ប្រែសម្រួល : កញ្ញាដាលីស (ដេល្លីម៉េល) ៖ បណ្តាប្រទេសអារ៉ាប់ ដែលបានធ្វើឱ្យមានប្រក្រតីភាពឡើងវិញឬកំពុងពិចារណាកែលម្អទំនាក់ទំនងជាមួយអ៊ីស្រាអែល កំពុងស្ថិតក្រោមសម្ពាធកាន់តែខ្លាំងឡើងពីសាធារណជនឱ្យកាត់ផ្តាច់ទំនាក់ទំនងទាំងនោះចោលវិញ ដោយសារតែសង្គ្រាមរបស់អ៊ីស្រាអែលជាមួយក្រុមហាម៉ាស។នៅពេល
មនុស្សរាប់ម៉ឺននាក់បានដើរតាមផ្លូវក្នុងទីក្រុងរ៉ាបាត (Rabat) និងទីក្រុងផ្សេងទៀតរបស់ម៉ារ៉ុកដើម្បីគាំទ្រដល់ប៉ាឡេស្ទីន។ នៅប្រទេសបារ៉ែន ដែលជាប្រទេសស្ទើរតែមិនអនុញ្ញាតឱ្យមានការតវ៉ា ប៉ូលិសបានឈរយាម ខណៈដែលមនុស្សរាប់រយនាក់បានដើរដង្ហែកាលពីខែមុន ដោយគ្រវីទង់ជាតិនិងប្រមូលផ្តុំគ្នានៅមុខស្ថានទូតអ៊ីស្រាអែលនៅទីក្រុងម៉ាណាម៉ា (Manama)។
បាតុកម្ម ដែលឆ្លុះបញ្ចាំងពីការតវ៉ានៅទូទាំងមជ្ឈិមបូព៌ា បានបង្ហាញពីបញ្ហាដ៏លំបាកសម្រាប់បណ្តារដ្ឋាភិបាលដែលបានទទួលផលប្រយោជន៍ពីទំនាក់ទំនងយោធា និងសេដ្ឋកិច្ចកាន់តែជិតស្និទ្ធជាមួយអ៊ីស្រាអែលក្នុងប៉ុន្មានឆ្នាំថ្មីៗនេះ។
នៅក្នុងប្រទេសអេហ្ស៊ីប ដែលមានទំនាក់ទំនងជាមួយអ៊ីស្រាអែលជាច្រើនទសវត្សរ៍ ក្រុមអ្នកតវ៉ាបានប្រមូលផ្តុំគ្នានៅក្នុងទីក្រុងនិងនៅតាមសាកលវិទ្យាល័យនានា ដោយជួនកាលស្រែកថា “ងាប់ទៅអ៊ីស្រាអែល”។ គណៈកម្មាធិការសភាក្នុងប្រទេសទុយនីស៊ីកាលពីសប្តាហ៍មុនបានអនុម័តសេចក្តីព្រាងច្បាប់មួយ ដែលនឹងធ្វើឱ្យការចងមិត្តជាមួយអ៊ីស្រាអែលក្លាយជាបទឧក្រិដ្ឋ។
នៅក្នុងប្រទេសម៉ារ៉ុកនិងបារ៉ែន កំហឹងសាធារណៈកាន់តែកើនឡើងខ្លាំង។ សកម្មជនកំពុងទាមទារឱ្យបដិសេធកិច្ចព្រមព្រៀងដែលបង្កើតទំនាក់ទំនងជាផ្លូវការជាមួយអ៊ីស្រាអែល ដោយគូសបញ្ជាក់ពីភាពមិនចុះសម្រុងគ្នារវាងរដ្ឋាភិបាលនិងមតិសាធារណៈ។
កិច្ចព្រមព្រៀងអាប្រាហាំ (Abraham) ដែលសម្របសម្រួលដោយសហរដ្ឋអាម៉េរិកក្នុងគោលបំណងឱ្យមានការទទួលស្គាល់អ៊ីស្រាអែលកាន់តែទូលំទូលាយនៅក្នុងពិភពអារ៉ាប់ បានត្រួសត្រាយផ្លូវសម្រាប់កិច្ចព្រមព្រៀងពាណិជ្ជកម្មនិងកិច្ចសហប្រតិបត្តិការយោធាជាមួយប្រទេសបារ៉ែន ម៉ារ៉ុក ស៊ូដង់ និងអារ៉ាប់រួមអេមីរ៉ាត ដែលចាប់ផ្តើមក្នុងឆ្នាំ ២០២០។ អ្នកគ្រប់គ្រងបែបផ្តាច់ការរបស់ពួកគេ ក៏ដូចជាក្រុមមន្ត្រីអាម៉េរិកនិងអ៊ីស្រាអែល បានបន្តកំណត់កិច្ចព្រមព្រៀងនេះជាជំហានឆ្ពោះទៅរក “មជ្ឈិមបូព៌ាថ្មី” ដែលក្នុងនោះទំនាក់ទំនងកាន់តែជិតស្និទ្ធអាចជំរុញសន្តិភាពនិងវិបុលភាព។
កិច្ចព្រមព្រៀងនេះសម្គាល់ជ័យជម្នះផ្នែកការទូតដ៏ធំសម្រាប់ប្រទេសម៉ារ៉ុក ពីព្រោះពួកគេបានដឹកនាំសហរដ្ឋអាម៉េរិកនិងទីបំផុតអ៊ីស្រាអែលឱ្យទទួលស្គាល់ស្វ័យភាពរបស់ខ្លួនលើតំបន់សាហារ៉ាខាងលិចដែលមានជម្លោះ។ ក្រសួងការបរទេសម៉ារ៉ុកមិនបានឆ្លើយតបទៅនឹងសំណួរអំពីកិច្ចព្រមព្រៀងឬការតវ៉ានោះទេ៕
មនុស្សរាប់ម៉ឺននាក់បានដើរតាមផ្លូវក្នុងទីក្រុងរ៉ាបាតនិងទីក្រុងផ្សេងទៀតរបស់ម៉ារ៉ុកដើម្បីគាំទ្រដល់ប៉ាឡេស្ទីន