០០០នាក់កើតគ្រុនឈាមចាប់តាំងពីដើមឆ្នាំមក។ចំនួនមនុស្សស្លាប់ដោយគ្រុនឈាមនៅឆ្នាំនេះ ខ្ពស់ជាងឆ្នាំមុនបូករួមទាំងការស្លាប់ចាប់តាំងពីឆ្នាំ២០០០មក។។វាជាការស្លាប់ដោយជំងឺនេះច្រើនបំផុតនៅបង់ក្លាដែសនិងខ្ពស់បំផុតនៅទូទាំងពិភពលោក។
ទិន្នន័យបានបង្ហាញថា ក្នុងចំណោមអ្នកស្លាប់មាន១១២នាក់ជាកុមារ។
ពួកអ្នកវិទ្យាសាស្ត្របានបន្ទោសការផ្ទុះគ្រុនឈាមដ៏អាក្រក់នៅឆ្នាំនេះមួយផ្នែកលើការឡើងកំដៅក្នុងអំឡុងរដូវវស្សាដែលផ្តល់លក្ខខណ្ឌអំណោយផលសំរាប់ការកកើតមូស៕
បន្ទប់ដាក់អ្នកជំងឺគ្រុនឈាមនៅមន្ទីរពេទ្យធំក្នុងទីក្រុងដាក្កាពេញដោយអ្នកជំងឺ