ដោយៈ ទេពកង្រី/កំពង់ឆ្នាំង៖ អ្នករកស៊ីមួយចំនួននៅចំណុចកំពង់ចម្លងស្រឡាង ស្ថិតក្នុងភូមិចុងកោះ សង្កាត់ផ្សារឆ្នាំង ក្រុងកំពង់ឆ្នាំង បានប្រាប់ថា ចំណូលពួកគាត់បានថយចុះយ៉ាងច្រើន ជាហេតុធ្វើឱ្យជីវភាពពួកគាត់ជួបការលំបាក។
អ្នកស្រី ស្រីខុម រស់នៅភូមិសំរោង សង្កាត់ផ្សារឆ្នាំងក្រុងបានរៀបរាប់ឱ្យដឹងថា គាត់លក់ដូរ នំចំណីច្រើនមុខ រួមនិងភេសជ្ជៈនៅទីនេះរយៈពេលជាយូរឆ្នាំហើយដែរ ។ក្នុងការលក់របស់គាត់កន្លងមក យ៉ាងហោចណាស់ក៏អាចលក់បាន២០ទៅ៣០ម៉ឺនរៀលក្នុងមួយថ្ងៃដែរ។ក្រោយពីទូទាត់ថ្លៃដើមអាចចំណេញបានតិចតួចដែរ ទុកគ្រាន់ដោះស្រាយជីវភាពប្រចាំថ្ងៃ ។ប៉ុន្តែបច្ចុប្បន្នចំណូលបានថយចុះជាងពាក់កណ្ដាល។ ពុំសូវមានអ្នកទិញ។ទាំងនេះគាត់ក៏ពុំដឹងដែរថាមកពីកត្តាអ្វីនោះទេ។ និយាយរួមគឺស្ងាត់គ្មានមនុស្សម្នា ។
ស្ត្រីដដែលបន្តថា គាត់ត្រូវចំណាយបង់ថ្លៃតូបលក់ក្នុងមួយខែ១៥ម៉ឺនរៀល។ ប៉ុន្តែដោយមើលឃើញពីស្ថានភាពជាក់ស្តែងលក់មិនសូវដាច់ ក្នុងនោះអ្នកទទួលបន្ទុក មានការបន្ធូបន្ថយខ្លះដែរ។
ដោយឡែកអ្នករត់ម៉ូតូឌុប និងរឺម៉កដឹកឥវ៉ាន់ បានលើកឡើងស្រដៀងគ្នា នេះដែរអំពីចំណូល៕សរន/r
