ប្រែសម្រួលៈបំណង(ដេល្លីម៉េល)៖អ្នកការទូតកំពូលរបស់ចិននឹងធ្វើទស្សនកិច្ចដ៏កម្រមួយនៅទីក្រុងវ៉ាស៊ីនតោននាសប្តាហ៍នេះ ដោយបើកផ្លូវសំរាប់លទ្ធភាពនៃដំណើរទស្សនកិច្ចមួយរបស់ប្រធានាធិបតីស៊ី ជីនពីង ក្នុងបំណងទប់កុំអោយភាពតានតឹងពិភពលោករីករាលដាលហួសពីលទ្ធភាពអាចគ្រប់គ្រងបាន។
រដ្ឋមន្ត្រីការបរទេសចិនលោក វ៉ាង យី នឹងទៅធ្វើទស្សនកិច្ចអាម៉េរិកចាប់ពីថ្ងៃព្រហស្បតិ៍ទី២៦តុលាដល់ថ្ងៃសៅរ៍ទី២៨តុលា ចំពេលមហាអំណាចទាំងពីរកំពុងមានបញ្ហានឹងគ្នាអំពីពាណិជ្ជកម្ម អ៊ុយក្រែន មជ្ឈិមបូព៌ា តៃវ៉ាន់ និងការអះអាងរបស់ចិននៅសមុទ្រចិនខាងត្បូង។
មន្ត្រីអាម៉េរិកជាន់ខ្ពស់ម្នាក់បាននិយាយថា ដំណើរនេះជាផ្នែកនៃកិច្ចខិតខំរវាងមហាអំណាចសេដ្ឋកិច្ចផុតលេខទាំងពីរដើម្បី«គ្រប់គ្រងការប្រកួតប្រជែងដោយទទួលខុសត្រូវ»។
«យើងបន្តជឿថា កិច្ចការទូតទល់មុខដោយផ្ទាល់ជាវិធីល្អបំផុតដើម្បីលើកឡើងអំពីបញ្ហាប្រឈម ដោះស្រាយការគិតខុសនិងទាក់ទងខុស ហើយយើងស្វះស្វែងធ្វើការជាមួយចិននៅក្នុងផ្នែកណាផ្តល់ផលប្រយោជន៍ដល់យើង»។
តាមពិតដំណើររបស់លោកវ៉ាងជាការឆ្លើយតបនឹងដំណើររបស់រដ្ឋមន្ត្រីការបរទេសអាម៉េរិក អ៊ែនថូនី ប្លីងកិន ដែលបានទៅធ្វើទស្សនកិច្ចទីក្រុងប៉េកាំងកាលពីខែមិថុនា។លោកប្លីងកិនបានចំណាយពេល១១ម៉ោងនៅក្រុងប៉េកាំងដោយជួបប្រជុំជាមួយក្រុមមេដឹកនាំចិន រួមមានប្រធានាធិបតីស៊ី ជីនពីង។
ពួកអ្នកការទូតរំពឹងថា លោកវ៉ាងនឹងជួបប្រធានាធិបតីចូ បៃដិន ដែលស្ថិតនៅក្រុងវ៉ាស៊ីនតោននៅសប្តាហ៍នេះ
លោកបៃដិន ដែលបានជួបលោកស៊ីជាចុងក្រោយនៅក្រៅជំនួបG20នៅកោះបាលីកាលពីខែវិច្ឆិកាមុន បានអញ្ជើញលោកស៊ីអោយទៅទីក្រុង សាន់ ហ្វ្រានស៊ីស្កូ នៅខែក្រោយ កន្លែងដែលអាម៉េរិកនឹងទទួលរៀបចំកិច្ចប្រជុំកំពូលAPEC៕