ដោយ៖ តារារិទ្ធ / ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានអំពាវនាវជាថ្មីទៀត ដល់ជនរួមជាតិទាំងអស់ ឱ្យរួមគ្នា ថែរក្សាសុខសន្តិភាព ឲ្យបាន កុំចាំដល់បាត់បង់សន្តិភាព ទើបស្ដាយក្រោយឱ្យសោះ ។
សម្តេចធិបតី ហ៊ុន ម៉ាណែត បានថ្លែងនៅព្រឹកថ្ងៃទី ២៥ ខែតុលា ឆ្នាំ២០២៣ ក្នុងពិធីជួបសំណេះសំណាល ជាមួយបងប្អូនកម្មករ និយោជិត ចំនួនជាង ១ម៉ឺននាក់ នៅក្នុងស្រុកព្រៃឈរ និងស្រុកកំពង់សៀម ខេត្តកំពង់ចាម។
សម្តេចធិបតី ហ៊ុន ម៉ាណែត បានមានប្រសាសន៍ថា ដោយសារកត្តាសុខសន្តិភាព ទើបប្រទេសជាតិយើង មានការអភិវឌ្ឍរីកចម្រើន ទៅមុខជាលំដាប់ ហើយប្រជាពលរដ្ឋ រស់នៅជួបជុំក្រុមគ្រួសារជាប្រក្រតី ។
សម្តេចធិបតី ហ៊ុន ម៉ាណែត បញ្ជាក់ថា នៅពេលប្រទេសជាតិ មានសន្តិភាព ទោះតិច ឬច្រើន គឺរាជរដ្ឋាភិបាល អាចមានលទ្ធភាព ផ្តល់នូវផលប្រ យោជន៍ ជូនប្រជាពលរដ្ឋ ទៅតាមស្ថានភាពជាក់ស្តែង ។
សម្តេចធិបតី ហ៊ុន ម៉ាណែត បានថ្លែងថា បើគ្មានសន្តិភាពនោះទេ ប្រជាពលរដ្ឋ គ្មានសេចក្តីសុខនោះឡើយ។ សម្តេច បន្តថា បើគ្មានសន្តិភាពនោះទេ ទោះបីជា ប្រទេសអ្នក មានប៉ុន្មានក៏ដោយ ក៏គ្មានសេចក្ដីសុខនោះដែរ។ សម្ដេចបានលើកឡើង ពីបញ្ហាជម្លោះអ៊ីស្រាអែល- ប៉ា ឡេស្ទីន និងរុស្ស៊ី-អ៊ុយក្រែន ជាឧទាហរណ៍ជាក់ស្តែង។
សម្ដេចធិបតី ហ៊ុន ម៉ាណែត បានគូសបញ្ជាក់ថា ការចង់បានអំណាចដោយប្រើវិធី សង្គ្រាម ឬការញុះញង់ ឲ្យបំផ្លាញនូវសន្តិភាព មិនមែនជាជម្រើសល្អនោះទេ ដែលអាចមើលឃើញបាន តាមរយៈស្ថានភាពមួយចំនួន នៅតំបន់មជ្ឈិមបូព៌ាបច្ចុប្បន្ន និងថា បើទោះបីជាប្រទេសអ្នក មានប៉ុណ្ណាក៏ដោយ ក៏ប៉ុន្តែមិនអាចមានក្ដីសុខ នោះទេ៕/V.mara
