ដោយៈ សុផល / ភ្នំពេញ៖ លោកឧបនាយករដ្ឋមន្ត្រី សាយ សំអាល់ រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ នៅក្នុងកិច្ចប្រជុំជាមួយសមាគមអ្នកអភិវឌ្ឍន៍លំនៅឋានកម្ពុជា កាលពីថ្ងៃទី ២៣ តុលា ២០២៣ នៅទីស្តីការក្រសួង បានមានប្រសាសន៍ថា «វិស័យអចលនទ្រព្យ គឺជាវិស័យដែលធំ និងចាំបាច់របស់កម្ពុជា ដែលទាក់ទងដល់សន្តិសុខ នយោបាយ និងសុវត្ថិភាពរបស់ប្រទេស។ យើងទាំងអស់គ្នា ត្រូវរួមគិតដោះស្រាយ ដើម្បីផ្តល់សុវត្ថិភាព និងការពារ វិស័យឧស្សាហកម្មនេះ សំដៅឈានទៅសម្រេចឱ្យបាន នូវគោលនយោបាយ លំនៅឋានសមរម្យ ជូនប្រជាពលរដ្ឋកម្ពុជា»។
លោកឧបនាយករដ្ឋមន្ត្រី សាយ សំអាល់ បានលើកពីវិធានការចាំបាច់ចំនួន ៤ ចំណុច ដើម្បីកែលម្អនិងលើកស្ទួយវិស័យអចលនទ្រព្យគឺ ៖ ១. ពិភាក្សាលើការជួល អចិន្ត្រៃយ៍សម្រាប់ជនបរទេស ២. ពិនិត្យ និងស្នើធនាគារជាតិ ពិចារណាឡើងវិញ លើការផ្ដល់លំហូរសាច់ប្រាក់ និងការអនុវត្តការប្រាក់ ៣. ស្វែងរកវិធីគៀងគរទុន វិនិយោគពីបរទេស ៤. បើកទំព័រសករាជថ្មី ជាដៃគូយុទ្ធសាស្រ្តរួមគ្នារវាងក្រសួង និងអ្នកអភិវឌ្ឍន៍ ដើម្បីជជែកពិភាក្សានិងដាក់ចេញនូវវិធានការនានា ដើម្បីទ្រទ្រង់ វិស័យអចលនទ្រព្យ។
កិច្ចប្រជុំនេះ មានវត្តមានអ្នកឧកញ៉ា ឧកញ៉ា ជាម្ចាស់បុរីធំៗដូចជា អ្នកឧកញ៉ា លី ហួរ ប្រធានសមាគមអ្នកអភិវឌ្ឍន៍លំនៅឋានកម្ពុជា និងជាម្ចាស់បុរី វិមានភ្នំពេញ, អ្នកឧកញ៉ា លាង ឃុន ម្ចាស់បុរី ជីប ម៉ុង លែន, អ្នកឧកញ៉ា ថៃ ជាហួត ម្ចាស់បុរី ប៉េង ហួត, អ្នកឧកញ៉ា ជាម ឃុនណាត ម្ចាស់បុរី មេគង្គលែន, អ្នកឧកញ៉ា សៀ ឫទ្ធី ប្រធានក្រុមប្រឹក្សាភិបាលនៃក្រុមហ៊ុន វើលដ៏ប្រ៊ីដ គ្រុប។
គួរជម្រាបថា សមាគមអ្នកអភិវឌ្ឍន៍លំនៅឋានកម្ពុជា បង្កើតឡើងក្នុងគោលបំណង ដើម្បីពង្រឹងគុណភាពបុរី និងផ្ទះល្វែងឡើងវិញ ព្រមទាំងជំរុញឱ្យសមាជិករបស់ខ្លួន សាងសង់ផ្ទះ សំណង់អគារ ដែលមានចរិតលក្ខណៈបែបរចនាបទខ្មែរ ព្រមទាំងផ្តល់ ព័ត៌មានចាំបាច់ ជុំវិញការរកស៊ីខុសច្បាប់របស់ក្រុមហ៊ុនខ្លះ ដែលឆ្មក់ឱកាសឆបោក ពលរដ្ឋ និងជួយជំរុញឱ្យមានការប្រកួតប្រជែកគ្នាផ្នែកតម្លៃ និងសេវាកម្ម ដែលជា ប្រយោជន៍ ដើម្បីអតិថិជនទទួលព័ត៌មានច្រើនជាងមុន និងមានជម្រើសល្អច្រើន ជាងមុន។ លើសពីនេះ សមាគម ក៏នឹងមានការផ្សព្វផ្សាយជុំវិញវិស័យលំនៅឋាន ឱ្យទូលំទូលាយ ដោះដូរបទពិសោធន៍ រវាងសមាជិក ព្រមទាំងចូលរួមដោះស្រាយ បញ្ហាផ្លូវច្បាប់នានា ជូនអ្នកទិញរបស់ខ្លួន ឱ្យបានច្រើនជាងមុន៕ V / N
