ប្រែសម្រួល : កញ្ញាដាលីស (ដេល្លីម៉េល) ៖ មន្ទីរបញ្ចកោណបានព្រមានសភាថា ខ្លួនកំពុងខ្វះខាតថវិកាដើម្បីជំនួសអាវុធដែលសហរដ្ឋអាម៉េរិកបានបញ្ជូនទៅកាន់អ៊ុយក្រែន ហើយត្រូវបង្ខំចិត្តពន្យឺតការផ្គត់ផ្គង់ឡើងវិញដល់កងទ័ព នេះបើយោងតាមលិខិតមួយផ្ញើទៅកាន់ក្រុមមេដឹកនាំសភា។
លិខិត ដែលទទួលបានដោយទីភ្នាក់ងារសារព័ត៌មាន Associated Press ជំរុញឱ្យសភាបំពេញថវិកាសម្រាប់អ៊ុយក្រែន។
សភាបានបញ្ចៀសការបិទរដ្ឋាភិបាលតាមរយៈការអនុម័តច្បាប់ផ្តល់មូលនិធិរយៈពេលខ្លីកាលពីចុងសប្តាហ៍ ប៉ុន្តែវិធានការនេះបានទម្លាក់ចុះទាំងអស់នូវជំនួយសម្រាប់អ៊ុយក្រែនក្នុងការប្រយុទ្ធទប់ទល់នឹងរុស្ស៊ី។
លោក ម៉ៃឃើល ម៉ាកខត (Michael McCord) មន្ត្រីគ្រប់គ្រងមន្ទីរបញ្ចកោណបានប្រាប់ក្រុមមេដឹកនាំសភានិងព្រឹទ្ធសភាថា នៅសល់ថវិកាតែ ១,៦ ពាន់លានដុល្លារនៃថវិកា ២៥,៩ ពាន់លានដុល្លារដែលសភាបានផ្តល់ដើម្បីបំពេញបន្ថែមស្តុកអាវុធយោធាអាម៉េរិកដែលបានហូរទៅអ៊ុយក្រែន។ សព្វាវុធទាំងនោះរួមមាន កាំភ្លើងធំ គ្រាប់រ៉ុក្កែត និងកាំជ្រួចរាប់លានគ្រាប់ ដែលមានសារៈសំខាន់ចំពោះការវាយលុករបស់អ៊ុយក្រែនក្នុងគោលបំណងដណ្តើមយកមកវិញនូវទឹកដីដែលរុស្ស៊ីដណ្តើមបានក្នុងសង្គ្រាម។
ក្រៅពីនេះ សហរដ្ឋអាម៉េរិកនៅសល់ទឹកប្រាក់ប្រមាណ ៥,៤ ពាន់លានដុល្លារដើម្បីផ្តល់អាវុធនិងឧបករណ៍ពីឃ្លាំងស្តុករបស់ខ្លួន។ សហរដ្ឋអាម៉េរិកនឹងអស់ថវិកានោះហើយ ប្រសិនបើមន្ទីរបញ្ចកោណមិនដឹងខ្លួននៅដើមឆ្នាំនេះថាខ្លួនបានវាយតម្លៃលើសលើឧបករណ៍ដែលខ្លួនបានបញ្ជូនរួចទៅហើយ ដោយអាចរំដោះថវិកាបានប្រហែល ៦,២ ពាន់លានដុល្លារ។ ឧបករណ៍មួយចំនួនត្រូវបានបញ្ជូនក្នុងប៉ុន្មានខែថ្មីៗនេះ។
លោកម៉ាកខតបាននិយាយថា សហរដ្ឋអាម៉េរិកបានអស់ទាំងស្រុងនូវមូលនិធិរយៈពេលវែងសម្រាប់រដ្ឋាភិបាលក្រុងគៀវ តាមរយៈគំនិតផ្តួចផ្តើមជំនួយសន្តិសុខអ៊ុយក្រែន ដែលផ្តល់ប្រាក់ដើម្បីធ្វើកិច្ចសន្យាសម្រាប់អាវុធនាពេលអនាគត។
លោកម៉ាកខតបាននិយាយនៅក្នុងសំបុត្រនោះថា “យើងត្រូវបានបង្ខំចិត្តរួចហើយដើម្បីពន្យឺតការបំពេញបន្ថែមដល់កងកម្លាំងរបស់យើងផ្ទាល់ដើម្បីទប់ទល់នឹងអនាគតមូលនិធិមិនច្បាស់លាស់។ ការខកខានក្នុងការបំពេញបន្ថែមសេវាកម្មយោធារបស់យើងទាន់ពេលវេលាអាចប៉ះពាល់ដល់ការត្រៀមខ្លួនរបស់យោធារបស់យើង។”
លោកបានបន្ថែមថា ប្រសិនបើគ្មានមូលនិធិបន្ថែមនៅពេលនេះទេ សហរដ្ឋអាម៉េរិកនឹងត្រូវពន្យារពេលឬរក្សាទុកអាវុធការពារដែនអាកាស គ្រាប់រំសេវ ដ្រូន និងឧបករណ៍កម្ទេចនិងបំបែក ដែលមានសារៈសំខាន់និងបន្ទាន់នៅពេលនេះ ខណៈដែលរុស្ស៊ីត្រៀមធ្វើប្រតិបត្តិការវាយលុករដូវរងា។
លោកប្រធានាធិបតី ចូ បៃដិន បាននិយាយកាលពីថ្ងៃអាទិត្យថា ខណៈជំនួយនឹងបន្តហូរមកសម្រាប់ពេលនេះ ពេលវេលាកំពុងជិតអស់ហើយ។
លោកបៃដិនបាននិយាយថា “ទោះស្ថិតក្រោមកាលៈទេសៈណាក៏ដោយយើងមិនអាចអនុញ្ញាតឱ្យការគាំទ្ររបស់អាម៉េរិកសម្រាប់អ៊ុយក្រែនត្រូវបានរំខាននោះឡើយ។ យើងមានពេលវេលា មិនច្រើនទេ ហើយមានអារម្មណ៍បន្ទាន់ខ្លាំងណាស់”៕
រដ្ឋមន្ត្រីការពារជាតិអាម៉េរិក ឡយ អូស្ទីន (ស្តាំ) និយាយជាមួយលោកហ្សេលេនស្គីក្នុងទីក្រុងវ៉ាស៊ីនតោនកាលពីថ្ងៃទី២១ កញ្ញា ឆ្នាំ២០២៣