ប្រែសម្រួលៈបំណង(ស្ត្រេតថែមស៍)៖រដ្ឋមន្ត្រីការបរទេសចិនកាលពីថ្ងៃចន្ទទី១៦តុលាបានអំពាវនាវអោយមានការផ្អាកការបង្ហូរឈាមគ្នានៅអ៊ីស្រាអែល និងនៅកិច្ចប្រជុំមួយជាមួយសមភាគីរុស្ស៊ី បាននិយាយថា បណ្តាមហាអំណាចពិភពលោកគួររួមគ្នាធ្វើការបញ្ចៀសមហន្តរាយមនុស្សធម៌មួយ។
រដ្ឋមន្ត្រីការបរទេសរុស្ស៊ីលោក សឺហ្គេ ឡាវរ៉ូវ បានពិភាក្សាអំពីជម្លោះរវាងអ៊ីស្រាអែលនិងក្រុមហាម៉ាស ជាមួយរដ្ឋមន្ត្រីការបរទេសចិនលោក វ៉ាង យី នៅក្រុងប៉េកាំងមុនដំណើរទស្សនកិច្ចរបស់ប្រធានាធិបតីរុស្ស៊ីលោក វ្ល៉ាឌីមៀ ពូទីន មកកាន់ចិននៅសប្តាហ៍នេះ។
លោកវ៉ាង បានប្រាប់លោកលោកឡាវរ៉ូវថា «ក្រុមប្រឹក្សាសន្តិសុខអង្គការសហប្រជាជាតិត្រូវតែចាត់វិធានការ និងមហាអំណាចធំៗគួរដើរតួនាទីសកម្មមួយ។វាសំខាន់ណាស់ដែលត្រូវមានការផ្អាកការប្រយុទ្ធគ្នាមួយ ដោយភាគីទាំងពីរវិលទៅកាន់តុចរចា ហើយបណ្តាញមនុស្សធម៌គ្រាអាសន្នមួយត្រូវតែបង្កើតឡើងដើម្បីរារាំងកុំអោយមានវិបត្តិមនុស្សធម៌បន្ថែម»។
សូមបញ្ជាក់ថា ទាំងរុស្ស៊ីនិងចិនជាសមាជិកអចិន្ត្រៃយ៍នៃក្រុមប្រឹក្សាសន្តិសុខអង្គការសហប្រជាជាតិ ។ប្រទេសទាំងពីរបានបាននិយាយថាបញ្ហាគ្រឹះនៃជម្លោះនេះគឺកង្វះយុត្តិធម៌សំរាប់ប្រជាជនប៉ាឡេស្ទីន។
ប៉ាឡេស្ទីនចង់បានរដ្ឋមួយនៅតំបន់វេសប៊ែងនិងហ្កាហ្សាស្ទ្រីប ដោយទីក្រុងហ្សេរុយសាឡឹមខាងកើតជារដ្ឋធានីរបស់ខ្លួន ។ទឹកដីទាំងនេះត្រូវអ៊ីស្រាអែលចាប់យកក្នុងសង្គ្រាមឆ្នាំ១៩៦៧។
រុស្ស៊ីថ្កោលទោសទាំងពួកជ្វីហ្វនិងប៉ាឡេស្ទីនចំពោះអំពើហិង្សានេះ តែលោកពូទីនបានរិះគន់អាម៉េរិកចំពោះអ្វីដែលលោកបាននិយាយថា ជាមធ្យោបាយខ្វះចន្លោះរបស់អាម៉េរិកដែលមិនអើពើចំពោះតំរូវការសំរាប់រដ្ឋប៉ាឡេស្ទីនឯករាជ្យមួយ។
ក្នុងអំឡុងកិច្ចពិភាក្សាទ្វេភាគី លោកឡាវរ៉ូវនិងលោកវ៉ាងក៏បានពិភាក្សាអំពីជម្លោះយោធានៅអ៊ុយក្រែន និងកិច្ចខិតខំដោះស្រាយវាតាម«វិធីសាស្ត្រនយោបាយនិងការទូត»។
កាលពីថ្ងៃអាទិត្យលោកវ៉ាងបានទូរស័ព្ទទៅកាន់សមភាគីអ៊ីរ៉ង់និងបានបញ្ជា្កក់ថា ចិនគាំទ្រ«បុព្វហេតុត្រឹមត្រូវរបស់ប្រជាជនប៉ាឡេស្ទីនក្នុងការការពារសិទ្ធិជាតិរបស់គេ។មូលហេតុឬសគល់…នៃស្ថានការណ៍ប៉ាឡេស្ទីន-អ៊ីស្រាអែលគឺថា សិទ្ធិរបស់ប្រជាជនប៉ាឡេស្ទីនដើម្បីមានរដ្ឋនឹងគេត្រូវបានទុកចោលយូរពេកហើយ»។
លោកបានបន្តថា «អយុត្តិធម៌ប្រវត្តិសាស្រ្តនេះគួរត្រូវបានបញ្ចប់ក្នុងពេលឆាប់ៗ។ចិននឹងបន្តឈរនៅខាងសន្តិភាព ហើយគាំទ្របុព្វហេតុត្រឹមត្រូវរបស់ប្រជាជនប៉ាឡេស្ទីននៅក្នុងការការពារសិទ្ធិជាតិរបស់គេ»៕