សម្តេចធិបតី ឯកភាពគោលការណ៍យុទ្ធសាស្ត្រ ប្រើប្រាស់កម្លាំងសរុប ចុះវាស់វែងដីធ្លី ជូនពលរដ្ឋ ឲ្យបានលឿន

ដោយ៖ តារារិទ្ធ / ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានដាក់គោលដៅ ដល់ក្រសួងរៀបចំដែនដី នគរូបនីយកម្ម និងសំណង់ ត្រូវខិតខំពន្លឿនការចុះបញ្ជីក្បាលដី ឱ្យបានរួចរាល់ ។ ទន្ទឹមនឹងនេះសម្ដេចធិបតី បានឯកភាព ចំពោះយុទ្ធសាស្ត្រជាគោលការណ៍ ឲ្យប្រើប្រាស់កម្លាំងសរុប ទាំងថ្នាក់កណ្ដាល និងថ្នាក់ខេត្ត ធ្វើយ៉ាងណា ផ្ដល់ប័ណ្ណកម្មសិទ្ធិដីធ្លី ដល់ប្រជាពលរដ្ឋ ឲ្យបានលឿន។

សម្ដេចធិបតី បានមានប្រសាសន៍ថា កាលពីឆ្នាំ២០១១ សម្ដេចតេជោ ហ៊ុន សែន​ អតីតនាយករដ្ឋមន្ត្រី បានដាក់ ចេញគោលនយោបាយវាស់វែងដីធ្លី ជូនប្រជាពលរដ្ឋ គឺគោលនយោបាយចាស់ សកម្មភាពថ្មី ដោយបានវាស់វែងដីធ្លី ជូនប្រជាពលរដ្ឋ ជាច្រើនក្បាលដី ។ ក្នុងនោះ រាជរដ្ឋាភិបាល អាណត្តិទី៧ នឹងបន្តធ្វើសកម្មភាពនេះ បន្តទៀត។

សម្ដេចធិបតី បានឲ្យដឹងថា មកដល់ពេលនេះ ដីដែលយើងវាស់ហើយ ជាង ៧ លាន ក្បាលដី ដោយសារយើងចាប់ ផ្ដើមបញ្ចេញក្បាលដី ដែលត្រូវវាស់បន្ថែម យើងបញ្ចេញ ២ លាន នៅសល់ ៥ លាន ក្បាលដីទៀត ដែលត្រូវចាត់វិធានការ ដើម្បីចេញធ្វើ យ៉ាងម៉េច ជំរុញកិច្ចការនេះ។

សម្តេច បានបន្តថា ឥឡូវនេះ ក្រសួងដែនដី បានដាក់ចេញគោលការណ៍យុទ្ធសាស្រ្ដ សម្តេចបានចារឯកភាពផ្ដល់គោលការណ៍ ប្រើប្រាស់កម្លាំងសរុប ទាំងពីថ្នាក់កណ្ដាល និងថ្នាក់ខេត្ត ដើម្បីធ្វើយ៉ាងណា ចុះមកបែងចែងឲ្យបងប្អូន ឆាប់បានកម្មសិទ្ធិយកទៅប្រើ ប្រាស់ ឲ្យលឿន កុំឲ្យកកស្ទះ។

សម្ដេចធិបតី បានថ្លែងបែបនេះ នៅក្នុងការអញ្ជើញជួបសំណេះសំណាល ជាមួយកម្មករ នៅតំបន់សេដ្ឋកិច្ចពិសេស ខេមបូឌា ចេជាង ហ្គ័រជី ខេត្តព្រះសីហនុ នាព្រឹកថ្ងៃទី ៧ ខែវិច្ឆិកា ឆ្នាំ២០២៣៕ V / N