ប្រែសម្រួល : កញ្ញាដាលីស (ដេល្លីម៉េល) ៖ បេសកកម្មរបស់អ៊ីរ៉ង់ប្រចាំអង្គការសហប្រជាជាតិបាននិយាយកាលពីថ្ងៃអាទិត្យថា រដ្ឋាភិបាលក្រុងតេអេរ៉ង់មិនជាប់ពាក់ព័ន្ធក្នុងការវាយប្រហារដ៏បង្ហូរឈាមបំផុតមួយក្នុងប្រវត្តិសាស្ត្ររបស់អ៊ីស្រាអែលទេ នៅពេលដែលក្រុមអ៊ីស្លាមហាម៉ាស់បានសម្លាប់ជនជាតិអ៊ីស្រាអែលចំនួន ៧០០ នាក់ និង ចាប់ពង្រត់រាប់សិបនាក់ទៀត។
បេសកកម្មអ.ស.បរបស់អ៊ីរ៉ង់បាននិយាយនៅក្នុងសេចក្តីថ្លែងការណ៍ថា “វិធានការម៉ឺងម៉ាត់ដែលធ្វើឡើងដោយស្ថាប័នប៉ាឡេស្ទីនគឺជាការការពារខ្លួនស្របច្បាប់ទាំងស្រុងប្រឆាំងនឹងការកាន់កាប់បែបគាបសង្កត់ជិះជាន់និងឧក្រិដ្ឋកម្មដ៏ឃោរឃៅរយៈពេលប្រាំពីរទសវត្សរ៍ ដែលប្រព្រឹត្តដោយរបបអ៊ីស្រាអែលខុសច្បាប់។”
អ៊ីរ៉ង់មិនបានលាក់បាំងចំពោះការគាំទ្ររបស់ខ្លួនសម្រាប់ក្រុមហាម៉ាស់ទេ ដោយផ្តល់ថវិកានិងអាវុធដល់ក្រុមនេះ ព្រមទាំងអង្គការជីហាដអ៊ីស្លាមមួយទៀតរបស់ប៉ាឡេស្ទីន។
ការវាយលុករបស់ក្រុមហាម៉ាស់កាលពីថ្ងៃសៅរ៍ ជាការលុកលុយដ៏ធំបំផុតចូលទៅក្នុងប្រទេសអ៊ីស្រាអែលក្នុងរយៈពេលជាច្រើនទសវត្សរ៍ ។វាកើតឡើងស្របពេលជាមួយនឹងចំណាត់ការដែលគាំទ្រដោយសហរដ្ឋអាម៉េរិកដើម្បីជំរុញប្រទេសអារ៉ាប៊ីសាអូឌីតឆ្ពោះទៅរកការធ្វើឱ្យមានទំនាក់ទំនងធម្មតាឡើងវិញជាមួយអ៊ីស្រាអែលជាថ្នូរនឹងកិច្ចព្រមព្រៀងការពារជាតិរវាងរដ្ឋាភិបាលក្រុងវ៉ាស៊ីនតោននិងក្រុងរីយ៉ាដ ជាចំណាត់ការមួយដែលនឹងធ្វើឱ្យមានការផ្អាកការបង្កើតទំនាក់ទំនងរបស់ព្រះរាជាណាចក្រនេះជាមួយរដ្ឋាភិបាលក្រុងតេអេរ៉ង់។
បេសកកម្មអ.ស.បរបស់អ៊ីរ៉ង់បាននិយាយថា “យើងឈរយ៉ាងមុតមាំក្នុងការគាំទ្រឥតឈប់ឈរសម្រាប់ប៉ាឡេស្ទីន ទោះយ៉ាងណា យើងមិនបានជាប់ពាក់ព័ន្ធក្នុងការឆ្លើយតបរបស់ប៉ាឡេស្ទីនទេ ព្រោះវាត្រូវបានធ្វើឡើងដោយប៉ាឡេស្ទីនតែឯងប៉ុណ្ណោះ។”
ការវាយលុករបស់ក្រុមយុទ្ធជនហាម៉ាស់តាមទីក្រុងនានារបស់អ៊ីស្រាអែលកាលពីថ្ងៃសៅរ៍គឺជាការលុកលុយដ៏សាហាវបំផុតចាប់តាំងពីការវាយប្រហាររបស់អេហ្ស៊ីប និងស៊ីរីនៅក្នុងសង្គ្រាមយំគីបពួ (Yom Kippur) កាលពី ៥០ ឆ្នាំមុន ហើយបានគំរាមបញ្ឆេះភ្លើងសង្គ្រាមមួយទៀតនៅក្នុងជម្លោះដ៏រ៉ាំរ៉ៃ។
បេសកកម្មអ៊ីរ៉ង់ប្រចាំអ.ស.បបាននិយាយថា “ជោគជ័យ” នៃប្រតិបត្តិការរបស់ក្រុមហាម៉ាស់គឺដោយសារតែវាជាការវាយប្រហារដ៏ភ្ញាក់ផ្អើល ដែលបានធ្វើឱ្យវាក្លាយជា “បរាជ័យដ៏ធំបំផុត” នៃអង្គការសន្តិសុខរបស់អ៊ីស្រាអែល។
បេសកកម្មរបស់អ៊ីរ៉ង់បាននិយាយថា “ពួកគេកំពុងព្យាយាមរកលេសដោះសារចំពោះបរាជ័យរបស់ពួកគេ ហើយសន្មតថាវាជាអំណាចស៊ើបការណ៍សម្ងាត់ និងផែនការប្រតិបត្តិការរបស់អ៊ីរ៉ង់ទៅវិញ។”
ជាការឆ្លើយតបទៅនឹងការវាយប្រហាររបស់ក្រុមហាម៉ាស់ ការវាយប្រហារតាមអាកាសរបស់អ៊ីស្រាអែលបានវាយទៅលើប្លុកលំនៅឋាន ផ្លូវរូងក្រោមដី វិហារអ៊ីស្លាម និងផ្ទះរបស់មន្ត្រីក្រុមហាម៉ាស់នៅហ្កាហ្សា ដោយសម្លាប់មនុស្សជាង ៤០០ នាក់ រួមទាំងកុមារ ២០ នាក់៕
អ៊ីស្រាអែលវាយប្រហារលើតំបន់ហ្គាហ្សា ក្រោយការវាយឆ្មក់របស់ក្រុមហាម៉ាស់កាលពីព្រឹកថ្ងៃសៅរ៍