ដោយៈ វ៉ៃកូ / ស្វាយរៀង៖ លោក សេង សីលា និងលោក ម៉ែន អេង អភិបាលរង ខេត្តស្វាយរៀង រួមទាំងមន្ត្រីក្រោមឱវាទ នៅព្រឹកថ្ងៃអាទិត្យ ទី ៨ ខែតុលា ឆ្នាំ២០២៣ បានអញ្ជើញចូលរួម ក្នុងពិធីបុណ្យកាន់បិណ្ឌវេនទី៩ នៅវត្តដងទង់ ស្ថិតនៅភូមិ ច្រកឫស្សី សង្កាត់បាទី ក្រុងបាវិត ខេត្តស្វាយរៀង។
ឆ្លៀតក្នុងវេលានោះ លោកអភិបាលរងខេត្ត ក៏បាននាំមក នូវការផ្តាំផ្ញើសួរសុខទុក្ខ ដោយក្តីនឹករលឹកពីសំណាក់ សម្តេចកិត្តិសង្គហបណ្ឌិត ម៉ែន សំអន ប្រធានក្រុមការងារ ចុះមូលដ្ឋានខេត្តស្វាយរៀង និងលោក ប៉េង ពោធិ៍សា អភិបាលខេត្ត ប្រគេនដល់ ព្រះសង្ឃ និងជូនដល់បងប្អូន ប្រជាពលរដ្ឋ ។
ទន្ទឹមនឹងនេះដែរ លោកអភិបាលរងខេត្ត បានមានប្រសាសន៍ថា ពិធីនេះអាចប្រព្រឹត្តទៅបាន ដោយសាតែប្រទេសជាតិមាន សុខសន្តិភាពពេញលេញ ក្រោមការដឹកនាំប្រកប ដោយគតិបណ្ឌិតរបស់ សម្តេចមហាបវរធិបតី ហ៊ុន ម៉ាណែត បានដឹកនាំប្រទេសឱ្យមានការអភិវឌ្ឍ និងមានការរីកចម្រើន លើគ្រប់វិស័យ ក្នុងនោះវិស័យព្រះពុទ្ធសាសនា ក៏មានការ រីកចម្រើន គួរឱ្យកត់សម្គាល់ផងដែរ ។ ចំណែកឯទឹកចិត្តសទ្ធា ជ្រះថ្លា នាថ្ងៃនេះ បានកើតឡើង ចេញពីការរួមសាមគ្គីពីសំណាក់ លោក លោកស្រី ទាំងអស់គ្នានេះ គឺបានចូលរួមចំណែកយ៉ាង សំខាន់ ជាមួយរាជរដ្ឋាភិបាល ក្នុងការលើកស្ទួយវិស័យ ព្រះពុទ្ធសាសនានៅកម្ពុជា ឱ្យកាន់តែរីកចម្រើនបន្ថែមទៀត ។
សូមជម្រាបថា ពិធីបុណ្យកាន់បិណ្ឌ ភ្ជុំបិណ្ឌនេះ គឺជាពិធីបុណ្យ មួយ ដែលធំជាងគេ នៅក្នុងចំណោមពិធីបុណ្យទាំងអស់ របស់ព្រះពុទ្ធសាសនា។ ពិធីនេះ មានរយៈពេល ១៥ ថ្ងៃ ដោយចាប់ពីថ្ងៃ ១រោច ដល់ថ្ងៃ ១៥ រោច ខែភទ្របទ ដែលជាថ្ងៃ បុណ្យភ្ជុំបិណ្ឌ។ ក្នុងរយៈពេល ១៥ ថ្ងៃ នៃពិធីបុណ្យសាសនានេះ ពុទ្ធបរិស័ទជិតឆ្ងាយ ចំណុះជើងវត្ត តែងតែធ្វើចង្ហាន់ វេរប្រគេន ព្រះសង្ឃ ជាប្រចាំ ដោយគណៈកម្មការវត្ត ឬភូមិ បានមូលមតិគ្នា បែងចែកជាវេន ដើម្បីផ្គត់ផ្គង់ចង្ហាន់ព្រះសង្ឃ រហូតចប់ពិធីបុណ្យ ភ្ជុំបិណ្ឌ៕/V/r
