ដោយ៖ សុវណ្ណកុម្ភៈ / ភ្នំពេញ៖ លោក Oleg Starynskyi គ្រូបង្វឹកក្រុមភ្នំពេញ ក្រោន បាននិយាយថា ជំនួបជើងទី២ ជាមួយMacarthur FC នៅលើទឹកដី អូស្ដ្រាលី ប្រៀបដូចជាការប្រកួត Final មួយនៅទីនោះ។
លោកបានបន្តថា យើងលេងបាល់ទាត់ តាមរបៀបរបស់យើង ជាមួយនឹងជំនឿចិត្ត។ ការការពារ និងការវាយបក មិនមែនជាអ្វី ដែលយើងចូលចិត្តនោះទេ ដូច្នេះខ្ញុំពិតជា សសើរកីឡាករទាំងអស់ ដែលខំប្រឹង ក្នុងការធ្វើការងារដ៏អស្ចារ្យនេះ។
ការប្រកួតនៅអូស្ដ្រាលី គឺជាការប្រកួតដ៏លំបាក សម្រាប់ពួកយើង ហើយវាជាការសាក ល្បង ពិតប្រាកដមួយ។ យើងត្រូវការរៀបចំពេលវេលា ធ្វើដំណើរ និងការផ្លាស់ប្ដូរ មួយចំនួន ដើម្បីត្រៀមការប្រកួតនេះ។
លោក Oleg បានបន្តថា វាគឺជាការឈានទៅមុខដ៏សំខាន់ សម្រាប់បាល់ទាត់កម្ពុជា ដែលឲ្យយើងយល់ថា យើងអាចប្រជែង និងលេងបានជាមួយពួកគេ។ ខ្ញុំសង្ឃឹមថា ជ័យជម្នះនេះ នឹងធ្វើឲ្យយើង មានភាពជឿជាក់ ដើម្បីទទួលបានសមិទ្ធផលបន្ថែមទៀត នាពេលខាងមុខ។
គ្រូបង្វឹកជនជាតិអ៊ុយក្រែនដដែល បានបន្ដថា យើងលេងបាល់ទាត់ តាមអ្វីដែលយើង បានរៀបចំ ហើយយើងមានទំនុកចិត្ត ក្នុងការប្រកួតនេះ។ ខ្ញុំពិតជារីករាយជាមួយ កីឡាករ មែនទែន ដែលពួកគេ ព្យាយាមលេងជាមួយបេះដូង និងភាពជឿជាក់។ ខ្ញុំអាចនិយាយបានថា ទោះលេងជាមួយក្រុម មកពីអាស៊ីផ្សេងទៀត ម៉េចក៏ដោយ ក៏ពួកយើង នៅតែលេងរបៀបមានទំនុកចិត្តរបស់យើងដូចគ្នា។
ថ្ងៃទី៩ វិច្ឆិកា ភ្នំពេញក្រោន នឹងលេងជើងទី២ នៅលើទឹកដីអូស្ដ្រាលី។ ទោះបីភ្នំពេញ ក្រោន ឈ្នះ ៣ ប្រកួតជាប់ៗគ្នា ក៏ពិតមែន តែការលេងនៅក្រៅផ្ទះ ជាមួយអូស្ដ្រាលី វាពិតជាអម្រែកដ៏ធ្ងន់ ហេតុនេះ បេះដូងនៃការរួមក្រុម ធ្វើឲ្យយើងមានជំនឿចិត្ត ទោះលេងក្រៅផ្ទះក៏ដោយ។
បេសកកម្មជើងទី២ ត្រូវហោះទៅជួបក្រុមអូស្ដ្រាលីនេះវិញម្ដង នាថ្ងៃទី ០៩ វិច្ឆិកា មុនបើកទ្វារផ្ទះទទួលក្រុម Cebu FC របស់ហ្វីលីពីន នាថ្ងៃទី ៣០ វិច្ឆិកា និងចុងក្រោយ ជួបក្រុមម្ចាស់ផ្ទះ Shan United នាថ្ងៃទី ១៤ ខែធ្នូខាងមុខ៕/V-PC
