ប្រែសម្រួលៈបំណង(ដេល្លីម៉េល)៖នាយករដ្ឋមន្ត្រីអ៊ីស្រាអែលលោកបេនចាមីន ណេតាន់យ៉ាហ៊ូ កាលពីថ្ងៃសុក្របានច្រានចោលសម្ពាធពីអាម៉េរិកអោយមាន«ការផ្អាកការប្រយុទ្ធគ្នាដើម្បីមនុស្សធម៌»មួយនៅក្នុងសង្គ្រាមរយៈពេលជិតមួយខែមកនេះដើម្បីការពារជនស៊ីវិលនិងអនុញ្ញាតអោយមានការដឹកជំនួយមនុស្សធម៌ច្រើនទៀតចូលក្នុងតំបន់ហ្កាហ្សា ដោយលោកបញ្ជាក់ថានឹងមិនមានការផ្អាកការប្រយុទ្ធបណ្តោះអាសន្នទេ ដរាបណាចំណាប់ខ្មាំងប្រមាណ២៤០នាក់មិនត្រូវបានដោះលែងជាមុនទេនោះ។
រដ្ឋមន្ត្រីការបរទេសអាម៉េរិកលោកអ៊ែនថូនី ប្លីងកិន បានធ្វើទស្សនកិច្ចលើកទីបីទៅកាន់អ៊ីស្រាអែលចាប់តាំងពីសង្គ្រាមចាប់ផ្តើម ដោយបានបញ្ជាក់សាជាថ្មីអំពីការគាំទ្ររបស់យុទ្ធនាការរបស់អ៊ីស្រាអែលដើម្បីកំទេចក្រុមហាម៉ាសក្រោយក្រុមសកម្មប្រយុទ្ធប៉ាឡេស្ទីននេះឆ្មក់វាយចូលអ៊ីស្រាអែលសម្លាប់មនុស្សប្រមាណ១.៤០០នាក់កាលពីថ្ងៃ៧តុលា។លោកក៏បានបន្ទរការអំពាវនាវរបស់ប្រធានាធិបតី ចូ បៃដិន សុំអោយមានការផ្អាកការប្រយុទ្ធគ្នាបណ្តោះអាសន្នដើម្បីដោះស្រាយវិបត្តិមនុស្សធម៌។
ការព្រមានកាន់តែកើនឡើងចំពោះការស្លាប់ប្រជាជនប៉ាឡេស្ទីននិងទុក្ខសោកកាន់តែធំធេងសំរាប់ជនស៊ីវិលក្រោយការទម្លាក់គ្រាប់បែករាប់សប្តាហ៍និងការពង្រីកការវាយប្រហារតាមជើងគោករបស់អ៊ីស្រាអែលដែលវាកាន់តែបង្កការស្លាប់និងរបួសមនុស្សច្រើនថែមទៀត។បណ្តាមន្ទីរពេទ្យជោរជន់ដោយអ្នករងរបួសនៅពេលពួកវាក្បែរនឹងដួលរលំដោយសារខ្វះថ្នាំពេទ្យនិងប្រេងសំរាប់ដំណើរការម៉ាស៊ីនភ្លើងដោយសារតែតំបន់ហ្កាហ្សាស្ថិតក្រោមការបិទខ្ទប់ពីអ៊ីស្រាអែល។
ប្រជាជនប្រហែល១,៥លាននាក់នៅហ្កាហ្សាបានភៀសខ្លួនចេញពីផ្ទះរបស់គេ នេះបើតាមការប៉ាន់ស្មានរបស់អង្គការសហប្រជាជាតិ នៅពេលប្រជាជនប៉ាឡេស្ទីនកាន់តែខ្វះខាតរបស់ត្រូវការចាំបាច់បំផុតដូចជាស្បៀង និងទឹកផឹក។
ជនប៉ាឡេស្ទីនស្លាប់និងរងរបួសដេកលើដីក្រោយការវាយប្រហារតាមអាកាសរបស់អ៊ីស្រាអែលនៅក្រៅផ្លូវចូលមន្ទីរពេទ្យal-Shifaនៅទីក្រុងហ្កាហ្សាស៊ីធីកាលពីថ្ងៃសុក្រ។
ក្រោមជួបពិភាក្សាជាមួយនាយករដ្ឋមន្ត្រីអ៊ីស្រាអែល លោកប្លីងកិនបាននិយាយថា ចាំបាច់មានការបញ្ឈប់ជាបណ្តោះអាសន្នការប្រយុទ្ធគ្នាដើម្បីបង្កើនការនាំជំនួយចូល និងជួយដោះលែងចំណាប់ខ្មាំងដែលក្រុមហាម៉ាសកំពុងឃុំខ្លួន។តែលោកណេតាន់យ៉ាហ៊ូ បានប្រាប់លោកប្លីងកិនវិញថា «អ៊ីស្រាអែលបន្តការវាយប្រហារពេញទំហឹង» ទាល់តែចំណាប់ខ្មាំងត្រូវបានដោះលែង។
ពួកមន្ត្រីអាម៉េរិកបានបញ្ជាក់ថា ពួកគេមិនទាមទារអោយមានបទឈប់បាញ់មួយទេ តែគ្រាន់តែជាការផ្អាកការប្រយុទ្ធគ្នាជាបណ្តោះអាសន្នមួយដើម្បីនាំជំនួយឬសកម្មភាពមនុស្សធម៌ផ្សេងៗ និងបន្ទាប់ពីនោះទៅអ៊ីស្រាអែលអាចបន្តប្រតិបត្តិការសឹករបស់ខ្លួន។ទោះជាយ៉ាងណា លោកណេតាន់យ៉ាហ៊ូមិននិយាយអំពីគំនិតនេះទេ តែលោកច្រានចោទឈប់បាញ់ណាមួយ។
ទាហានអ៊ីស្រាអែលកំពុងបង្កើនការឡោមព័ទ្ធទីក្រុងហ្កាហ្សាស៊ីធីចំពេលការប្រយុទ្ធជាមួយពួកហាម៉ាសនៅតែបន្តខណៈការវាយប្រហារតាមអាកាសបង្កការខូចខាត ស្លាប់និងរបួសមនុស្សជុំវិញទីក្រុងកាលពីថ្ងៃសុក្រ។ទូរទស្សន៍Al Jazeera បានរាយការណ៍ថា ការវាយប្រហារតាមអាកាសមួយកាលពីយប់ថ្ងៃសុក្របានចំសាលារៀនមួយនៅទីក្រុងហ្កាហ្សាស៊ីធី កន្លែងជនភៀសខ្លួនជាច្រើនកំពុងស្នាក់នៅដោយបណ្តាលអោយស្លាប់មនុស្សជាច្រើន។
ការវាយប្រហារក៏ធ្វើឡើងនៅក្បែរផ្លូវចូលមន្ទីរពេទ្យចំនួនបីនៅហ្កាហ្សាខាងជើង នៅពេលបុគ្គលិកពេទ្យកំពុងជម្លៀសអ្នករងរបួសទៅហ្កាហ្សាខាងត្បូង ៕
យ៉ាងហោចណាស់មនុស្ស១៥នាក់ត្រូវបានសម្លាប់និង៦០នាក់រងរបួសដោយការវាយប្រហារតាមអាកាសរបស់អ៊ីស្រាអែលនៅក្រៅមន្ទីរពេទ្យShifa Hospital