ប្រែសម្រួល : កញ្ញាដាលីស (ឆានែលញូវអេស៊ា) ៖ ចិនបាននិយាយកាលពីថ្ងៃព្រហស្បតិ៍ ទី ២ ខែវិច្ឆិកាថា កងទ័ពរបស់ខ្លួន “ប្រុងប្រយ័ត្នខ្ពស់ជានិច្ច” បន្ទាប់ពីនាវាចម្បាំងរបស់សហរដ្ឋអាម៉េរិកនិងកាណាដាបានឆ្លងកាត់ច្រកសមុទ្រតៃវ៉ាន់ ដែលជាការឆ្លងកាត់រួមគ្នាជាលើកទីពីររបស់ពួកគេក្នុងរយៈពេលពីរខែមកនេះ។
កងទ័ពជើងទឹកអាម៉េរិកបាននិយាយថា នាវា USS Rafael Peralta ដែលជានាវាពិឃាដថ្នាក់ Arleigh Burke-class និងនាវាចម្បាំង Halifax-class HMCS Ottawa របស់ទ័ពជើងទឹកកាណាដា បានធ្វើដំណើរ “ជាទម្លាប់” ឆ្លងកាត់ច្រកសមុទ្រនេះកាលពីថ្ងៃពុធ។
លោកវរសេនីយ៍ឯក ស៊ី យី (Shi Yi) អ្នកនាំពាក្យនៃបញ្ជាការភូមិភាគខាងកើតរបស់ចិនបាននិយាយនៅក្នុងសេចក្តីថ្លែងការណ៍មួយថា “កងទ័ពនៅភូមិភាគនេះនៅតែប្រុងជើងការខ្ពស់ជានិច្ច ហើយនឹងការពារយ៉ាងម៉ឺងម៉ាត់នូវអធិបតេយ្យភាពនិងសន្តិសុខជាតិក៏ដូចជាសន្តិភាពនិងស្ថិរភាពក្នុងតំបន់”។
លោកស៊ីបានរិះគន់ការឆ្លងកាត់ចុងក្រោយនេះថាជា “ការទាញចំណាប់អារម្មណ៍សាធារណៈ” ហើយបាននិយាយថា កងកម្លាំងជើងទឹកនិងអាកាសរបស់ចិន “បានតាមដានទិសដៅទាំងស្រុងរបស់ពួកគេ” ។
ការឆ្លងកាត់របស់នាវាទាំងពីរបានកើតឡើងបន្ទាប់ពីនាវាចម្បាំងពីរគ្រឿងដែលជាកម្មសិទ្ធិរបស់អាម៉េរិក និងកាណាដាបានបើកឆ្លងកាត់ផ្លូវទឹកតូចចង្អៀតដែលខណ្ឌចែកកោះតៃវ៉ាន់និងចិនដីគោកកាលពីថ្ងៃទី ៩ ខែកញ្ញា។
សហរដ្ឋអាម៉េរិកនិងសម្ពន្ធមិត្តលោកខាងលិចបានបង្កើនការធ្វើដំណើរឆ្លងកាត់ “ដើម្បីសេរីភាពនៃការធ្វើនាវាចរណ៍” ដោយបើកនាវាកងទ័ពជើងទឹកឆ្លងកាត់ទាំងច្រកសមុទ្រតៃវ៉ាន់ និងសមុទ្រចិនខាងត្បូងដែលមានជម្លោះ ដើម្បីពង្រឹងការអះអាងថា ផ្លូវទឹកទាំងពីរគឺជាផ្លូវទឹកអន្តរជាតិ ដោយធ្វើឱ្យរដ្ឋាភិបាលក្រុងប៉េកាំងខឹងសម្បាជាខ្លាំង៕
នាវា USS Rafael Peralta