ប្រែសម្រួល : កញ្ញាដាលីស (ដេល្លីម៉េល) ៖ រ៉ូបឺត ខាត (Robert Card) ជាអ្នកបាញ់ប្រហារទ្រង់ទ្រាយធំនៅរដ្ឋមេន (Maine) ត្រូវបានប្រទះឃើញស្លាប់នៅក្នុងព្រៃជាមួយនឹងស្នាមកាំភ្លើងបាញ់ខ្លួនឯងលើក្បាល ដោយបញ្ចប់ការតាមប្រមាញ់រយៈពេល ៤៨ ម៉ោងរបស់សមាជិកមន្ត្រីអនុវត្តច្បាប់ជាង ៣០០ នាក់។
ការិយាល័យតម្រួតអានដ្រូស្កូកហ្គីន (Androscoggin) បានសរសេរនៅលើហ្វេសប៊ុកថា “ជនសង្ស័យនៅក្នុងការបាញ់ប្រហារកាលពីយប់ថ្ងៃពុធត្រូវបានរកឃើញហើយបានស្លាប់ហើយ” ។
ខាត អាយុ ៤០ ឆ្នាំ ត្រូវបានរកឃើញនៅម៉ោង ៧៖៤៥ យប់នៅជិតទឹកធ្លាក់លីសប៊ន (Lisbon Falls) ជាកន្លែងដែលរថយន្តរបស់គាត់ត្រូវបានបោះបង់ចោលភ្លាមៗបន្ទាប់ពីការសម្លាប់រង្គាលកាលពីថ្ងៃពុធ។ សាកសពរបស់គាត់ត្រូវបានរកឃើញនៅជិតរោងចក្រកែឆ្នៃមួយពីកន្លែងដែលគាត់ត្រូវបានបាញ់នាពេលថ្មីៗនេះ។
គេមិនច្បាស់ទេថាតើគាត់ស្លាប់យូរប៉ុណ្ណា ហើយលោក ម៉ៃ ស៊ូសឆាក់ (Mike Sauschuck) មេបញ្ជាការនៃនាយកដ្ឋានសុវត្ថិភាពសាធារណៈរបស់រដ្ឋមេន មិននិយាយថាលោកខាតបានស្លាប់ដោយសារប៉ូលិសដេញតាមឬបានស្លាប់ជាច្រើនថ្ងៃនោះទេ។
លោកស៊ូសឆាក់បាននិយាយថា “នៅមានការងារច្រើនត្រូវធ្វើនៅទីនេះនៅកន្លែងកើតហេតុនិងនៅមានរឿងច្រើនទៀតត្រូវតាមដានជាបន្ត។”
លោកស៊ូសឆាក់បានបញ្ជាក់ថា ខាតត្រូវគេជឿថាបានស្លាប់ដោយការបាញ់ដោយខ្លួនឯង។
លោកបានបន្ថែមថា បម្រាមបរបាញ់នៅតំបន់នោះឥឡូវត្រូវបានដកចេញហើយ។ ថ្ងៃសៅរ៍គឺជាការចាប់ផ្តើមនៃរដូវបរបាញ់សត្វក្តាន់ ហើយជាកាលបរិច្ឆេទដ៏សំខាន់នៅក្នុងប្រក្រតិទិនរបស់រដ្ឋមេន៕
រ៉ូបឺត ខាត ត្រូវបានប្រទះឃើញស្លាប់ក្នុងព្រៃក្បែរទឹកធ្លាក់លីសប៊ន
ជនរងគ្រោះពីការបាញ់ប្រហារកាលពីយប់ថ្ងៃពុធ