ប្រែសម្រួលៈបំណង(ដេល្លីម៉េល)៖ កាណាដាកាលពីថ្ងៃព្រហស្បតិ៍បាននិយាយថា ខ្លួនបានដកអ្នកការទូត៤១រូបចេញពីឥណ្ឌាតាមបញ្ជារបស់រដ្ឋាភិបាលទីក្រុងញូវដែលីដែលជាផលនៃជម្លោះការទូតដ៏ជូរចត់មួយជុំវិញឃាតកម្មលើសកម្មជនផ្តាច់ទឹកដីជនជាតិស៊ីក(Sikh)ម្នាក់នៅលើទឹកដីកាណាដា។
រដ្ឋាភិបាលទីក្រុងញូវដែលី មានផែនការដកអភ័យឯកសិទ្ធិការទូតពីអ្នកការទូតកាណាដាទាំងអស់លើកលែងតែអ្នកការទូតចំនួន២១នាក់និងសមាជិកក្រុមគ្រួសាររបស់គេ នៅយ៉ាងយូរត្រឹមថ្ងៃសុក្រទី២០តុលា ដោយបង្ខំអោយរដ្ឋាភិបាលទីក្រុអូតាវ៉ាដកចេញអ្នកការទូតកាណាដទៃទៀត នេះបើតាមការអះអាងរបស់រដ្ឋមន្ត្រីក្រសួងការបរទេស មេឡានី ចូលលី(Melanie Joly )។
លោកស្រីចូលី បានបន្ថែមថា «យើងបានជួយសម្រួលការចាកចេញរបស់ពួកគេដោយសុវត្ថិភាពចេញពីឥណ្ឌា។អ្នកការទូតរបស់យើងនិងសមាជិកគ្រួសាររបស់គេបានចាកចេញហើយឥឡូវ។ការដកអភ័យឯកសិទ្ធិអ្នកការទូត៤១នាក់មិនត្រឹមតែមិនអាចទទួលយកបានតែវាផ្ទុយពីច្បាប់អន្តរជាតិ»។
«កាណាដានឹងបន្តការពារច្បាប់អន្តរជាតិ ដែលអនុវត្តសំរាប់គ្រប់ប្រទេសនិងបន្តចូលរួមទាក់ទងឥណ្ឌា»។
សូមបញ្ជាក់ថា ទំនាក់ទំនងរវាងឥណ្ឌានិងកាណាដា បានធ្លាក់ចុះភ្លាមៗចាប់តាំងពីនាយករដ្ឋមន្ត្រីកាណាដាលោក ចាស្ទីន ទ្រូដូ កាលពីខែមុនបាននិយាយជាសាធារណៈដោយភ្ជាប់ភ្នាក់ងាររបស់ឥណ្ឌាទៅនឹងការសម្លាប់ពលរដ្ឋកាណាដាដើមកំណើតស៊ីកលោក ហាឌីប ស៊ីង នីចា(Hardeep Singh Nijjar) តែរដ្ឋាភិបាលទីក្រុងញូវដែលី បានបដិសេធ។ជម្លោះនេះ នាំអោយមានការបណ្តេញអ្នកការទូតទៅវិញទៅមកមួយឈុតដំបូង។
នាយករដ្ឋមន្ត្រីឥណ្ឌា និងសមភាគីកាណាដា ចាប់ដៃនៅជំនួបកំពូលG20នៅក្រុងញូវដែលីកាលពីថ្ងៃ៩កញ្ញា ២០២៣ មុនផ្ទុះជម្លោះបន្តិច
នីចា ដែលធ្វើយុទ្ធនាការបង្កើតរដ្ឋស៊ីកឯករាជ្យមួយនៅក្នុងរដ្ឋពុនចា(Punjab)របស់ឥណ្ឌា ត្រូវអាជ្ញាធរឥណ្ឌាតាមចាប់ខ្លួនចំពោះអំពើភេរវកម្មនិងការសមគំនិតប្រព្រឹត្តឃាតកម្មនៅឥណ្ឌា។
កាណាដាបានអំពាវនាវអោយឥណ្ឌាចូលរួមសហការស៊ើបអង្កេតលើឃាតកម្មនេះ តែរដ្ឋាភិបាលទីក្រុងញូវដែលី បានច្រានចោលនិងចាត់វិធានការតប ដូចជាបិទទិដ្ឋាកាសំរាប់ជនជាតិកាណាដាជាដើម។ទោះជាយ៉ាងណា កាលពីខែមុនរដ្ឋមន្ត្រីការបរទេសឥណ្ឌាបាននិយាយថា ឥណ្ឌានឹងពិនិត្យភស្តុតាងដែលផ្តល់ដោយកាណាដា។
រដ្ឋាភិបាលឥណ្ឌាបានហៅការចោទប្រកាន់របស់កាណាដាថាមិនទំនង និងបានណែនាំកុំអោយពលរដ្ឋខ្លួនធ្វើដំណើរទៅតំបន់មួយចំនួននៅកាណាដាដោយសារតែសកម្មភាពប្រឆាំងឥណ្ឌាកើនឡើង។
នីចា បានទៅនៅកាណាដានៅឆ្នាំ១៩៩៧ និងបានក្លាយជាពលរដ្ឋកាណាដានៅឆ្នាំ២០១៥។គាត់ត្រូវបានបាញ់សម្លាប់ដោយខ្មាន់កាំភ្លើងពាក់ម៉ាស់មុខពីរនាក់នៅវត្តជនជាតិស៊ីកមួយក្បែរទីក្រុងវែនខូវើកាលពីខែមិថុនា។
កាណាដាជាជម្រកធំទីពីរក្រៅពីឥណ្ឌារបស់ក្រុមជនជាតិស៊ីកប្រមាណ៧៧០.០០០នាក់ ដែលបាននិងកំពុងទាមទារបង្កើតរដ្ឋខាឡីស្ថាន( Khalistan)ឯករាជ្យមួយនៅឥណ្ឌា។ចលនាផ្តាច់ខ្លួនស៊ីកត្រូវកងកម្លាំងឥណ្ឌាបង្ក្រាបយ៉ាងចាស់ដៃនៅទសវត្សរ៍ឆ្នាំ១៩៨០៕