ដោយៈ ប.ជ័យ / បន្ទាយមានជ័យៈ បើតាមរបាយការណ៍របស់ រដ្ឋបាល ខេត្តបន្ទាយមានជ័យ បានឲ្យអ្នកយកព័ត៌មានដឹងថា ស្ថានភាពទឹកជំនន់ ក្នុងភូមិសាស្ត្រ ក្រុងសិរីសោភ័ណ ស្រុកមង្គលបូរី ខេត្តបន្ទាយមានជ័យ បានវិវត្តន៍ ហើយចំនួនពលរដ្ឋ រងផលប៉ះពាល់ និងរងគ្រោះ ក៏កើនឡើងដែរ។
គិតត្រឹម ម៉ោង ៥ ល្ងាច ថ្ងៃទី ១៤ ខែតុលា ឆ្នាំ២០២៣ ស្ថានភាពគ្រោះមហន្តរាយ ថ្ងៃនេះ មានទឹកភ្លៀងបង្គួរ សរុបទូទាំងខេត្តបន្ទាយមានជ័យ ។ ប្រជាពលរដ្ឋរងគ្រោះ ប៉ះពាល់ដោយទឹកជំនន់ មានចំនួន ៣.៥៦៣ គ្រួសារ មនុស្សរាយ មានចំនួន ១៤.៨០០ នាក់ ស្រី ៧.៤៦៩ នាក់ ។ ជម្លៀសទៅទីទួលសុវត្ថិភាព មានចំនួន ១៩៩ គ្រួសារ មនុស្សរាយ ៨៦៩ នាក់ ស្រី ៤២៦ នាក់ កុមារ២៤៣ នាក់ ។ ប៉ះពាល់ ប្រឈមនឹងខូចខាត :ដំណាំស្រូវ មានចំនួន ២.៨២៧ ហិកតា ដំណាំរួមផ្សំ១៥ហិចតា សត្វពាហនៈ ១០០ ក្បាល សាលារៀន ១១ ខ្នង វត្ត ៤ មណ្ឌលុខភាព ១ ទឹកលិចផ្លូវមានចំនួន ១៤៤ កន្លែង មានប្រវែង ៧៩.៧៤២ ម៉ែត្រ ។
ទឹកជំនន់ដែលលិចខ្លាំងជាងគេ មាន ២ ក្រុង ស្រុក គឺនៅស្រុកមង្គលបូរី ប៉ះពាល់ផ្ទះ ប្រជាពលរដ្ឋ ៨ ឃុំ ស្មើនឹង ១.១៣១ គ្រួសារ មនុស្សរាយ ៤.៩៣៧ នាក់ ស្រី ២.៦០៨ នាក់ ជម្លៀសទៅទីទួលសុវត្ថិភាព ៦៨ គ្រួសារ មនុស្សរាយ ៣០៧ នាក់ ស្រី ១៤៨ នាក់ កុមារ ៥៧ នាក់ ប៉ះពាល់ផលដំណាំ ២.៥៨៧ ហិកតា សាលារៀន ៧ កន្លែង វត្ត១ លិចផ្លូវ ៦០ កន្លែង ស្មើនឹងប្រវែង ៤៦.៨៩០ ម៉ែត្រ ។
ក្រុងសិរីសោភ័ណ ប៉ះពាល់ផ្ទះប្រជាពលរដ្ឋ មានចំនួន ៧៤៦ គ្រួសារ មនុស្សរាយ ៣.០៩៣ នាក់ ស្រី ១.៥៩៤ នាក់ជម្លៀសទៅទីទួលសុវត្ថិភាព ចំនួន ១២៤ គ្រួសារ មនុស្សរាយ ៥២០ នាក់ ស្រី ២៦០ នាក់ ។ ចំណែកក្រុង១ និងស្រុក ៦ ទៀត ប៉ះពាល់មិនផ្ទាល់ ឬដោយប្រយោល។
នេះបើតាមការចុះពិនិត្យជាក់ស្តែង របស់លោក អ៊ុំ រាត្រី អភិបាលខេត្តបន្ទាយមានជ័យ និងជាប្រធានគណៈកម្មាធិការខេត្ត គ្រប់គ្រងគ្រោះមហន្តរាយ អភិបាលរងខេត្ត និងក្រុមការងាររបស់ខេត្ត។
លោក អ៊ុំ រាត្រី បានឲ្យដឹងបន្តថា ដើម្បីឆ្លើយតបឲ្យបានទាន់ពេលវេលា ក្នុងនោះ អាជ្ញាធរ ក្រុមការងារនានា និងកងកម្លាំង ៣ ប្រភេទ បានជម្លៀសប្រជាពលរដ្ឋ នៅសង្កាត់ព្រះពន្លា មកដាក់នៅទីទួលសុវត្ថិភាពបេនឡានថ្មី ស្ថិតក្នុងភូមិ ៣ សង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យ និងនៅឃុំខ្លះ នៅស្រុកមង្គបូរី ទៅនៅកន្លែងផ្សេងៗ។
លោកអភិបាលខេត្ត បានណែនាំដល់ក្រុង ស្រុក សង្កាត់នីមួយៗ ត្រូវចុះពិនិត្យតាមដាន ឲ្យបានជាប្រចាំ អំពីស្ថានភាពទឹក ជាវិធានការទៅពេលខាងមុខ ឃុំ សង្កាត់ទាំងអស់ នៅក្នុងខេត្ត ៕/V
