ប្រែសម្រួលៈបំណង(ដេល្លីម៉េល)៖ចិនបានដករដ្ឋមន្ត្រីការពារជាតិ លី សាងហ្វ៊ូ( Li Shangfu)និងបណ្តេញអតីតរដ្ឋមន្ត្រីការបរទេស ឈីន ហ្កាង( Qin Gang)ចេញពីគណៈរដ្ឋមន្ត្រីរបស់ខ្លួនកាលពីថ្ងៃអង្គារទី២៤តុលា នេះបើតាមការផ្សាយរបស់សារព័ត៌មានរដ្ឋចិន ក្នុងការរុះរើដ៏ធំមួយនៃក្រុមមេដឹកនាំជាន់ខ្ពស់ចិន។
ព័ត៌មាននេះលេចឡើងក្រោយមានពាក្យចចាមអារ៉ាមរាប់ខែជុំវិញការបាត់ខ្លួនលោក លី សាងហ្វ៊ូនិងលោកឈីន ហ្កាងដោយគ្មានការពន្យល់។
កាលពីថ្ងៃអង្គារ ទូរទស្សន៍រដ្ឋ CCTV បានប្រកាសការដកមន្ត្រីកំពូលទាំងពីរក្នុងការផ្សាយពេលល្ងាចរបស់ខ្លួន តែមិនបានផ្តល់ហេតុផលចំពោះការដកនេះទេ។
លោកលី បាត់ខ្លួនក្រោយវិលមកពីដំណើរទស្សនកិច្ចនៅរុស្ស៊ីនិងបេឡារូស
នៅមិនទាន់មានការដាក់មនុស្សជំនួសលោកលីនៅឡើយទេ។
ក្រៅពីត្រូវបានដកចេញពីរដ្ឋមន្ត្រីការពារជាតិ លោកលីក៏បាត់បង់តំណែងនៅក្រុមប្រឹក្សារដ្ឋ ឬគណៈរដ្ឋមន្ត្រីចិនផងដែរ។
អតីតរដ្ឋមន្ត្រីការបរទេស ឈីន ឥឡូវក៏ត្រូវបានដកចេញពីគណៈរដ្ឋមន្ត្រីចិនផងដែរ។លោកត្រូវបានជំនួសដោយអ្នកការទូតជើងចាស់ វ៉ាង យី ដែលមានឋានៈខ្ពស់ជាងក្នុងឋានានុក្រមរដ្ឋាភិបាលចិន។
សារព័ត៌មានស៊ីនហួ បានរាយការណ៍ថា អតីតមេបញ្ជាការរងកងទ័ពជើងទឹកវ៉ាង ហូប៊ីន(Wang Houbin) ត្រូវបានតែងតាំងជាមេបញ្ជាការថ្មីនៃកងកម្លាំងនេះ ក្រោយមេបញ្ជាការមុនលោក លី យូចាវ(Li Yuchao)បាត់មុខអស់រាប់សប្តាហ៍ដោយមិនដឹងហេតុផល។
CCTV កាលពីថ្ងៃអង្គារក៏បានប្រកាសថា រដ្ឋមន្ត្រីវិទ្យាសាស្ត្រនិងបច្ចេកវិទ្យា វ៉ាង ហ្ស៊ីកាង(Wang Zhigang)និងរដ្ឋមន្ត្រីហិរញ្ញវត្ថុ លីវ គុន(Liu Kun)ក៏ត្រូវបានដកចេញពីតំណែង៕
លោកឈីន ហ្កាង(ឆ្វេង) និងលោកលី សាងហ្វ៊ូ(ស្តាំ) ត្រូវបានដកចេញពីគណៈរដ្ឋមន្ត្រីចិនទាំងគ្មានការពន្យល់ហេតុផល