ដោយៈ វ៉ៃកូ / ស្វាយរៀងៈ លោក ម៉ែន អេង អភិបាលរងខេត្តស្វាយរៀង តំណាងលោក អភិបាលខេត្ត នារសៀលថ្ងៃទី ៥ ខែតុលា ឆ្នាំ២០២៣ នេះ បានអញ្ជើញជាអធិបតី នៅក្នុងកិច្ចប្រជុំ ដើម្បីរកដំណោះស្រាយ បញ្ហាទំនាស់ដីធ្លី នៅក្នុងភូមិសាស្ត្រ ស្រុករមាសហែក ខេត្តស្វាយរៀង ដែលកិច្ចប្រជុំនេះ បានប្រព្រឹត្តទៅ នៅសាលប្រជុំបាសាក់ VIP សាលាខេត្ត។
នៅក្នុងឱកាសនោះ លោកអភិបាលរងខេត្ត បានជំរុញដល់មន្ត្រីគ្រប់ស្ថាប័ន ដែលមាន ការពាក់ព័ន្ធទាំងអស់ ត្រូវសិក្សាទៅលើទិដ្ឋភាពច្បាប់ ដើម្បីអនុវត្តទៅកុំឲ្យខុស ទៅនឹងនីតិវិធី។ ម្យ៉ាងទៀត ខាងទីចាត់ការអន្តរវិស័យ ត្រូវពន្លឿនរាល់ឯកសារ ដែលមានការពាក់ព័ន្ធផ្សេងៗ រៀបចំផ្ញើជូនទៅថ្នាក់ជាតិ ដើម្បីសុំយោបល់ ក្នុងការដោះស្រាយ ជាពិសេសគោរពផ្ញើជូន ទៅខុទ្ទកាល័យរបស់សម្ដេចមហាបវរធិបតី នាយករដ្ឋមន្ត្រី នៃព្រះរាជាណាចក្រកម្ពុជា ក៏ដូចជាគ្រប់ស្ថាប័ន ដែលមានការពាក់ព័ន្ធ ទាំងអស់ រួមទាំងបងប្អូនក្រុមអ្នកសារព័ត៌មានផងដែរ ដើម្បីធ្វើការផ្សព្វផ្សាយ ឲ្យបានទូលំ ទូលាយ។ ដូច្នេះយើងទាំងអស់គ្នា ត្រូវរួមគ្នាគិត រួមគ្នាដោះស្រាយ និងរួមគ្នាទទួល ខុសត្រូវ។
គួររំលឹកផងដែរថា នៅពេលកន្លងមក មានប្រជាពលរដ្ឋ នៅភូមិត្រពាំងស្មាច់ ឃុំអណ្ដូងត្របែក ភូមិបុស្ស ឃុំត្រស់ បាននាំគ្នាទៅកាប់ឆ្ការ ដាំដុះដំឡូង កៅស៊ូ ចាប់យកដីរដ្ឋ ចំការព្រៃឈើរបស់រដ្ឋ ដែលគ្រប់គ្រង ដោយក្រសួងកសិកម្ម រុក្ខាប្រមាញ់ និងនេសាទ នៅឃុំត្រស់ ឃុំអណ្ដូងត្របែក បែបអនាធិបតេយ្យនេះ បណ្តាលមកពី ប្រជាពលរដ្ឋ ជឿតាមការញុះញង់របស់មេខ្យល់ ដែលលើកយករឿង ប្រជាពលរដ្ឋ ៧៨ គ្រួសារ ពាក់ព័ន្ធទៅនឹងដី ៤៧៦ ហិកតា ទៅប្រមុខរាជរដ្ឋាភិបាល ក្នុងឆ្នាំ២០១១ ប៉ុន្តែដីជាក់ស្ដែង មានតែ ១១៧ ហិកតាតែប៉ុណ្ណោះ។
ជាលទ្ធផល ក្រុមការងារធ្លាប់បានសម្រេចដកបង្គោល ដែលត្រូវបានប្រជាពលរដ្ឋ មួយចំនួនតូច បានបោះបង្គោល ចាប់យកដី និងដាំដំណាំ លើដីរបស់ស្ថានីយដាំកូនឈើ ក្រសាំងរបស់រដ្ឋ ចំនួន ៥០ ហិកតា និងដកកូនកៅស៊ូបានចំនួន ២៥០ ដើម រួចរាល់ផងដែរ ក្រោយពីរដ្ឋបាលខេត្ត ធ្លាប់បានធ្វើការណែនាំ និងផ្សព្វផ្សាយច្បាប់ អំពីការកាន់កាប់ និងអាស្រ័យផល លើដីព្រៃរបស់រដ្ឋរួចហើយ៕ V / N
