ប្រែសម្រួលៈបំណង(CNA)៖អគ្គលេខាអង្គការសហប្រជាជាតិលោក អង់តូញ៉ូ ហ្គូទែរ៉េស កាលពីថ្ងៃអាទិត្យទី១៥តុលា បានអំពាវនាវអោយក្រុមហាម៉ាសដោះលែងចំណាប់ខ្មាំងទាំងអស់និងអោយអ៊ីស្រាអែលបើកផ្លូវសំរាប់ជំនួយមនុស្សធម៌ចូលតំបន់ហ្កាហ្សាដែលត្រូវបិទខ្ទប់ទាំងស្រុងអស់មួយសប្តាហ៍មកហើយ និងបានព្រមានថាមជ្ឈិមបូព៌ា«ស្ថិតលើមាត់ជ្រោះដ៏ជ្រៅ»។
លោក ហ្គូទែរ៉េសបាននិយាយថា« ហ្កាហ្សាកំពុងអស់ទឹក អគ្គិសនីនិងគ្រឿងត្រូវការចាំបាច់ផ្សេងៗ»។
អគ្គលេខាអង្គការសហប្រជាជាតិលោក អង់តូញ៉ូ ហ្គូទែរ៉េស
លោកបានបន្តថា ស្តុកស្បៀង ទឹក ការផ្គត់ផ្គង់ថ្នាំពេទ្យនិងប្រេងរបស់អង្គការសហប្រជាជាតិនៅអេហ្ស៊ីប ហ្សកដានី តំបន់វេសប៊ែងនិងអ៊ីស្រាអែល«អាចត្រូវបញ្ជូនចេញបានភ្លាមដោយប្រើពេលតែប៉ុន្មានម៉ោង»និងថា«បុគ្គលិកអង្គការសហប្រជាជាតិត្រូវបញ្ជូនគ្រឿងផ្គត់ផ្គង់ទាំងនេះចូលតំបន់ហ្កាហ្សាដោយសុវត្ថិភាព ដោយគ្មានការរារាំង»។
លោកអគ្គលេខា ក៏បានអំពាវនាវអោយក្រុមហាម៉ាសដោះលែងចំណាប់ខ្មាំង«ភ្លាមដោយគ្មានលក្ខខណ្ឌ»ផងដែរ។
សូមបញ្ជាក់ថា អ៊ីស្រាអែលបានប្រកាសសង្គ្រាមប្រឆាំងក្រុមហាម៉ាសកាលពីថ្ងៃអាទិត្យមុន នៅមួយថ្ងៃក្រោយពួកយុទ្ធជននៃក្រុមសកម្មប្រយុទ្ធប៉ាឡេស្ទីនទម្លុះព្រំដែននិងចូលចាក់និងបាញ់សម្លាប់មនុស្សនៅខាងអ៊ីស្រាអែលអស់ជាង១.៤០០នាក់ ភាគច្រើនជាជនស៊ីវិល។ការវាយប្រហារសងសឹកដោយការទម្លាក់គ្រាប់បែកនិងបាញ់ផ្លោងដាក់បានសម្លាប់មនុស្សយ៉ាងតិច២.៦៧០នាក់នៅក្នុងតំបន់ហ្កាហ្សាស្ទ្រីបដែលគ្រប់គ្រងដោយក្រុមហាម៉ាស តែអ្នកស្លាប់ភាគច្រើនជាប្រជាជនប៉ាឡេស្ទីនធម្មតា។
អ៊ីស្រាអែលក៏កាត់ផ្តាច់ទឹក ភ្លើងនិងការផ្គត់ផ្គង់ស្បៀងទៅកាន់បរិពន្ធភូមិដែលមានជនក្រីក្ររស់នៅកកកុញនេះ មុនបន្តការផ្គត់ផ្គង់ទឹកវិញកាលពីថ្ងៃអាទិត្យទី១៥តុលា។អ៊ីស្រាអែលបានប្រាប់ប្រជាជនប៉ាឡេស្ទីនជាងមួយលាននាក់នៅហ្កាហ្សាខាងជើងអោយភៀសខ្លួនទៅកាន់ភាគខាងត្បូងជាបន្ទាន់មុនប្រតិបត្តិការសឹកជើងគោកមួយចាប់ផ្តើមដើម្បីបោសសម្អាតពួកហាម៉ាស។
បណ្តាក្រុមអង្គការផ្តល់ជំនួយក្នុងពេលជាមួយគ្នា បានព្រមានអំពីគ្រោះមនុស្សធម៌នៅទីនោះ ដោយសារតែប្រជាជនត្រូវភៀសខ្លួនប្រមាណមួយលាននាក់និងពួកគេកំពុងត្អូញត្អែរអំពីការអត់ទឹក៕
ប្រជាជនប៉ាឡេស្ទីននៅហ្កាហ្សាកំពុងត្អូញត្អែររឿងអត់ទឹកប្រើប្រាស់