ប្រែសម្រួល : កញ្ញាដាលីស (ដេល្លីម៉េល) ៖ ក្រសួងការបរទេសអ៊ីស្រាអែលបាននិយាយកាលពីថ្ងៃចន្ទថា សានី លុក (Shani Louk) ស្ត្រីជនជាតិអ៊ីស្រាអែលកាត់អាល្លឺម៉ង់អាយុ ២៣ ឆ្នាំ ដែលត្រូវបានចាប់ពង្រត់ដោយពួកយុទ្ធជនហាម៉ាសនៅពេលដែលពួកវាបានវាយលុកពិធីបុណ្យតន្ត្រីមួយនៅវាលខ្សាច់អ៊ីស្រាអែល បានស្លាប់ហើយ។
ក្រសួងបានសរសេរនៅក្នុងសារមួយនៅលើ X ថា “ពួកយើងខូចចិត្ត” ខណៈក្រសួងបញ្ជាក់ពីការស្លាប់របស់នាងលុក។
ក្រសួងបាននិយាយថា “នាងសានី ដែលត្រូវបានចាប់ពង្រត់ពីមហោស្រពតន្ត្រីនិងធ្វើទារុណកម្មនិងយកទៅដង្ហែជុំវិញតំបន់ហ្គាហ្សាដោយពួកភេរវករហាម៉ាស បានជួបប្រទះនូវភាពភ័យរន្ធត់ដែលមិនអាចយល់បាន។”
“សូមចងចាំរូបនាង។”
នាងលុកបានបាត់ខ្លួនចាប់តាំងពីក្រុមយុទ្ធជនហាម៉ាសបានវាយលុកលើពិធីបុណ្យតន្ត្រីនៅស៊ូពើណូវ៉ា (Supernova) នៅជិតព្រំដែនហ្គាហ្សា ខណៈដែលពួកវាបានធ្វើការវាយប្រហារដ៏អាក្រក់បំផុតក្នុងប្រវត្តិសាស្ត្ររបស់អ៊ីស្រាអែល។
អធិការបតីអាល្លឺម៉ង់ អូឡាហ្វ សូល (Olaf Scholz) បានពណ៌នាដំណឹងនៃការស្លាប់របស់នាងថា “គួរឱ្យតក់ស្លុត” ។
គាត់បានសរសេរនៅលើ X ថា “ដូចមនុស្សជាច្រើននាក់ផ្សេងទៀតដែរ នាងត្រូវបានគេសម្លាប់យ៉ាងឃោរឃៅ។”
លោកបាននិយាយថា “នេះបង្ហាញពីភាពព្រៃផ្សៃពេញលេញនៅពីក្រោយការវាយប្រហាររបស់ពួកហាម៉ាស ដែលត្រូវតែទទួលខុសត្រូវ។ នេះជាភេរវកម្ម ហើយអ៊ីស្រាអែលមានសិទ្ធិការពារខ្លួន។”
អ្នកចូលរួមពិធីបុណ្យប្រមាណ២៧០នាក់ត្រូវបានសម្លាប់នៅកន្លែងកម្សាន្តស៊ូពើណូវ៉ា៕
នាង សានី លុក ត្រូវបានបញ្ជាក់ថាស្លាប់ហើយ