ដោយៈ មុនីរ័ត្ន / ភ្នំពេញៈ លោក ឌុច សុន សមាជិក គណៈកម្មាធិការជាតិរៀបចំការ បោះឆ្នោត (គ.ជ.ប) បានបញ្ជាក់ថា ការពិនិត្យបញ្ជីឈ្មោះ និងការចុះឈ្មោះបោះឆ្នោត ឆ្នាំ២០២៣ នេះ មានគោលដៅសំខាន់ គឺការធ្វើបច្ចុប្បន្នភាពបញ្ជីបោះឆ្នោត ដើម្បីធានាសិទ្ធិបោះឆ្នោត របស់ប្រជាពលរដ្ឋខ្មែរគ្រប់រូប។ ការរៀបចំការគ្រប់គ្រង ការប្រព្រឹត្តទៅនៃការពិនិត្យបញ្ជីឈ្មោះ និងការចុះឈ្មោះបោះឆ្នោត និងការផ្ដល់សុពល ភាពបញ្ជីបោះឆ្នោតឆ្នាំ២០២៣ ត្រូវអនុវត្តដោយអនុលោមទៅតាមច្បាប់ ស្ដីពីការបោះឆ្នោតជ្រើសតាំងតំណាងរាស្រ្ដ បទបញ្ជា និងនីតិវិធី សម្រាប់ការពិនិត្យ បញ្ជីឈ្មោះ និងការចុះឈ្មោះបោះឆ្នោតប្រចាំឆ្នាំ ព្រមទាំងលិខិតបទដ្ឋាន គតិយុត្តនានា ដែលស្ថិតនៅជាធរមាន។
ការបញ្ជាក់នេះ នៅក្នុងកិច្ចប្រជុំ ជាមួយភាគីពាក់ព័ន្ធនឹងការបោះឆ្នោត នៅថ្ងៃទី ១១ ខែតុលា ឆ្នាំ២០២៣ នៅទីស្តីការ គ.ជ.ប។ កិច្ចប្រជុំនេះ ដើម្បីផ្សព្វផ្សាយ អំពីសភាព ការណ៍ទូទៅ ជុំវិញដំណើរការ នៃការពិនិត្យបញ្ជីឈ្មោះ និងការចុះឈ្មោះបោះឆ្នោត នៅតាមឃុំ សង្កាត់ លទ្ធផលបណ្តោះអាសន្ន នៃការចុះឈ្មោះបោះឆ្នោត និងបញ្ហាប្រឈម ក្នុងដំណើរការចុះឈ្មោះបោះឆ្នោត ឆ្នាំ២០២៣។
អំពីសភាពការណ៍ទូទៅ ជុំវិញដំណើរការចុះឈ្មោះបោះឆ្នោត តាមឃុំ សង្កាត់ លោក ឌុច សុន បានមានប្រសាសន៍ថា ក្នុងអំឡុងពេល ១០ ថ្ងៃ កន្លងមកនេះ ដោយសារ ពេលនេះ ជាចុងរដូវវស្សា ហើយនៅប៉ុន្មានថ្ងៃ នៃការចាប់ផ្តើមចុះឈ្មោះដំបូង មានភ្លៀង ធ្លាក់ជោកជាំ នៅតាមឃុំ សង្កាត់មួយចំនួន បង្កជាទឹកជន់ ព្រមទាំងស្ថានភាពសម្ភារ បរិក្ខារ កុំព្យូទ័រ សម្រាប់បម្រើឱ្យការចុះឈ្មោះបោះឆ្នោត មានសភាពចាស់ នាំឱ្យមាន ការរអាក់រអួលខ្លះ ប៉ុន្តែ គ.ជ.ប មានវិធានការ ដោះស្រាយ បានទាន់ពេលវេលា។
អំពីសភាពការណ៍សន្តិសុខ សុវត្ថិភាព និងសណ្តាប់ធ្នាប់សាធារណៈ ក្នុងដំណើរការ ពិនិត្យបញ្ជីឈ្មោះ និងការចុះឈ្មោះបោះឆ្នោត ទូទាំងប្រទេស លោក ឌុច សុន បានជម្រាបជូនថា ដំណើរការប្រព្រឹត្តទៅបានល្អប្រសើរ ដោយ គ.ជ.ប មានការសហការ យ៉ាងខ្ជាប់ខ្ជួន ជាមួយគណៈបញ្ជាការសន្ដិសុខអចិន្ត្រៃយ៍ សម្រាប់ ការបោះឆ្នោត។ ជារួមដំណើរការ នៃការពិនិត្យបញ្ជីឈ្មោះ និងការចុះឈ្មោះបោះឆ្នោត បានប្រព្រឹត្តទៅជាប្រក្រតី និងមានភាពរលូនល្អ ៕ V / N
