ប្រែសម្រួល : កញ្ញាដាលីស (អេស៊ាវ័ន) ៖ នាយករដ្ឋមន្ត្រីអូស្ត្រាលីលោក អានថូនី អាល់បាណេស (Anthony Albanese) បាននិយាយកាលពីថ្ងៃអាទិត្យ ទី២២ តុលា ថា លោកនឹងធ្វើដំណើរទៅកាន់ប្រទេសចិនចាប់ពីថ្ងៃទី ៤ ដល់ថ្ងៃទី ៧ ខែវិច្ឆិកា ដើម្បីជួបជាមួយប្រធានាធិបតី ស៊ី ជីនពីង និងនាយករដ្ឋមន្ត្រី លី ឈាង ក្នុងគោលបំណងធានានូវទំនាក់ទំនង “ស្ថិរភាពនិងផលិតភាព” រវាងប្រទេសទាំងពីរ។
លោកអាល់បាណេស ដែលបានចូលកាន់តំណែងក្នុងឆ្នាំ ២០២២ ក្នុងនាមជាប្រមុខរដ្ឋាភិបាលក្នុងគោលបំណងពង្រឹងទំនាក់ទំនងជាមួយដៃគូពាណិជ្ជកម្មដ៏ធំបំផុតរបស់អូស្ត្រាលី បាននិយាយថា លោកនឹងទៅទស្សនកិច្ចនៅទីក្រុងប៉េកាំង និងសៀងហៃក្នុងដំណើរទស្សនកិច្ចលើកដំបូងដោយមេដឹកនាំអូស្ត្រាលីចាប់តាំងពីឆ្នាំ ២០១៦ និង បញ្ជាក់ពីជំហានដ៏សំខាន់ក្នុងការរក្សាស្ថិរភាពទំនាក់ទំនង។
លោកអាល់បាណេសបាននិយាយនៅក្នុងសេចក្តីថ្លែងការណ៍មួយថា នៅក្នុងដំណើរទស្សនកិច្ចនេះ មេដឹកនាំនឹងពិភាក្សាអំពីកិច្ចសហប្រតិបត្តិការលើវិស័យដូចជា ទំនាក់ទំនងសេដ្ឋកិច្ច ការប្រែប្រួលអាកាសធាតុ និង “ទំនាក់ទំនងរវាងប្រជាជនរបស់យើង” ។
លោកបាននិយាយថា “ខ្ញុំទន្ទឹងរង់ចាំដំណើរទស្សនកិច្ចទៅកាន់ប្រទេសចិន ដែលជាជំហានដ៏សំខាន់មួយឆ្ពោះទៅរកការធានានូវទំនាក់ទំនងស្ថិរភាពនិងផលិតភាព។”
“ខ្ញុំទន្ទឹងរង់ចាំចូលរួមបន្ថែមទៀតជាមួយប្រធានាធិបតីស៊ីនិងនាយករដ្ឋមន្ត្រីលីដើម្បីផលប្រយោជន៍ជាតិរបស់អូស្ត្រាលី។”
កាលពីថ្ងៃអាទិត្យផងដែរ លោកអាល់បាណេសបាននិយាយថា អូស្ត្រាលីបានឈានដល់កិច្ចព្រមព្រៀងជាមួយចិនដើម្បីឆ្ពោះទៅមុខដើម្បីដោះស្រាយវិវាទជុំវិញស្រានៅអង្គការពាណិជ្ជកម្មពិភពលោក (WTO) ដែលទំនងជម្រះផ្លូវសម្រាប់ការបន្តការនាំចូលដែលមានតម្លៃ ៨០០ លានដុល្លារអាម៉េរិកក្នុងមួយឆ្នាំមុនពេលពន្ធគយត្រូវបានដាក់ចេញក្នុងឆ្នាំ ២០២០។
លោកអាល់បាណេសបាននិយាយថា “យើងស្វាគមន៍កិច្ចព្រមព្រៀងរបស់ចិនដើម្បីធ្វើការពិនិត្យឡើងវិញយ៉ាងរហ័សនៃពន្ធគយរបស់ខ្លួន។ ដំណើរការនេះត្រូវបានរំពឹងថានឹងចំណាយពេលប្រាំខែ។”
“អូស្ត្រាលីនិងចិនបានព្រមព្រៀងគ្នាថា យើងនឹងផ្អាកជម្លោះលើស្រានៅក្នុងអង្គការ WTO ដោយរង់ចាំលទ្ធផលនៃការពិនិត្យនេះ”៕
នាយករដ្ឋមន្ត្រីអូស្ត្រាលីលោក អានថូនី អាល់បាណេស