ប្រែសម្រួលៈបំណង(CNA)៖ សមាគមនៃប្រជាជាតិអាស៊ីអាគ្នេយ៍(អាស៊ាន)កាលពីថ្ងៃសុក្រទី២០តុលាបានអំពាវនាវអោយ«បញ្ឈប់ជាបន្ទាន់»អំពើហិង្សានៅមជ្ឈិមបូព៌ានៅពេលជម្លោះរវាងអ៊ីស្រាអែលនិងក្រុមហាម៉ាសបន្តឆាបឆេះ។
នៅក្នុងសេចក្តីថ្លែងការណ៍មួយ បណ្តារដ្ឋមន្ត្រីការបរទេសអាស៊ានបាននិយាយថា ពួកលោក«មានការព្រួយបារម្ភជាខ្លាំង»អំពីជម្លោះប្រដាប់អាវុធកាន់តែខ្លាំងឡើងនៅមជ្ឈិមបូព៌ាហើយ«យើងទទូចសុំអោយបញ្ឈប់អំពើហិង្សាជាបន្ទាន់ដើម្បីកុំអោយមានការស្លាប់និងរបួសមនុស្សថែមទៀត និងសូមអំពាវនាវអោយមានការគោរពច្បាប់មនុស្សធម៌អន្តរជាតិពេញលេញ»។
ប្លុកនេះបានបន្ថែមថា «យើងអំពាវនាវអោយគ្រប់ភាគីបង្កើតច្រកសុវត្ថិភាពដោយគ្មានការរារាំងភ្លាមៗសំរាប់កិច្ចការមនុស្សធម៌»។
រំលឹកថា ក្រុមហាម៉ាសបានបើកការវាយប្រហារចូលអ៊ីស្រាអែលដ៏ភ្ញាក់ផ្អើលកាលពីថ្ងៃ៧តុលាដោយសម្លាប់មនុស្សប្រមាណ១.៤០០នាក់ និងចាប់មនុស្សប្រមាណ២០០នាក់នាំទៅកាន់តំបន់ហ្កាហ្សាដើម្បីទុកធ្វើជាចំណាប់ខ្មាំង។
ជាការឆ្លើយតប អ៊ីស្រាអែលបានបិទខ្ទប់តំបន់ហ្កាហ្សានិងធ្វើការវាយប្រហារតាមអាកាសរួមមានការទម្លាក់គ្រាប់បែកនិងបាញ់ផ្លោងដាក់បរិពន្ធភូមិប៉ាឡេស្ទីននេះដោយមិនរើសគោលដៅដោយរហូតពេលនេះបានសម្លាប់មនុស្សជាង៤.១០០នាក់ហើយ ភាគច្រើនជាជនស៊ីវិល មុនខ្លួនបើកប្រតិបត្តិការជើងគោកដើម្បីបោសសម្អាតពួកយុទ្ធជនហាម៉ាស។
អាស៊ានបាននិយាយថា« យើងសូមថ្កោលទោសជាខ្លាំងអំពើហិង្សាដែលនាំដល់ការស្លាប់និងរបួសជនស៊ីវិល រួមមានប្រជាជនទៅពីប្រជាជាតិអាស៊ានផងដែរ»។
ប្លុកដប់ប្រទេសនេះក៏អះអាងជាថ្មីអំពីការគាំទ្រដំណោះស្រាយរដ្ឋពីរតាមការចរចាមួយ ដែលនឹងអនុញ្ញាតអោយទាំងប្រជាជនអ៊ីស្រាអែលនិងប៉ាឡេស្ទីនរស់នៅក្បែរគ្នាក្នុងសុខសន្តិភាពនិងសន្តិសុខស្របតាមសេចក្តីសំរេចចិត្តរបស់ក្រុមប្រឹក្សាសន្តិសុខអង្គការសប្រជាជាតិនានា ហើយថា«វាជាផ្លូវតែមួយគត់សំរាប់ដោះស្រាយមូលហេតុឬសគល់នៃជម្លោះ»។
អាស៊ាន ក៏បានអំពាវនាវអោយគ្រប់ភាគីការពារនិងធានាសុវត្ថិភាពនិងសន្តិសុខនៃជនស៊ីវិលទាំងអស់ ព្រមទាំងដោះលែងចំណាប់ខ្មាំងទាំងអស់ផងដែរ៕
អាស៊ានថ្កោលទោសជាខ្លាំងអំពើហិង្សាដែលនាំដល់ការស្លាប់និងរបួសជនស៊ីវិល