ប្រែសម្រួល : កញ្ញាដាលីស (ដេល្លីម៉េល) ៖ ប្រធានាធិបតី ចូ បៃដិន បានទូរស័ព្ទទៅកាន់សម្ពន្ធមិត្តសំខាន់ៗកាលពីថ្ងៃអង្គារ ដើម្បីធានាពួកគេឡើងវិញអំពីការបន្តគាំទ្ររបស់សហរដ្ឋអាម៉េរិកសម្រាប់អ៊ុយក្រែន បើទោះបីជាភាពចលាចលខាងនយោបាយជាថ្មីនៅក្នុងទីក្រុងវ៉ាស៊ីនតោន បានដាក់ជំនួយផ្នែកយោធាថ្មីនៅក្នុងហានិភ័យកាន់តែជ្រៅក៏ដោយ។
លោកបៃដិនបាននិយាយជាមួយមេដឹកនាំលោកខាងលិចដើម្បីរំងាប់អារម្មណ៍ បន្ទាប់ពីជំនួយថ្មីសម្រាប់អ៊ុយក្រែនត្រូវបានដកចេញពីកិច្ចព្រមព្រៀងនៅក្នុងសភាអាម៉េរិក ដើម្បីបញ្ចៀសការបិទរដ្ឋាភិបាលកាលពីថ្ងៃសៅរ៍ ចំពេលមានការប្រឆាំងពីសមាជិកគណបក្សសាធារណរដ្ឋរឹងរូស។
ប៉ុន្តែក្តីសង្ឃឹមរបស់លោកបៃដិននៃបក្សប្រជាធិបតេយ្យក្នុងការជំរុញយ៉ាងឆាប់រហ័សតាមរយៈច្បាប់ថវិកាថ្មីសម្រាប់អ៊ុយក្រែនបានធ្លាក់ចូលទៅក្នុងភាពច្របូកច្របល់ភ្លាមៗបន្ទាប់ពីការតេទូរស័ព្ទកាលពីថ្ងៃអង្គារ នៅពេលដែលក្រុមអ្នកនយោបាយរឹងរូសដូចគ្នានេះបានបណ្តេញប្រធានសភាមកពីបក្សសាធារណរដ្ឋ លោក ខេវិន ម៉ាក់ខាធី (Kevin McCarthy) ក្នុងការបះបោរមួយ។
សេតវិមានបាននិយាយថា ជាមួយភាពចលាចលកំពុងគំរាមកំហែងដល់ការងារនីតិបញ្ញត្តិ លោកបៃដិនបានជំរុញឱ្យបោះឆ្នោតរហ័សដើម្បីជ្រើសរើសប្រធានសភាថ្មី ដើម្បីទប់ទល់នឹង “បញ្ហាប្រឈមបន្ទាន់ជាច្រើនដែលប្រទេសជាតិរបស់យើងកំពុងជួបប្រទះ។”
ប្រធានាធិបតីអាម៉េរិកមុននេះបានទូរស័ព្ទទៅមេដឹកនាំនៃសម្ពន្ធមិត្តសំខាន់ៗ ដូចជា អង់គ្លេស កាណាដា អាល្លឺម៉ង់ អ៊ីតាលី ជប៉ុន ប៉ូឡូញ រូម៉ានី ប្រមុខសហភាពអឺរ៉ុប និងណាតូ និងរដ្ឋមន្ត្រីការបរទេសបារាំង។
សេតវិមានបាននិយាយថា “ប្រធានាធិបតីបៃដិនបានអះអាងសាជាថ្មីនូវការប្តេជ្ញាចិត្តរបស់សហរដ្ឋអាម៉េរិកក្នុងការគាំទ្រអ៊ុយក្រែនជាដរាប ខណៈដែលពួកគេការពារអធិបតេយ្យភាពនិងបូរណភាពទឹកដីរបស់ខ្លួន ស្របពេលមេដឹកនាំប្រទេសផ្សេងទៀតបានបន្ទរការប្តេជ្ញាចិត្តរបស់ពួកគេផងដែរ៕”
លោកបៃដិនអះអាងជាថ្មីអំពីការតាំងចិត្តគាំទ្រអ៊ុយក្រែនជាដរាប