ប្រែសម្រួល : កញ្ញាដាលីស (ដេល្លីម៉េល) ៖ អ៊ីវ៉ាន់កា ត្រាំ កូនស្រីរបស់អតីតប្រធានាធិបតីត្រាំ បានឡើងឈរនៅក្រចកសេះកាលពីថ្ងៃពុធក្នុងការកាត់ក្តីអំពីបទក្លែងបន្លំប្រឆាំងនឹងអាជីវកម្មគ្រួសារត្រាំ ហើយបាននិយាយថានាងមិនបានជាប់ពាក់ព័ន្ធក្នុងការបង្កើតរបាយការណ៍ហិរញ្ញវត្ថុ ដែលជាចំណុចសំខាន់នៃសំណុំរឿងនេះនោះទេ។
ស្ត្រីវ័យ ៤២ ឆ្នាំ ដែលបានចាកចេញពីក្រុមហ៊ុន Trump Organization ក្នុងឆ្នាំ ២០១៧ ដើម្បីក្លាយជាទីប្រឹក្សាសេតវិមានកំពូលរបស់ឪពុកនាង មិនមែនជាចុងចោទក្នុងសំណុំរឿងក្លែងបន្លំរដ្ឋប្បវេណីនេះទេ ប៉ុន្តែត្រូវបានកោះហៅឱ្យផ្តល់សក្ខីកម្ម។
លោកដូណាល់ ត្រាំ កូនប្រុសច្បងរបស់គាត់ ដូណាល់ ជូនៀ និង អេរិក ព្រមទាំងនាយកប្រតិបត្តិដទៃរបស់ក្រុមហ៊ុន Trump Organization ត្រូវបានចោទប្រកាន់ពីបទបំប៉ោងតម្លៃអចលនទ្រព្យរបស់ពួកគេរាប់ពាន់លានដុល្លារដើម្បីទទួលបានប្រាក់កម្ចីធនាគារនិងលក្ខខណ្ឌធានារ៉ាប់រងដែលអនុគ្រោះ។
បន្ទាប់ពីស្បថរួច នាងអ៊ីវ៉ាន់កាត្រូវបានសួរដោយលោក ល្វីស សូឡូម៉ុន (Louis Solomon) ជាមេធាវីមកពីការិយាល័យអគ្គរដ្ឋអាជ្ញារដ្ឋញូវយ៉ក ថាតើនាងមាន “តួនាទីណាមួយក្នុងការរៀបចំរបាយការណ៍ស្ថានភាពហិរញ្ញវត្ថុរបស់ដូណាល់ ត្រាំឬទេ?”
នាងបាននិយាយថា “ខ្ញុំមិនបានដឹងទេ។ ខ្ញុំមិនបានដឹងអំពីការថ្លែងផ្ទាល់ខ្លួនរបស់គាត់ទេ ក្រៅពីអ្វីដែលលោកបានបង្ហាញខ្ញុំ”។
ប្រាក់កម្ចីមួយចំនួន ដែលទទួលបានដោយក្រុមហ៊ុន Trump Organization ត្រូវបានគេព្យាករណ៍ផ្អែកលើការវាយតម្លៃរបស់អតីតប្រធានាធិបតីអំពីទ្រព្យសម្បត្តិរបស់គាត់។
នាង អ៊ីវ៉ាន់កា ត្រាំ ក៏ត្រូវបានសួរអំពីប្រាក់កម្ចីផ្សេងៗដែលធ្វើឡើងសម្រាប់អាជីវកម្មគ្រួសាររវាងឆ្នាំ ២០១១ និង ២០១៦ ផងដែរ ប៉ុន្តែបាននិយាយថានាងមិនអាចចងចាំព័ត៌មានលម្អិតបានច្រើននោះទេ។
នាងបាននិយាយអំពីការផ្ញើសារអ៊ីមែលឆ្លើយឆ្លងដែលពាក់ព័ន្ធនឹងធនាគារ Inbursa យ៉ាងដូច្នេះថា “ខ្ញុំមិនចាំទេ ដែលឱ្យអង្គុយនៅទីនេះថ្ងៃនេះ រកនឹកលក្ខខណ្ឌទាំងនេះពីឆ្នាំ ២០១១”។
អគ្គរដ្ឋអាជ្ញានៃរដ្ឋញូវយ៉ក លោកស្រី ឡេទីធ្យា ជែមស៍ (Letitia James) បាននិយាយនៅមុនការផ្តល់សក្ខីកម្មរបស់នាងអ៊ីវ៉ាន់កាថា នាងបាន “ធានានិងចរចាយកប្រាក់កម្ចីដើម្បីទទួលបានលក្ខខណ្ឌអនុគ្រោះដោយផ្អែកលើរបាយការណ៍ក្លែងបន្លំនៃស្ថានភាពហិរញ្ញវត្ថុ”។
លោកស្រីជែមស៍បានប្រាប់អ្នកយកព័ត៌មានថា “នាងនឹងព្យាយាមថ្ងៃនេះដើម្បីដកខ្លួនឆ្ងាយពីក្រុមហ៊ុន។ តែគួរឱ្យស្តាយ ការពិតនឹងបង្ហាញឱ្យឃើញថា តាមពិតនាងពិតជាបានជាប់ពាក់ព័ន្ធយ៉ាងខ្លាំង”។
“យើងបានលាតត្រដាងពីគម្រោងនេះ ហើយនាងបានទទួលប្រយោជន៍ពីវាផ្ទាល់”៕
នាងអ៊ីវ៉ាន់កាឡើងក្រចកសេះនៅតុលាការក្រុងញូវយ៉កកាលពីថ្ងៃពុធ